وتكەن اپتادا ماجىلىستە «حالىق كوممۋنيستەرى» فراكتسياسىنىڭ دەپۋتاتتارى ۇكىمەت نازارىن مامانداندىرىلعان مەكتەپتەردە نەمەسە مۇگەدەك بالالارعا ارنالعان سىنىپتاردا ساباق بەرەتىن مۇعالىمدەر ماسەلەسىنە اۋدارتقىسى كەلدى. بۇل ماسەلەنىڭ حالىق قالاۋلىلارىنىڭ نازارىنا ىلىككەنى ءبىزدى قۋانتتى, ارينە. دەگەنمەن بىرنەشە دەپۋتاتتىڭ اتىنان جولدانعان ساۋالدىڭ قۇرعاق دەرەكتەرمەن, سىلدىر سوزبەن ورنەكتەلگەنىنە قاراپ ءوزىمىز دە ويلانىپ قالدىق.
«نەگىزگى ماسەلە اتالعان ءبىلىم بەرۋ ورىندارىندا وقىتۋ پروتسەسىنە ارنالعان قاجەتتى وقۋ قۇرالدارىنىڭ, سونداي-اق, سپورت جانە ەڭبەك قۇرال-سايماندارىنىڭ, سپورت ساباقتارىنا ارنالعان اشىق الاڭداردىڭ جانە سپورت زالدارىنىڭ جوقتىعى بولىپ تابىلادى. بالالارعا اسا قاجەتتى مۇعالىمدەر, لوگوپەدتەر, دەفەكتولوگتار, پسيحولوگتار مەن باسقا دا ماماندار جەتىسپەيدى. سونىمەن قاتار, مۇگەدەك بالالاردىڭ ۇيىنە بارىپ وقىتاتىن مۇعالىمدەر جول شىعىندارىن ءوز قالتاسىنان تولەۋگە ءماجبۇر. جوعارىدا باياندالعاننىڭ نەگىزىندە دەپۋتاتتىق ساۋالىمىزدى قاراپ, بەلگىلەنگەن زاڭنامالىق مەرزىمدە حات تۇرىندە جاۋاپ بەرۋلەرىڭىزدى سۇرايمىز» دەيدى ماگەررام ماگەرراموۆ باستاعان دەپۋتاتتار ۇكىمەت باسشىسى باقىتجان ساعىنتاەۆقا جولداعان ساۋالىندا. ادەتتە ءار سوزدەرىن سانمەن ءورىپ, ناقتى دايەكتەرمەن دالەلدەپ بارىپ كوتەرەتىن دەپۋتاتتاردىڭ تاراپىنان مۇنداي ساۋالدى كۇتپەگەنىمىز راس. وزدەرى كوتەرىپ وتىرعان ماسەلەنى قۇرعاق, جاداعاي سوزبەن ايتا سالماي, ماسەلەنىڭ ءمانىسىن زەرتتەپ, بايىبىنا بارىپ جەتكىزۋگە بولماس پا ەدى؟ دەپۋتاتتاردىڭ ءبىلىم باسقارماسىنان بۇعان قاتىستى اقپاراتتى تولىق الۋعا مۇمكىندىگى مول ەكەنىن ەسكەرسەك, وزدەرىنىڭ ىزدەنۋگە, جاعدايعا شىن جانى اشۋعا قۇلىقتى بولماي وتىرعانىن عانا اڭعارامىز. دەپۋتاتتار پارلامەنت تورىندە وسىلاي دەگەسىن, بۇل ماسەلەسىن قالا بويىنشا بارىسى قالاي ەكەنىن بىلمەك بولىپ قالالىق ءبىلىم باسقارماسىنا حابارلاستىق.
«بۇگىنگى تاڭدا قالامىزدا – 6 تيفلوپەداگوگ, 4 سۋردوپەداگوگ, 57 دەفەكتولوگ جانە 100-گە جۋىق پسيحولوگ جۇمىس جاسايدى. ءبىلىم مەكەمەلەرىنە 7 پسيحولوگ (6 قازاق تىلىندە 1 ورىس تىلىندە), 10 دەفەكتولوگ (2 قازاق تىلىندە, 8 ورىس تىلىندە), 11 لوگوپەد (4 قازاق تىلىندە 7 ورىس تىلىندە) جانە قازاق تىلىندە وقىتا الاتىن ءبىر سۋردوپەداگوگ پەن ءبىر ورىس تىلىندە بەرەتىن تيفلوپەداگوگ جەتىسپەيدى» دەدى ءبىلىم باسقارماسىنىڭ ءباسپاسوز حاتشىسى جازيرا اسانوۆا.
سونداي دەيمىز-اۋ, دەپۋتاتتار ەڭ بولماسا, وسىنداي اقپاراتتاردى الا وتىرىپ, جۇيەلى ءسوز, دالەلدى ءۋاج ايتۋعا ەرىندى مە ەكەن؟ جوق, الدە بۇل ايتەۋىر «اۋىز جىبىرلاتۋدىڭ» امالى ما؟
گۇلجان راحمان
