تۇڭعىش پرەزيدەنت ۇلتتىق بانك توراعاسى ەربولات دوساەۆتى قابىلدادى.
كەزدەسۋدە نۇرسۇلتان نازارباەۆقا قازاقستان ەكونوميكاسىنىڭ 2021 جىلعى دامۋى جونىندەگى بولجام, سونداي-اق پاندەميا كەزىندەگى الەم نارىعىنداعى ەكونوميكالىق احۋالعا جاسالعان شولۋ تانىستىرىلدى. ەلباسىعا قارجى تۇراقتىلىعىن قامتاماسىز ەتۋ شارالارى جانە ەكونوميكالىق ءوسىمدى قالپىنا كەلتىرۋدىڭ كەشەندى جوسپارىن جۇزەگە اسىرۋ تۋرالى اقپارات بەرىلدى. ۇلتتىق بانك توراعاسى قازاقستاننىڭ حالىقارالىق رەزەرۆتەرىنىڭ جاعدايىن, ۇلتتىق قور مەن بىرىڭعاي جيناقتاۋشى زەينەتاقى قورى اكتيۆتەرىن باسقارۋ جۇمىستارىنىڭ الدىن الا ناتيجەلەرىن باياندادى.
قاۋىپسىزدىك كەڭەسىنىڭ توراعاسى نۇرسۇلتان نازارباەۆ قورعانىس ءمينيسترى نۇرلان ەرمەكباەۆتى قابىلدادى. كەزدەسۋدە ەلباسىنا 2020 جىلدىڭ قورىتىندىسى بويىنشا قارۋلى كۇشتەردىڭ جاۋىنگەرلىك جانە جەدەل دايىندىعى ناتيجەلەرى, سونداي-اق ونى جەتىلدىرۋ باعىتىندا قابىلدانعان شارالار تۋرالى باياندالدى. سونىمەن بىرگە قورعانىس ءمينيسترى اسكەري مەديتسينانىڭ دامۋى جانە قارۋلى كۇشتەردىڭ COVID-19 پاندەمياسىنا قارسى ءىس-شارالارعا اتسالىسقانى جونىندە ايتىپ بەردى. كەزدەسۋ قورىتىندىسى بويىنشا قاۋىپسىزدىك كەڭەسىنىڭ توراعاسى بىرقاتار ناقتى تاپسىرما بەردى.
