پارلامەنت ءماجىلىسىنىڭ توراعاسى نۇرلان نىعماتۋلين ەۋرازيالىق ەكونوميكالىق كوميسسياداعى (ەەك) قازاقستاندىق شەنەۋنىكتەر ەۋرازيالىق ەكونوميكالىق وداق (ەەو) اياسىندا وتاندىق كاسىپكەرلەرگە تولىق قولداۋ كورسەتپەي وتىرعانىن سىنعا الدى.
«وكىنىشكە قاراي, ءبىزدىڭ شەنەۋنىكتەر ەەو-نىڭ اياسىندا وتاندىق ءونىم وندىرۋشىلەردىڭ مۇددەسىن تولىق قورعاپ وتىرعان جوق. تيمۋر مۇراتۇلى (ت.سۇلەيمەنوۆ, ۇلتتىق ەكونوميكا ءمينيسترى – اۆت.), ينتەگراتسيالىق ورگاندارداعى ءبىزدىڭ وكىلدەرىمىز ەڭ قاجەتتى ماسەلەلەردى شەشۋگە دە كومەكتەسە المايدى. بۇعان باعاعا قاتىستى الاياقتىقتى, ەركىن باسەكەلەستىككە كەدەرگى كەلتىرەتىن وزگە دە ماسەلەلەردى جاتقىزۋعا بولادى» دەدى ءماجىلىس توراعاسى پارلامەنتتەگى وتىرىستا ۇلتتىق ەكونوميكا مينيسترىنە.
ول قازاقستاندىق تسەمەنتتى رەسەيگە ەكسپورتتاۋعا قاتىستى قيىنشىلىقتاردى مىسالعا كەلتىردى. نۇرلان نىعماتۋليننىڭ ايتۋىنشا, رەسەيلىك ءونىم وندىرۋشىلەر جىل سايىن قازاقستانعا 700 مىڭ تونناعا جۋىق تسەمەنتتى ەشقانداي كەدەرگىسىز ەكسپورتتايدى. ال قازاقستاندىق كاسىپورىندار رەسەيگە تسەمەنت جەتكىزۋدە ايتارلىقتاي قيىنشىلىقتاردى باستان كەشۋدە. «مۇنىڭ ءبارى ينتەگراتسيالىق ورگاندارداعى ءبىزدىڭ وكىلدەرىمىزدىڭ رەسەيدە ەكسپورتتالاتىن تسەمەنتكە جاڭا ستاندارتتاردىڭ جانە ءونىمدى سەرتيفيكاتتاۋعا جاڭا ەرەجەلەردىڭ ەنگىزىلۋىنە دەر كەزىندە كوڭىل بولمەۋىنەن ورىن الىپ وتىر. وسى اقپاراتتى ءبىزدىڭ ءونىم وندىرۋشىلەرگە دەر كەزىندە جەتكىزبەي, ولاردى ىڭعايسىز جاعدايعا قالدىردى. «سوندا ولار نەمەن اينالىسادى؟» دەگەن سۇراق تۋىندايدى. ولار مەملەكەتتىڭ, سونىڭ ىشىندە قاراپايىم سالىق تولەۋشىلەردىڭ, وسى كاسىپكەرلەردىڭ اقشاسىنا كۇن كورىپ وتىرعان جوق پا؟ ەگەر ءبىزدىڭ شەنەۋنىكتەر وسىنداي ۇيقىلى-وياۋ قالپىنان وزگەرمەيتىن بولسا, وتاندىق بيزنەس ايتارلىقتاي شىعىنعا باتادى» دەپ اتاپ ءوتتى توراعا.
تولەن تىلەۋباي
