ەلورداداعى Smart City جوباسى قالا تۇرعىندارىنا قولايلى ورتا قالىپتاستىرۋمەن بىرگە ولاردىڭ قاۋىپسىزدىگىنە دە دەن قويادى. قاۋىپسىزدىك ساقتاۋ جۇيەسىن تسيفرلاندىرۋ قىلمىستىڭ سانىن ازايتىپ, ەلوردالىقتاردىڭ الاڭسىز ءومىر سۇرۋىنە جول اشتى.
ماسەلەن, بىرەر جىل بۇرىن ەلوردادا «سەرگەك» جۇيەسى ىسكە قوسىلدى. قازىرگى تاڭدا قالا كوشەلەرىندە 13 مىڭ «سەرگەك» كامەراسى ورناتىلعان. مۇنداعى 6 مىڭ كامەرا اۆتوماتتى تۇردە جول ءجۇرۋ ەرەجەسىن بۇزۋ فاكتىسىن تىركەيدى. ال قالعان 4800 كامەرا كوشە قيىلىسىندا ورنالاسقان.
– «سەرگەك» كامەرالارىن ورناتۋ قالالىق پوليتسيا دەپارتامەنتى مەن اۋدان اكىمدىكتەرىنىڭ ءوتىنىشى نەگىزىندە جۇرگىزىلەدى. جوبا ىسكە اسىرىلا باستاعان ساتتەن بەرى قالا كوشەلەرىندەگى جول-كولىك وقيعاسىنىڭ 42 پايىزعا تومەندەۋى بايقالدى. وعان قوسا بەينەباقىلاۋ كامەرالارى قۇقىق قورعاۋ ورگاندارىنىڭ كەزەكشى بولىمدەرىنە قوعامدىق ورىندارداعى ناقتى جاعداي تۋرالى تولىق اقپاراتپەن قامتاماسىز ەتۋگە قول جەتكىزۋىنە مۇمكىندىك بەرىپ وتىر. وعان قوسا جوبا اۆتورلارى فوتوبەينەتىركەۋ مەن بەينەساراپتاۋ فۋنكتسياسى بار جۇيەنى دە قولدانىسقا ەنگىزدى. بۇل جۇيە قالاداعى قوعامدىق قاۋىپسىزدىكتى ساقتاۋ, قىلمىستىڭ الدىن الۋدى وڭتايلاندىرۋعا باعىتتالعان, – دەيدى نۇر-سۇلتان قالاسىنىڭ تسيفرلاندىرۋ جانە مەملەكەتتىك قىزمەتتەر باسقارما باسشىسىنىڭ ورىنباسارى امانجول ەستەكوۆ.
ءوز سوزىندە باسقارما باسشىسىنىڭ ورىنباسارى امانجول ەستەكوۆ «سەرگەك» جۇيەسى ءتارتىپ بۇزۋشىلىقتى انىقتاۋمەن بىرگە ولاردى تالداۋعا دا قاۋقارلى ەكەنىن ايتادى. ماسەلەن, جول پوليتسياسىنىڭ قىزمەتكەرلەرى قولدارىنداعى پلانشەتتەرىنە «سەرگەك» ءموبيلدى قوسىمشاسىن ورناتىپ, ءتارتىپ بۇزعان جۇرگىزۋشىلەر تۋرالى مالىمەتتەردى الىپ وتىرادى.
