وتكەن 2018 جىلدىڭ 12 قاراشاسى كۇنى قازاقستاندىق ءانشى ديماش قۇدايبەرگەن رەسەيدىڭ نتۆ «ورتالىق تەلەۆيدەنيەسىندە» كومپوزيتور يگور كرۋتويدىڭ اقىن ميحايل گۋتسەريەۆتىڭ سوزىنە جازىلعان «شارشاعان اققۋلاردىڭ ماحابباتى» («ليۋبوۆ ۋستاۆشيح لەبەدەي») دەگەن ءانىن ورىنداپ, ءوزىنىڭ ۆوكال الەمىندە تاعى ءبىر بيىك بەلەسكە كوتەرىلگەنىن بايقاتتى. ءبىر تاۋلىكتىڭ ىشىندە ونىڭ كونتسەرتىن جاھان جۇرتشىلىعىنىڭ وننان ءبىر بولىگى كورىپ شىقتى.
بۇدان 4 جىل بۇرىن ومىرگە كەلگەن بۇل ءان بەرىلە ءسۇيۋشىلىك پەن شىنايى سەزىمدەر تۋرالى ادەمى وقيعانى باياندايتىن وزىندىك ءبىر ءتامسىل سياقتى. ونى سول ۋاقىتتا ءبىرىنشى بولىپ فرانتسۋز ءتىلدى, ۆاللون-يتاليان تەكتى كانادالىق ءانشى ايەل لارا فابيان (شىن فاميلياسى – كوككەرت) ماسكەۋدەگى مەملەكەتتىك كرەمل سارايى مەن «وليمپيسكي» سپورت كەشەنىندە ورىس تىلىندە شىرقادى. ول سوندا وسىنداي عاجايىپ دۇنيە تۋدىرعان اۆتورلارعا ءوزىنىڭ العىسىن جەتكىزگەن. سول ەكى ارالىقتا بۇل ءان-وپەرانى اتقارۋعا ەشكىمنىڭ باتىلدىعى بارا قويمادى. ءبىر ايتا كەتەتىن جايت: ديماش 5 وكتاۆالى, 4 نوتالى جانە 1 پولۋتوندى ءانشى, الەمدەگى ەڭ تاڭداۋلى دەگەن 5-6 التى ۆوكال قايراتكەرىنىڭ ءبىرى بولىپ تابىلادى. ول وسى ءاندى ورىنداۋى ارقىلى ءوزىن عانا ەمەس, بۇعان دەيىن دە اتاقتارى جەر جارىپ تۇرعان كومپوزيتور يگور كرۋتوي مەن اقىن ميحايل گۋتسەريەۆتى تاعى ءبىر بەلەسكە كوتەرىپ تاستادى. «شارشاعان اققۋلاردىڭ ماحابباتىن» «I am a singer» كونكۋرسىندا ورىنداعان قازاق ۇلانىنىڭ الەمدىك داڭققا يە بولۋىنا جول اشىپ بەردى.
ءبىزدىڭ بۇل تۋىندىعا ايرىقشا نازار اۋدارىپ وتىرۋىمىزدىڭ تاعى ءبىر سەبەبى, ءاننىڭ ءماتىنىن جازعان اۆتور – ميحايل گۋتسەريەۆ اقمولانىڭ تۋماسى بولاتىن. 1944 جىلى اقپان ايىندا قازاقستانعا جەر اۋدارىلعان ينگۋشتاردىڭ ۇرپاعى بولىپ تابىلاتىن ول بۇل قالادا 1958 جىلعى 9 ناۋرىزدا دۇنيەگە كەلگەن. ءوزى تەكتى جەردەن شىققان ەدى. 1882 جىلعى اتاسى سااد گۋتسەريەۆ 1908 جىلدان باتىس گرۋزيا مەن سۋحۋميدە پريستاۆ بولىپ قىزمەت ەتكەن, كەيىن ۆلاديكاۆكازدا بىرنەشە شاراپ زاۋىتىنىڭ قوجايىنى بولعان. ول ارقا توسىنە كەلىپ قونىستانعاسىن 4 جىلدان كەيىن, 1948 جىلى قايتىس بولىپ, اقمولاداعى «قاراوتكەل» زيراتىندا ماڭگىگە دامىل تاپقان. ونىڭ ۇرپاقتارى وسى قورىمدى قورشاۋعا دا ۇلكەن ۇلەس قوستى.
