«سەرپەر» حالىق اسپاپتار وركەسترلەرىنىڭ ءىV حالىقارالىق مۋزىكالىق فەستيۆالى استانانى ءۇش كۇن بويى دۇبىرگە بولەۋدە. ۇلتتىق ونەر سالتاناتىنا قاتىسىپ وتىرعان ۇجىمدار اشىق اسپان استىندا كونتسەرت بەرىپ, اتىراۋدان التايعا دەيىن سوزىلىپ جاتقان دالامىزدىڭ باي مۋزىكالىق مۇراسىن جاڭعىرتۋدا. فەستيۆال كورەرمەندەرى وزگە جۇرتتاردىڭ مۋزىكاسىنا دا قانىعۋدا. قالانىڭ ورتالىق الاڭىندا اشىلعان وركەسترلەردىڭ مەرەكەسى ەلوردانىڭ «ستۋدەنتتىك» جانە «اراي» ساياباقتارىندا جالعاسىپ, بۇگىن قالالىق الاڭدا شىمىلدىعىن جابادى.
فەستيۆالدى استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى قۇرمانعازىنىڭ «سارىارقا» كۇيىمەن اشتى. جالپى سول كۇنگى ەلوردالىق ونەر ۇجىمى قىرىققا تارتا شىعارمانى ورىندادى. ولاردىڭ اراسىندا قۇرمانعازىدان باسقا تاتتىمبەت, دينا, ىقىلاس, توقا, دايراباي, الشەكەي, وسكەنباي, داۋلەتكەرەي سىندى كۇي ونەرىنىڭ ءبىر-ءبىر تۇلعالارىنىڭ تۋىندىلارى بولدى. سونداي-اق, وركەستر حالىق كومپوزيتورلارىنىڭ, كەڭەس زامانىندا قازاق مۋزىكاسىن ورگە شىعارعان ونەر يەلەرىنىڭ مۋزىكاسىن شالقىتتى.
استانالىق وركەسترگە وسى ۇجىمنىڭ باس ديريجەرى-كوركەمدىك جەتەكشىسى, قر ەڭبەك سىڭىرگەن قايراتكەرى, پروفەسسور ايتقالي جايىموۆ پەن ەكىنشى ديريجەر قر مادەنيەت قايراتكەرى نۇرلان بەكەنوۆتەن باسقا وسى فەستيۆال قوناقتارى دارەجەسىندەگى ديريجەرلەر باعىت بەردى.
فەستيۆال كورەرمەندەرىنە اتالمىش وركەستردىڭ سۇيەمەلدەۋىمەن مايتالمان انشىلەر, قر حالىق ءارتىسى نۇرعالي ءنۇسىپجانوۆ پەن كسرو حالىق ءارتىسى, قازاق بۇلبۇلى بيبىگۇل تولەگەنوۆانىڭ ءان سالۋى ۇلكەن سىي بولدى. العاشقىسى حالىق ءانى «القوڭىر» مەن كومپوزيتور نۇرعيسا تىلەنديەۆتىڭ «الاتاۋ» اندەرىنە سالسا, ەكىنشىسى لاتيف ءحاميديدىڭ «بۇلبۇل» ءانىڭ سىزىلتتى. سونداي-اق, بەلگىلى ءانشى ايگۇل قوسانوۆا دا اسەت بەيسەۋوۆتىڭ «مارالدىم» انىمەن جينالعانداردىڭ كوڭىلىڭ كوتەردى.
ال فەستيۆالگە ەلوردالىق وركەسترمەن قوسا تۇرماعامبەت اتىنداعى حالىق اسپاپتار وركەسترى (قىزىلوردا قالاسى), كەنجەبەك كۇمىسبەكوۆ اتىنداعى اقمولا وبلىستىق فيلارمونياسىنىڭ قازاق حالىق اسپاپتار وركەسترى (كوكشەتاۋ), ابىل تاراقۇلى اتىنداعى قازاق حالىق اسپاپتار وركەسترى (اقتاۋ) جانە بايجىگىت اتىنداعى حالىق اسپاپتار وركەسترى (وسكەمەن) قاتىسۋدا. الىستان ات ارىتىپ كەلگەن باشقۇرتستان رەسپۋبليكاسىنىڭ ۇلتتىق حالىق اسپاپتار وركەسترى مەن ومبى قالاسىنىڭ «لاد» ورىس كامەرالىق وركەسترى دە ونەر كورسەتۋدە.
وسى ۇجىمداردىڭ بارلىعى, ياعني جەتى وركەستردىڭ دە 300-جۋىق مۋزىكانتى بۇگىن وتەتىن فەستيۆالدىڭ گالا-كونتسەرتىندە الىپ انسامبلگە بىرىگىپ, «سەرپەردەن» «سارىارقاعا» دەيىنگى حالقىمىزدىڭ ەڭ ۇزدىك كۇيلەرىن ورىندايدى.
– بيىلعى فەستيۆالدىڭ ەرەكشىلىگى قاتىسۋشىلاردىڭ قۇرامىنا جاڭا وركەسترلەردىڭ قوسىلۋى, ياعني بۇرىن اتالمىش شاراعا قاتىسپاعان ۇجىمداردىڭ استاناعا كەلۋىندە بولىپ وتىر. سونىڭ ىشىندە رەسەيلىك قوناقتار دا بار. ماسەلەن, باشكۇرت قۋرايشىلارىنىڭ ونەرى بارشانى قىزىقتىردى دەپ ويلايمىن. بۇرىن ورىندالماي جۇرگەن بايسەركە, الشەكەي بابالارىمىزدىڭ تىڭ كۇيلەرى دە وسى فەستيۆال باعدارلاماسىنا كىردى. ال فەستيۆالدىڭ باستى ماقساتى – ۇلتتىق مۋزىكانىڭ اياسىن كەڭەيتىپ, ناسيحاتىن ارتتىرۋ. باسقاشا ايتقاندا, حالىقتىڭ قۇلاعىنا جەتكىزۋ. بۇل فەستيۆال جەر-جەردەگى مۋزىكانت, ديريجەرلەرگە دە تاجىريبە الماسۋعا جول اشىپ وتىر – دەيدى ايتقالي جايىموۆ.
امانعالي قالجانوۆ
