ساياباقتاردا عاجاپ كوپ
داۋرەن قاسەنوۆ,
گازەت وقىرمانى:
– كۇن جىلىنعان سوڭ قالا ساياباقتارىندا بالا-شاعامەن سەرۋەندەپ, دەمالۋدى داستۇرگە اينالدىرىپ كەلەمىن. بيىلعى جازدا ساياباقتار حالىققا قانداي ەرەكشە قىزىقتار ۇسىنادى ەكەن, سول جايىندا ايتىپ بەرەسىزدەر مە؟
وقىرمان ساۋالىنا وراي قالالىق مادەنيەت جانە سپورت باسقارماسى مىنانى حابارلايدى:
استانانىڭ ساياباقتارى وسى جازدا استانالىقتار جانە قالا قوناقتارىنا كوپتەگەن توسىنسىيلار دايىنداپ وتىر. ساياباقتاردا جاڭا اتتراكتسيوندار, قىزىقتى شوۋلار جانە «ماداگاسكار» ءمۋلتفيلمىنىڭ كەيىپكەرلەرىمەن بي كەشتەرى ۇيىمداستىرىلادى.
سوڭعى بىرنەشە جىلدا قالالىق ساياباقتار ەداۋىر جاڭاردى. بۇگىندە ولار بارشانىڭ سۇيىكتى دەمالىس ورنىنا اينالدى. ماسەلەن, بىلتىر «امەريكاندىق سىرعاناقتار» اتتراكتسيونىنا مىنگەن جاندار كوپ بولدى. مۇنداي اتتراكتسيون «استانالىق» ساياباقتا سوڭعى 10 جىلدا بولمادى. ال بيىلعى جازدا اتالمىش ساياباقتا «بۋمەرانگ» اتتى ەكسترەمالدى جاڭا اتتراكتسيون ىسكە قوسىلادى. ول «امەريكاندىق سىرعاناقتار» اتتراكتسيونىنىڭ جانىندا ورنالاسقان. جالپى, بۇل ساياباقتا كەز كەلگەن تالعامعا ساي 20-عا جۋىق اتتراكتسيون ۇسىنىلادى.
وتكەن جىلى استانانىڭ ساياباقتارىندا «ساياباقتىڭ 7 عاجايىبى» اتتى ويىن-ساۋىق جوباسى ىسكە قوسىلعان بولاتىن. جوبا كورەرمەندەردىڭ كوڭىلىنەن شىعىپ, تانىمال مۋلتفيلمدەردىڭ كەيىپكەرلەرى بيىل دا دەمالۋشىلارعا قۋانىش سىيلايدى.
استانانىڭ كىشكەنتاي تۇرعىندارى مەن قوناقتارىنا انيماتورلاردىڭ جانە جاڭا كەيىپكەرلەردىڭ قاتىسۋىمەن جاڭا شوۋ ۇسىنىلادى. ارتىستەردىڭ بەس توبى قالاداعى بەس ساياباقتى ارالايدى جانە كۇنىنە ەكى قويىلىمنان كورسەتەدى. وسى جازدا ساياباقتاردا 1000-عا جۋىق كونتسەرت ۇيىمداستىرىلماق.
بيىل «ساياباقتىڭ 7 عاجايىبى» جوباسى قالا تۇرعىندارى مەن قوناقتارىن تاعى دا ءبىر تاڭعالدىرماق. ساياباقتاردا «ماداگاسكار» ءمۋلتفيلمىنىڭ كەيىپكەرلەرى مىنگەن مۋلتموبيل جۇرەدى. ول ادامدار كوپ جينالعان ورىنداردا توقتاپ, كوڭىلدى بي كەشتەرىن وتكىزەدى.
بالالارعا ارنالعان انيماتسيالىق شوۋلاردىڭ اپتالىق كەستەسىمەن تولىعىراق استانا قالاسى مادەنيەت جانە سپورت باسقارماسىنىڭ ينستاگرامداعى @madeniet_sport.astana اككاۋنتىنان تانىسىپ وتىرۋعا بولادى.
جازىپ العان
امانعالي قالجانوۆ