18 تامىز كۇنى بۇۇ-نىڭ باس حاتشىسى انتونيۋ گۋتەرريش ۋكرايناعا كەلدى. وسى ساپاردا باس حاتشىنىڭ قاراپايىمدىلىعى جۇرتتى ءسۇيىندىردى. ۇشاقتان تۇسكەننەن كەيىن چەمودانىن ءوزى سۇيرەپ كەلە جاتقان فوتوسۋرەتى الەۋمەتتىك جەلىنى ءاپ-ساتتە شارلاپ كەتتى. بۇل فوتوسۋرەت بىزگە دە ءبىراز وي سالدى.
ارينە قاراپايىمدىلىققا ەتى ۇيرەنگەن ەۋروپا ەلدەرىنىڭ ازاماتتارىنا مۇنىڭ تۇك تە تاڭقالارلىعى جوق بولعانىمەن, قالاقتىڭ باسىنداي مانساپقا قولى جەتسە, كەردەڭدەپ جۇرە الماي قالاتىن ءبىزدىڭ ەلدىڭ شەن-شەكپەندىلەرىمەن سالىستىرعاندا, بۇل شىنىمەن دە جان سۇيىنەتىن جاعداي. وتكەندە ۇلىبريتانيانىڭ پرەمەر-مينيسترى بوريس دجونسون دا ۋكرايناعا كەلگەندە زەلەنسكيگە سىيعا تارتۋعا اكەلگەن كىتاپتارىن قولتىعىنا قىسىپ, ءوزى كوتەرىپ ءجۇردى. اياعىندا ادەتتەگى كروسسوۆكا. ءبىر ەلدىڭ بيلەۋشىسىمىن دەپ وقتاۋ جۇتقانداي وجىرايىپ وتىرعان جوق, قاراپايىم. وسىدان بىرەر جىل بۇرىن تاعى دا وسى بوريس دجونسوننىڭ باسىنا توقىما مالاقاي, ۇستىنە ءجونسالداۋ قاپتال شاپان كيىپ دۇكەننەن زات ساتىپ الىپ جۇرگەن ۆيدەوسىن الدەكىمدەر الەۋمەتتىك جەلىگە سالىپ جىبەرگەن بولاتىن. سول ۆيدەونى كورگەن الەم جۇرتشىلىعى پرەمەر-ءمينيستردىڭ قاراپايىمدىلىعىنا ايرىقشا ءتانتى بولعان-تۇعىن.
ال بىزدە جاعداي مۇلدە كەرىسىنشە. «ۇلىق بولساڭ كىشىك بول», «ماۋەلى اعاش ءيىلىپ تۇرادى» دەپ اتام قازاق اۋەلدە-اق ايتقانىمەن, بۇل كۇندە ونى ەسكەرەتىن ەشكىم جوق. كىسىنى كيىمىنە, تۇلعانى ۇسقىنىنا قاراپ سىيلايتىن بولدىق. سوسىن دا ءبىزدىڭ ازاماتتار جۇمساق ورىندىققا جايعاسىپ, ءبىر مانساپتىڭ باسىن ۇستاسا, كەرديەدى دە قالادى. سول كۇننەن باستاپ ونى قاراپايىم ورىنداردا كورۋ دە قيىن. كيىمدى قىرلاپ كيىپ, ساعاتتى ساندەپ سالىپ, سىرتقى «ايباتىن» اسىرۋعا بارىن سالادى دا, قاراپايىم حالىق جۇرەتىن جەرلەرگە مۇلدە باسپاي كەتەدى. ءوز باسىم استانادا جۇرگەن 5 جىلدان بەرى بىردە-ءبىر ءىرى شەنەۋنىكتىڭ شانحاي, شارىن, ورتالىق بازار سىندى حالىق كوپ باراتىن ورىنداردا جۇرگەنىن كورگەن ەمەسپىن. مۇمكىن ولار جوعارى جالاقى العان سوڭ, ونداي ارزان بازارعا بارعاننان ارلاناتىن دا شىعار, بىراق ەلدىڭ جاعدايىن, بازاردىڭ بەتالىسىن ءبىلۋ ءۇشىن اپتاسىنا بولماسا دا, ايىنا ءبىر بارىپ ارالاپ شىقسا, شەنى تومەندەپ, شەكپەنى شەشىلىپ قالمايدى عوي.
ءىرى لاۋازىم يەگەرىن دەمالىس كۇندەرى ساياباقتاردا, ايالدامادا, اسحانادا, ويىن الاڭىندا, ءتىپتى قاراپايىم مونشادا دا كەزىكتىرمەيسىڭ. جۋرناليستەر سۇراق قويسا, قانت ەمەس, بال جەيمىن, توساپ جەيمىن دەپ قاراپايىم حالىقتى قايران قالدىرادى, قىسىلماي استا-توك توي جاسايدى, بالا-شاعاسى مالىنىپ جۇرەدى.
قىتايدىڭ پاتشالىق تاريحىندا كاڭ شي دەگەن پاتشا بولعان. سول بيلەۋشى ەلدىڭ جاعدايىن ءبىلۋ ءۇشىن ەشكىمگە ايتپاي, قاراپايىم كيىنىپ ۇنەمى ەل ارالاپ كەتەدى ەكەن. «قىتاي ءتىلىن ۇيرەنەيىك, قىتايمەن تاتۋ بولايىق» دەگەندى ۇدايى دارىپتەيتىن باسشىلار الدىمەن ءوزى نەگە قىتاي بيلەۋشىلەرىنىڭ وسى قاسيەتىنە ەلكىتەمەيدى ەكەن دەگەن ويعا كەلەسىڭ.
ءبىر اۋىز سوزبەن ايتقاندا, ءبىزدىڭ ءبىراز شەنەۋنىك كوبىنە سىقيىپ كيىنىپ الىپ, قىمبات ساعات تاعىپ, جاڭالىقتاردان جىلت-جىلت ەتىپ كورىنگەندى جانى سۇيەتىن سياقتى. جاقىنداۋ ءۇشىن ەڭ بولماسا اندا-ساندا جەرگە ءتۇسىپ تۇرسا ەكەن…