ميحايلدىڭ 1920 جىلعى اكەسى سافاربەك گۋتسەريەۆ 1941 جىلى سۆەردلوۆسكىدەگى زاڭ ينستيتۋتىن بىتىرگەن. سودان باستاپ پروكۋراتۋرا ورگاندارىندا قىزمەت ىستەگەن. 23 جاسىندا اۋدان پروكۋرورى بولىپ تاعايىندالعان. ال قازاقستانعا كەلگەننەن كەيىن اقمولا وبلىستىق ىشكى ىستەر باسقارماسىندا ايرىقشا ماڭىزدى ىستەر بويىنشا تەرگەۋشى بولىپ قىزمەتكە تۇرادى. بىراق 1948 جىلى جازىقسىز جالامەن 25 جىلعا سوتتالىپ كەتەدى. تەك ستالين ولگەسىن ءبىر جىلدان كەيىن, 1954 جىلى تۇرمەدەن بوساپ شىعادى, 1955 جىلى تولىق اقتالىپ, پارتيا قاتارىنا قايتا قابىلدانادى. بۇدان كەيىن ول وبلىستىق دەڭگەيدەگى كوپتەگەن مەكەمەلەرگە باسشىلىق جاسايدى, «تسەلينستروي» باسقارماسىن باسقارادى, سمۋ-دىڭ ديرەكتورى بولادى, سونداي-اق بىرنەشە ءوندىرىس ورنى مەن ساۋدا مەكەمەلەرىنىڭ تىزگىنىن ۇستايدى. وسى ەڭبەكتەرى ءۇشىن 11 مەملەكەتتىك ماراپاتقا يە بولادى.
مۇنىڭ ءبارىن تاپتىشتەپ ايتىپ وتىرعانىمىز, ميحايلدىڭ اكەسى اقمولا وبلىسىنىڭ حالىق شارۋشىلىعىنا دا ايتارلىقتاي زور ەڭبەك ءسىڭىردى. سودان كەيىن, 70-ءشى جىلدارى گۋتسەريەۆتەر وتباسى شەشەن-ينگۋش اۆتونوميالى رەسپۋبليكاسىنا قونىس اۋداردى. ميحايل گروزنىي قالاسىندا ورتا مەكتەپتى بىتىرگەسىن, 1975 جىلى ەڭبەك جولىن «گروزنەنسكي گورپلودوۆوششتورگ» مەكەمەسىندە جۇكشى بولىپ باستايدى. ال 1976 جىلدان جامبىلداعى حالىق كوركەم ونەرى كاسىپشىلىگى فابريكاسىنا جۇمىسشى بولىپ ورنالاسادى. 1982 جىلدان سول فابريكا تىگىن تسەحىنىڭ شەبەرى بولىپ تاعايىندالادى. وسى جىلدارى ول جامبىل جەڭىل جانە ازىق-تۇلىك ونەركاسىبى تەحنولوگيا ينستيتۋتىنىڭ كەشكى بولىمىندە وقىپ, جوعارى ءبىلىم الىپ شىعادى. سودان كەيىن گروزنىيعا ورالىپ, ءوزىنىڭ قازىرگە دەيىنگى قىزمەت ساتىسىنان وتەدى.
