استانادا التى كۇن بويى دۇرىلدەگەن «شابىت» شىعارماشىل جاستاردىڭ XIX حالىقارالىق فەستيۆالىنىڭ قورىتىندىسى شىعارىلدى. الەمدىك دەڭگەيدەگى شاراعا قاتىسۋعا قازاقستان, ازەربايجان, قىتاي, قىرعىزستان, رەسەي, وزبەكستان جانە ۋكراينا ەلدەرىنەن كەلگەن 644 ۇمىتكەردىڭ اراسىندا دارا شىققان جاستاردى ماراپاتتاۋ ءراسىمى بەيبىتشىلىك جانە كەلىسىم سارايىندا ءوتتى.
باس جۇلدە – قازاقستان پرەزيدەنتىنىڭ كۋبوگى «كولەڭكەسىز ادام» تولعاۋى مەن «قۇلان اۋعان» ولەڭىن «ۇزدىك ادەبي شىعارما» اتالىمىنا ۇسىنىپ, توپ جارعان استانالىق اقىن ەربول الشىنبايعا بۇيىردى. كۋبوكتى اقىنعا استانا قالاسى اكىمىنىڭ ورىنباسارى ەرمەك امانشاەۆ تاپسىردى.
– «شابىت» فەستيۆالى مارەسىنە جەتتى. بۇل فەستيۆالدىڭ ەڭ جوعارى, ەڭ باعالى سىيلىعى – ەلباسىمىزدىڭ كۋبوگى. جىل سايىن وسى جۇلدە يەگەرىن انىقتاۋ بارىسىندا ءبىز كوپ تولعانىپ, قازىلار القاسىنىڭ مۇشەلەرىمەن كەڭ سۇحبات قۇرامىز. سوندا ءار اتالىمنان كەم دەگەندە ءبىر ۇمىتكەر ۇسىنىلادى. قورىتىندىسىندا ءوزىنىڭ بار شىعارماشىلىق قابىلەتىن جارقىراتا اشا بىلگەن جاسقا بەرەمىز. استانا اكىمى اسەت يسەكەشەۆتىڭ اتىنان جاستارعا لايىق باعاسىن بەرگەن قازىلار القاسىنىڭ بارلىق مۇشەلەرىنە ۇلكەن العىسىمدى بىلدىرەمىن, – دەدى اكىمنىڭ ورىنباسارى.
بۇل جولى دارىندى جاستار التى اتالىم بويىنشا سايىسقا ءتۇستى. «كلاسسيكالىق مۋزىكا» اتالىمى ءىشىنارا ءۇش تارماققا ءبولىندى. سونىڭ العاشقىسى – اعاشتان جاسالعان ۇرمەلى اسپاپتاردا شىعارمالاردى ورىنداۋدا تولعاناي داۋلەت ۇزدىك اتاندى. مىس ۇرمەلى اسپاپتار مەن سوقپالى اسپاپ بويىنشا ءىلياس ابدىراشەۆ دارالاندى. كلاسسيكالىق اسپاپتى انسامبل تارماعىندا اقديدار توقتاعان مەن دانا بۋكۋنەۆانىڭ دۋەتى وزىپ شىقتى.
«بەينەلەۋ ونەرى» اتالىمىندا اسقار نۇربولات باس جۇلدە الدى. سونداي-اق, گرافيكا جانە كوركەمسۋرەت تارماقشالارىندا بىرقاتار سۋرەتشى ديپلومانت اتاندى.
«حالىق مۋزىكاسى» اتالىمىنداعى باس جۇلدە مۋزىكالىق اسپاپتارعا سايكەس ءۇش قاتىسۋشىعا تابىستالدى. پريما قوبىز بەن قوبىزدى اياتتولا تۇرعانوۆ بارىنەن شەبەر مەڭگەردى دەپ شەشىلدى. دارىن قۇدايبەرگەنوۆ دومبىرانىڭ قۇلاعىندا وينايتىندىعىن تانىتتى. ال پريما دومبىرا, شەرتەر جانە باس-شەرتەر تارماقشاسىندا باۋىرجان مۇقاجانوۆ قارسىلاستارىنان قارا ءۇزدىردى.
