استانا قالاسى دەنساۋلىق ساقتاۋ باسقارماسىنىڭ شاقىرۋىمەن ەلوردانىڭ وقۋ-كلينيكالىق ورتالىعىنا الەمدىك دەڭگەيدەگى دوكتور, سيمۋلياتسيا بويىنشا حالىقارالىق توپتىڭ ۇيلەستىرۋشىسى لوايسا لەۆانو ۋگو كارلوس كەلىپ, ەلىمىزدەگى دارىگەر-نۇسقاۋشىلارعا شەبەرلىك ءدارىسىن وتكىزدى.
بەلگىلى ماماننىڭ نۇسقاۋىمەن اق حالاتتىلار اياق استىنان دەنساۋلىعى ناشارلاعان ادامدارعا شۇعىل كومەك كورسەتۋدىڭ قىر-سىرىنا قانىقتى.
جالپى, ەلىمىزدەگى «سالاماتتى قازاقستان» مەملەكەتتىك باعدارلاماسى بويىنشا دارىگەرلەردىڭ تاجىريبەسىن شىڭداۋ ماقساتىندا ءار وڭىردە سيمۋلياتسيالىق ورتالىقتار قۇرۋ قاراستىرىلعان. استانا قالاسىنداعى مۇنداي ورتالىق جەتى جىلدان بەرى سيمۋلياتسيالىق تەحنولوگيا ارقىلى تالاي ماماندى دايارلاپ شىعاردى.
دوكتور لوايسا كارلوستىڭ شەبەرلىك ءدارىسى بويىنشا دارىگەر-نۇسقاۋشىلار سيمۋلياتسيالىق ورتالىقتار جۇمىسىن ۇيىمداستىرۋ ماسەلەلەرى, تاجىريبەسىن جەتىلدىرۋگە كەلگەن ماماندارعا كۋرس وتكىزۋدىڭ ەرەكشەلىكتەرى, توپپەن جۇمىس ىستەۋدىڭ پسيحولوگيالىق ادىستەرى تۋرالى ءبىرتالاي جايتقا قانىقتى.
قىمبات نۇرعالي