بۇگىندە ميحايل گۋتسەريەۆ رەسەي عانا ەمەس, بۇكىل الەمنىڭ ءان اۋەنى جۇرتشىلىعى مويىنداعان اقىننىڭ قاتارىنان تابىلادى. رەسەي جازۋشىلار وداعىنىڭ مۇشەسى. ەكونوميكا عىلىمدارىنىڭ دوكتورى. ونىڭ قالامىنان تۋعان ولەڭ شۋماقتارى كوپتەگەن كومپوزيتورلاردىڭ اندەرىنە ارقاۋ بولعان. ولاردى گ.لەپس, ا.پۋگاچەۆا, ف.كيركوروۆ, ن.باسكوۆ, ا.بۋينوۆ, م.شارافۋتدينوۆ, ا.سەمەنوۆيچ, ا.ۆايكۋلە, ۆالەريا, ت. پوۆالي,
پ.گاگارينا, ا.تسوي سەكىلدى كوپتەگەن انشىلەر ورىنداپ ءجۇر. ميحايل وسى ءان الەمىنە ەتەنە ارالاسقان 2013 جىلدان بەرى تالاي كونكۋرستاردىڭ جەڭىمپازى جانە جۇلدەگەرى بولىپ كەلەدى. ولاردى تۇگەندەپ, ايتىپ شىعۋدىڭ ءوزى مۇمكىن ەمەس. ونىڭ جازعان كەمىندە 10 ءماتىنى 2013 جىلدان بەرى جىل سايىن ۇزدىكتەر اتالىمىنان تابىلىپ جاتىر. مىسالى, 2019 جىلدىڭ وزىندە 12 ءماتىنى «جىلدىڭ ۇزدىگى» اتاندى. بىرنەشە ءانى «التىن گرامموفون» بايگەسىنىڭ جۇلدەگەرى بولدى.
بىراق ميحايل گۋتسەريەۆتىڭ نەگىزگى كاسىپشىلىگى اقىندىق ەمەس, ول – بۇگىندە بۇكىل الەمگە تانىمال بيزنەسمەن, ميللياردەر, ونىڭ سافمار دەگەن ونەركاسىپتىك-قارجى توبى قۇرامىنا 20-عا جۋىق ءىرى كومپانيا كىرەدى. سولاردىڭ ءبىرى – بريتانيالىق «GCM Global Enerji Inc» كومپانياسى قازاقستان مەن ازەربايجاندا مۇناي وندىرەدى. كاسىپكەر 2014 جىلى ءوزى تۋعان قالا – اقمولادا ءوزىنىڭ اتاسى قۇرمەتىنە «Saad Mariott» دەپ اتالاتىن وتەل تۇرعىزدى. وعان كەزىندە «قازاقستان تەرريتورياسىنداعى ءدال قازىرگى تاڭداعى ەڭ ۇزدىك مەيمانحانالاردىڭ ءبىرى» دەگەن باعا بەرىلگەن ەكەن.
اقىندىقتىڭ دا, ونەردىڭ دە, كاسىپكەرلىكتىڭ دە كوگىندە جۇلدىز بولىپ جارقىرايتىن ميحايل سافاربەكۇلى ءوزىنىڭ كومپانياسى اتىن «سافمار» دەپ بەكەر قويماپتى. ول اكەسى سافاربەك پەن اناسى مارەم ەكەۋى اتىنىڭ باستاپقى بۋىندارىنان الىنىپتى. اتا-اناسىن ءومىر بويى قۇرمەتتەپ كەلە جاتقان اقىن-بيزنەسمەننىڭ ادام جانىن تەبىرەنتەرلىك ولەڭ ورىمدەرىن جازاتىنى دا سوندىقتان.
قازىر ول – ۇلىبريتانيا ازاماتى, لوندون قالاسىندا تۇرادى. ايتۋىنا قاراعاندا, قازاقستاندى ءوزىنىڭ وتانى رەتىندە جاقسى كورەدى, قادىرلەيدى.
ەجەلگى اقمولا تۇرعىندارى ءوز ارالارىنان وسىنداي بىرەگەيتۇلعانىڭ شىققانىن بىلۋگە ءتيىس دەگەن ويمەن وسى ماقالانى جازىپ وتىرمىز.
راسۋل ايتقوجا