«ەسترادالىق ۆوكال» اتالىمىندا قىتايدان كەلگەن قانداسىمىز قايسار دالايۇلى گران-پري يەگەرى اتاندى. ال «حورەوگرافيا» اتالىمىندا الماتى وبلىسىنىڭ اتىنان فەستيۆالگە قاتىسقان «التىناي» بي ءانسامبلى توپ جاردى.
– ازات استانانىڭ اسپانىنىڭ استىندا ون توعىزىنشى رەت «شابىت» فەستيۆالىنىڭ شالقار تويى ءوتتى. بۇل ەلباسى نۇرسۇلتان نازارباەۆتىڭ ارقاسىندا ىرگەتاسىن بەرىك قالاعان قازاق ەلىنىڭ جاس تۇلپارلارى مەن جاس سۇڭقارلارىنىڭ تويى بولدى. جۇزدەن جۇيرىك, مىڭنان تۇلپار شىققان ونەرىمىزدىڭ بولاشاعى, حالقىمىزدىڭ كەلەشەگى – جاستار ءدۇبىرىن تەك قازاق ەلى عانا ەمەس, بۇكىل كورشى ەلدەر سەزدى. سوندىقتان «شابىتتىڭ» تويى – حالىقتىڭ تويى دەگىم كەلەدى. بۇل تويدى جىل سايىن وتكىزىپ كەلە جاتقان استانا اكىمدىگىنە, ونى باسقارىپ وتىرعان ازاماتتارعا جاستاردىڭ اتىنان, قازىلار القاسىنىڭ اتىنان كوپتەن-كوپ راقمەت ايتقىم كەلەدى. ويتكەنى بيىلعى تويدىڭ باسقا جىلدارداعى تويلاردان ءجونى بولەك. بيىل فەستيۆال تاۋەلسىزدىگىمىزدىڭ 25 جىلدىعى اياسىندا ۇيىمداستىرىلدى. سوندىقتان بيىلعى «شابىتتىڭ» شارىقتاۋى دا, بيىكتەۋى دە ەرەكشە بولدى. ماڭگىلىك ەل بولۋىمىزدىڭ تىرەگى بۇگىنگى جاستاردىڭ قولىندا. حالىقتىڭ ءال-قۋاتى جىل سايىن ارتىپ كەلەدى. الايدا رۋحانياتى, ونەرى جۇتاڭ ەل العا باسپايدى. ال «شابىت» ءتورت قۇبىلاسى تۇگەل ونەرلى جاستارىمىزدىڭ قاناتىن اسپانعا سامعاتىپ, شارىقتاتتى. ەلباسى ۇلىتاۋدىڭ تورىنەن سويلەگەن سوزىندە ءبىزدىڭ ارعى-بەرگى ونەرىمىزدىڭ تاريحى تۋرالى تولعانا وتىرىپ, جاستارعا سەنىم ارتتى. سول جاستارعا دەگەن سەنىم اقتالىپ وتىرعانداي, – دەدى بۇل جولى قازىلار القاسىنا توراعالىق ەتكەن بەلگىلى اقىن, مەملەكەتتىك سىيلىقتىڭ يەگەرى نەسىپبەك ايتۇلى.
فەستيۆالدىڭ جابىلۋىنا بايلانىستى وتكەن گالا-كونتسەرتتە ونىڭ جەڭىمپازدارىمەن قاتار, بەيبىت قۇشقاليەۆ, ادەمي سىندى بەلگىلى ەسترادا انشىلەرى مەن «ايۋمي» توبى جينالعاندارعا كوتەرىڭكى كوڭىل كۇي سىيلادى.
امانعالي قالجانوۆ
