جىلدار بويى مىڭداعان ەلوردالىق تۇرعىننىڭ جۇيكەسىن جۇقارتقان ۇلەسكەرلىك قۇرىلىس پروبلەماسى جۇيەلى تۇردە شەشىلىپ كەلەدى. جاقىندا سونداي قۇرىلىسى سەگىز جىلعا سوزىلعان – «جاعالاۋ-3» تۇرعىن ءۇي كەشەنىنىڭ 30-بلوگى پايدالانۋعا بەرىلىپ, جۇزدەگەن وتباسى قۋانىشقا كەنەلدى. سونىمەن قاتار ەلوردادا حالىقتىڭ الەۋمەتتىك وسال توپتارى ساناتىنداعى 300-دەن اسا وتباسى جاڭا پاتەر كىلتىن الدى.
«جاڭا جىل قارساڭىندا نۇر-سۇلتاننىڭ «ساقالدى» قۇرىلىستارىنىڭ بىرىنە نۇكتە قويىلدى! بۇل قۇرىلىس سەگىز جىلعا سوزىلعان – «جاعالاۋ-3» تك, 30-بلوك. ءۇيدىڭ ءوزى پايدالانۋعا بەرىلدى. قازىر تۇرعىندارعا كوپتەن كۇتكەن پاتەرلەرىنە تىركەۋگە تۇرۋىنا, ەمحانالارعا, بالالارىن مەكتەپكە, بالاباقشاعا تىركەۋىنە مۇمكىندىك بەرەتىن تەحنيكالىق پاسپورتتارى ۇلەستىرىلىپ جاتىر» دەپ جازدى قالا اكىمى.
ايتۋىنشا, بۇل تۇرعىن ءۇي كەشەنىندە الاياقتارعا الدانىپ قالعان 600-دەن اسا وتباسى بار.
«ۇلەسكەرلەرمەن وتكەن العاشقى كەزدەسۋىمىزدە ۇزاق كۇتكەن پاتەرلەرىنە قونىستانا الاتىنىنا سەنىمسىزدىك تانىتقان ەدى. الايدا قۇرىلىستى اياقتاۋ ءۇشىن جۇمىسىمىزدى كەزەڭ-كەزەڭىمەن جۇرگىزدىك. تۇيتكىلدى ماسەلەلەر كوپ بولدى. قازىر ءىستىڭ باسىم بولىگى شەشىلدى, تەك ماماندار اتقاراتىن كەيبىر تەحنيكالىق جۇمىستارى عانا قالدى» دەپ جازدى قالا اكىمى التاي كولگىنوۆ ينستاگرام پاراقشاسىندا.
