بالدىرعانداردىڭ ءار جىل سايىن اسىعا كۇتەر مەرەكەسى شىرشاتوي ەكەنى انىق. ال وعان ەلباسىنىڭ ءوزى ارنايى شاقىرىپ جاتسا, ەكى ەسە قۋانىش ەمەس پە؟! كەشە استاناداعى وقۋشىلار سارايىندا بولعان وسىناۋ مەيرامعا باس قالانىڭ ەڭ ۇزدىك بۇلدىرشىندەرى جينالدى.
ولارعا ارنالعان اقجارما تىلەگىن پرەزيدەنت ۆيدەوۇندەۋ ارقىلى جولدادى.
– سەندەردىڭ الاڭسىز ءارى باقىتتى ءومىر سۇرۋلەرىڭ ءۇشىن ءبىز بارلىق جاعدايدى جاساپ كەلەمىز. سوندىقتان ءبارىڭ دە سانالى تاربيەگە, ساپالى ءبىلىم الۋعا ۇمتىلۋلارىڭ كەرەك, – دەدى نۇرسۇلتان نازارباەۆ. سالتاناتتى شاراعا استانا اكىمى باقىت سۇلتانوۆ بارىپ, سيقىرلى ەرتەڭگىلىكتى بالدىرعاندارمەن بىرگە تاماشالادى.
اتالمىش جيىنعا 9 بەن 13 جاس ارالىعىنداعى 200 ەلوردالىق شاكىرت قاتىستى. ولاردىڭ ىشىندە بالالار ءۇيىنىڭ تاربيەلەنۋشىلەرى مەن الەۋمەتتىك تۇرمىسى تومەن وتباسىدان شىققان ۇل-قىزدار دا بار. بالاقايلار بار ونەرلەرىن ورتاعا سالىپ, اياز اتا مەن اقشاقاردىڭ كوڭىلىنەن شىعۋعا تىرىستى. بۇعان قوسا, وقۋشىلار سارايىنىڭ 40-تان اسا شىعارماشىلىق ۇجىمى تەاترلاندىرىلعان شوۋ ۇيىمداستىرىپ, مەيرامنىڭ اجار-كوركىن ودان ءارى اشتى. كەش سوڭىندا ءار بالاعا تاتتىلەر مەن سىيلىق سەرتيفيكاتتارى تابىس ەتىلدى.
