ارقانىڭ التى ايعى قىسى اياقتالىپ, كۇن جىلىنا باستاعانىنا دا ايدان اسا ۋاقىت بولىپ قالدى. ادەتتە, بۇل شاقتا استانالىقتار قالا سىرتىنا شىعىپ, سەيىل قۇرسا, ەندى ءبىرى ساياجايلارىنا بارىپ, جەمىس-جيدەگىن, كوكونىسىن وتىرعىزۋعا كىرىسەدى. وسىدان بىرنەشە جىل بۇرىن ولارعا قالالىق اكىمدىكتىڭ باستاۋىمەن ارنايى اۆتوبۋستار بولىنەتىن. ال قازىر ساياجايلاردىڭ جاعدايى قانداي؟
ساياجايلارعا ارنالعان ورىندار بىزدە جوق ەمەس. ولارعا ورىن باستاپقىدا قوياندى, تالاپكەر سەكىلدى بىرنەشە جەردەن قاراستىرىلعان. بىراق جۇرت ول جاقتا جىل ون ەكى اي تۇرعاندىقتان, قازىر تۇرعىلىقتى جەرلەردىڭ بىرىنە اينالىپ كەتتى.
«بۇرىن ەلوردانىڭ اينالاسىندا ساياجايلار كوپ بولاتىن. قازىر كوبى تۇرعىلىقتى مەكەنگە اينالىپ كەتتى. ساياجايدىڭ ەڭ
باستى پايداسى – حالىق قىستىڭ قامىن جازدا جاسايتىن. وعان كوبىنە زەينەتكەرلەر باراتىن. كۇن جىلىنعان كەزدە ساياجايلارعا جۇرەتىن ارنايى اۆتوبۋستار بولاتىن ەدى. ولار بۇرىنعى كەڭەستەر ءۇيى مەن وربيتا ايالداماسىندا جۇرتتى كۇتىپ تۇراتىن. بۇل اۆتوبۋستار قالانىڭ ەكى جاعىنداعى ساياجايلارعا كۇنىنە ەكى مارتە قاتىنايتىن ەدى» دەپ ەسىنە الدى ەلوردالىق كۇلجان ەسىمدى اجەي.
ءيا… قازىرگى ۋاقىتتا سارىارقا اۋدانىندا 7 مىڭ تۇرعىنى بار «پوليانكا», «زەلەنايا روششا», «زەلەنايا روششا 2», «سمپ 209», «كجبي 56» اتتى 5 ساياجاي بار.
جاقىندا قالا اكىمىنىڭ ورىنباسارى نۇرلان نۇركەنوۆ «پوليانكا» باۋ-باقشا قوعامىنىڭ تۇرعىندارىمەن كەزدەستى. تۇرعىندار ساياجاي اۋماعىن دامىتۋ تۋرالى ماسەلە قوزعادى. قالالىق اكىمدىكتىڭ حابارلاۋىنشا, ساياجاي اۋماعى جەكە تۇرعىن ءۇي قۇرىلىسىنا جانە تۇراقتى تۇرۋعا ارنالماعان. سەبەبى ءورت قاۋىپسىزدىگىنىڭ تالاپتارىنا مۇلدەم ساي ەمەس. بۇل اۋماقتار, نەگىزىنەن, ساياجاي ماۋسىمىندا ۋاقىتشا تۇرۋعا عانا ارنالعان.
جيىن بارىسىندا قوزعالعان ماسەلەنىڭ
تاعى ءبىرى – «پوليانكا» تۇرعىندارىنىڭ كەيبىرىندە قۇقىق بەلگىلەيتىن ارنايى قۇجاتتارى جوق, ءوز ەركىمەن مەنشىكتەپ العان.
كەزدەسۋدە نۇرلان نۇركەنوۆ قالا اكىمى باقىت سۇلتانوۆتىڭ تاپسىرماسىمەن «پوليانكا» اۋماعىن ودان ءارى يگەرۋ بويىنشا جول كارتاسى ازىرلەنگەنىن جەتكىزدى.
– جول كارتاسى نەگىزىندە ارنايى جۇمىس توبى قىزمەتىنە كىرىسەدى. بەيسەنبى كۇنى 18:00-دە كوميسسيا مۇشەلەرى تۇرعىندارمەن كەزدەسۋ وتكىزەدى. سول جەردە ءار تۇرعىنمەن اقپاراتتىق-ءتۇسىندىرۋ جۇمىستارى جۇرگىزىلەدى. جول كارتاسى بويىنشا اۋماققا قاتىستى ەگجەي-تەگجەيلى جوسپار جاسالادى. قالا اكىمدىگى ينۆەستورلاردى تارتۋ ءۇشىن قاجەت ينجەنەرلىك ينفراقۇرىلىمنىڭ قۇرىلىسىن قامتاماسىز ەتەدى. سول سياقتى كوپ قاباتتى قۇرىلىس فورماتىندا ساياجاي اۋماعىن ودان ءارى دامىتۋعا نيەت بىلدىرەتىن ينۆەستورلار ىزدەستىرىلىپ جاتىر. جەر زاڭناماسىن ساقتاماعانى ءۇشىن سوت شەشىمى بولۋىنا بايلانىستى ساياجاي اۋماعىن بۇزۋ ءتيىمدى ينۆەستور تابىلعانعا دەيىن شەگەرىلدى. ال شارت بويىنشا ينۆەستورلار ساياجاي يەلەرى مەن تۇرعىندارىنا قالانىڭ وزگە تۇسىنان جەر نەمەسە تۇرعىن ءۇي بەرۋى مىندەتتەلەدى. سوندىقتان الاڭدايتىن ەش سەبەپ جوق. ەشكىم باسپاناسىز قالمايدى, – دەدى نۇرلان نۇركەنوۆ.
ءوز كەزەگىندە «پوليانكا» تۇرعىندارى جول كارتاسى بويىنشا قۇرىلعان كوميسسيانىڭ مۇشەلىگىنە باستاماشىل توپتىڭ وكىلدەرىن ەنگىزۋدى سۇرادى. اكىمدىك بۇل ءوتىنىشتى قابىل الدى. ولار ءتۇسىندىرۋ جۇمىستارىنا كۇندەلىكتى بەلسەنە ارالاساتىن بولادى.
نۇر-سۇلتان اكىمىنىڭ ورىنباسارىمەن وتكەن كەزدەسۋگە «پوليانكا» ساياجايىنىڭ 50 تۇرعىنى قاتىستى.
