ەلوردا كۇنى استانالىقتار ۇرمەلى اسپاپتار وركەسترلەرىنىڭ «استانا سامالى» حالىقارالىق فەستيۆالىن تاماشالادى. قالا اكىمدىگى ۇيىمداستىرعان شارادا مەملەكەتتىك اكادەميالىق فيلارمونيا, قر ۇلتتىق ۇلانى, شىعىس قازاقستان وبلىستىق فيلارمونياسى, تاگيلدىڭ «تاگيل-BEND» جانە رەسەيدىڭ ۇرمەلى اسپاپتار وركەسترلەرى ءوز ونەرلەرىن ورتاعا سالادى.
«استانا سامالى» فەستيۆالى جىل سايىن وتەتىن ءداستۇرلى شاراعا اينالعان. بيىلعى كەشتە وتاندىق جانە شەتەلدىك ونەر ۇجىمدارى قىزىقتى باعدارلامالارىن ۇسىندى. ياعني, فەستيۆال ماقساتى – حالىقتىڭ مەرەكەلىك كوڭىل-كۇيىن كوتەرۋدى كوزدەدى.
فەستيۆالدىڭ ارنايى قوناعى – 1976 جىلى ەجەلگى جالاۋمەن ويناۋ ونەرىن جانداندىرۋ ماقساتىندا قۇرىلعان Storici Sbandieratori delle Contrade di Cori فولكلورلىق توبى. بۇل توپ قايتا ورلەۋ ءداۋىرىنىڭ كەرەمەت كوستيۋمدەرىن كيىپ, وتكەن زاماننىڭ عاجايىپ جاي-كۇيىن كوز الدىمىزعا اكەلدى. ترۋبانىڭ تازا دىبىسى, داۋىلپازداردىڭ ىرعاقتى دابىلى, ورىنداۋشىلىقتىڭ ويناقىلىعى كورەرمەندەردى تاڭ قالدىرىپ, شاتتىققا بولەدى.
قالالىق الاڭدا باستالعان مەرەكەلىك شارا «بايتەرەك» مونۋمەنتى الدىندا بەند-مارافونعا ۇلاستى. شەرۋدىڭ سوڭعى كۇنىندە ونەرپازدار اسكەري-تاريحي مۋزەيدەن باستاپ, رەسپۋبليكا داڭعىلىنىڭ بويىمەن «جاستار» سارايىنا دەيىن ءجۇرىپ ءوتتى.
– «استانا سامالى» – بۇل مۋزىكالىق شوۋ. الەمنىڭ كوپتەگەن ەلدەرىندەگى ۇرمەلى اسپاپتار شەبەرلەرىنىڭ باسىن ءبىر ساحنا اياسىنا جياتىن جىل سايىنعى ءداستۇرلى شارا. ءداستۇرلى بولاتىن سەبەبى, بۇل فەستيۆال وسىمەن بىرنەشە مارتە ۇيىمداستىرىلىپ وتىر. بيىل حالىقارالىق شاراعا بىرنەشە ۇرمەلى اسپاپتار وركەسترلەرىنىڭ ۇجىمدارى كەلدى. ءار ءتۇرلى اسپاپتا شەبەر وينايتىن ونەر ۇجىمدارىنىڭ كونتسەرتىنە جينالعان قاۋىمنىڭ كوڭىلىنەن شىقتى, – دەيدى ۇيىمداستىرۋشىلار.
گۇلميرا شارحانقىزى
