قالالىق ءماسليحاتتىڭ كەزەكتەن تىس وتىز سەگىزىنشى سەسسياسىنا استانا قالاسى اكىمىنىڭ ءبىرىنشى ورىنباسارى س.حوروشۋن, قالا اكىمىنىڭ ورىنباسارلارى, الماتى, سارىارقا, ەسىل اۋداندارىنىڭ اكىمدەرى مەن بۇقارالىق اقپارات قۇرالدارىنىڭ وكىلدەرى قاتىستى.
سەسسيادا ءسوز العان قالالىق ءماسليحاتتىڭ حاتشىسى سانسىزباي ەسىلوۆ ەلباسى جارلىعىمەن قازاقستان رەسپۋبليكاسىنىڭ پارلامەنتى سەناتى دەپۋتاتتارىنىڭ سايلاۋى بيىلعى قازاننىڭ 1-ىنە تاعايىندالعانىن, وسىعان وراي, سەناتور رەتىندە كانديداتتاردى ۇسىنۋ ءماسليحاتتاردىڭ سەسسيالارىندا, سونداي-اق ءوزىن-ءوزى ۇسىنۋ تارتىبىمەن جۇزەگە اسىرىلاتىنىن ايتا كەلە, قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋ ناۋقانى قارساڭىندا قالالىق قاۋىمداستىقتىڭ اتىنان سەنات دەپۋتاتتىعىنا لايىقتى ۇمىتكەردى ۇسىنۋىمىز قاجەت ەكەنىن جەتكىزدى. بۇل رەتتە №12 سايلاۋ وكرۋگىنىڭ دەپۋتاتى ساپار احمەتوۆ ەلوردامىز – استانا قالاسىنىڭ اتىنان بولعاندىقتان, ۇسىنىلعالى وتىرعان ۇمىتكەر باس قالامىزدىڭ بەدەلدى ازاماتى بولۋى قاجەتتىگىن ەسكەرە وتىرىپ, قالالىق ءماسليحاتتىڭ دەپۋتاتى, «نۇر وتان» پارتياسىنىڭ مۇشەسى, «تسەسنا» كورپوراتسياسى» اق ديرەكتورلار كەڭەسىنىڭ توراعاسى سەرىك جاقسىبەكوۆتىڭ كانديداتۋراسىن ۇسىندى.
«1997 جىلدان باستاپ 2007 جىلعا دەيىن «تسەسنا» كورپوراتسياسى» اق باسقارماسىنىڭ توراعاسى, 2007 جىلدىڭ ناۋرىزىنان «تسەسنا» كورپوراتسياسى» اق ديرەكتورلار كەڭەسىنىڭ توراعاسى قىزمەتتەرىن اتقارىپ كەلە جاتقان سەرىك رىسكەلدىۇلى ءماسليحات دەپۋتاتى, پارتيا مۇشەسى رەتىندە دە قوعامدىق, الەۋمەتتىك جۇمىستار مەن قايىرىمدىلىق شارالارىنا بەلسەنە ارالاسىپ ءجۇر» دەدى دەپۋتات.
تىڭ ولكەسىندە دۇنيەگە كەلىپ, وسى ءوڭىردى وركەندەتۋگە ۇلەس قوسقان س.جاقسىبەكوۆ ءار جىلداردا قازاقستان كپ شورتاندى اۋداندىق كوميتەتى ۇيىمداستىرۋ ءبولىمىنىڭ ينسترۋكتورى, اۋداندىق مامانداندىرىلعان شارۋاشىلىق بىرلەستىگى پارتيا كوميتەتىنىڭ حاتشىسى, تسەلينوگراد قالالىق اتقارۋ كوميتەتى توراعاسىنىڭ كومەكشىسى, تسەلينوگراد قالالىق اكىمشىلىگى باسشىسىنىڭ كەڭەسشى-كونسۋلتانتى, قر قم اقمولا وبلىسى بويىنشا كەدەندىك باسقارمانىڭ باستىعى قىزمەتتەرىن اتقاردى. ونىڭ ءومىر جولى مەن ادامي قاسيەتتەرى, وسكەن ورتاسى تۋرالى اڭگىمەلەگەن دەپۋتاتتار ق.قۇلمۇقانوۆ پەن ز.شيبكەنوۆ تە ارىپتەستەرىن وسى ۇمىتكەردى قولداۋعا شاقىردى.
وسىلايشا, قالالىق ءماسليحاتتىڭ دەپۋتاتتارى سەرىك جاقسىبەكوۆتى قازاقستان رەسپۋبليكاسى پارلامەنتى سەناتىنىڭ دەپۋتاتتىعىنا ۇمىتكەر رەتىندە تىركەۋدى ءبىراۋىزدان ماقۇلدادى.
گۇلبارشىن وكەشقىزى
