استانادا 1 120 مىڭداي حالىق ءومىر سۇرەدى. ولاردىڭ 280 مىڭى, ياعني 25 پايىزى شەتكى ايماقتاردا تۇرىپ جاتىر. وسىعان وراي 2019-2021 جىلدارعا ارنالعان تۇرعىن ءۇي الاپتارىن دامىتۋ باعدارلاماسى جاسالدى.
شەتكى ايماقتاردى دامىتۋ باعدارلاماسى جاسالعاندا وندا, ەڭ الدىمەن جول جانە ينجەنەرلىك ينفراقۇرىلىمنىڭ جوقتىعى, الەۋمەتتىك جانە اكىمشىلىك نىسانداردىڭ تاپشىلىعى, سونداي-اق اتالعان وڭىرلەردى اباتتاندىرۋ ماسەلەسى ەسكەرىلدى. قازىرگى كۇنى ەلوردانىڭ 16 تۇرعىن ءۇي الاپتارىندا جالپى ۇزىندىعى 25 شاقىرىمنان اساتىن 39 كوشە جولدارى جوندەلىپ, جاڭادان سالىندى. پريگورودنىي ەلدى مەكەنىندە جاڭادان 800 ورىندىق مەكتەپ پەن «اسپان» سپورت كەشەنى بوي كوتەردى. ءوندىرىس, يلينكا جانە كوكتال-2 تۇرعىن الاپتارىندا سپورتتىق ويىن الاڭدارى, امبۋلاتوريالىق ورتالىق اشىلدى.
كوكتال-2 ەلدى مەكەنىندە اعىمداعى جىلدىڭ باسىندا اشىلعان مەديتسينالىق ورتالىقتىڭ باس دارىگەرى گۇلنار مولداعاليەۆانىڭ ايتۋىنشا, مەكەمە العاشقى مەديتسينالىق كومەك كورسەتۋگە قاجەتتى جابدىقتاردىڭ بارىمەن جابدىقتالعان. اۋماقتاعى 11 ۋچاسكەگە 8 دارىگەر مامانى قارايدى. ورتالىق اۋماقتاعى 17 مىڭنان استام تۇرعىندار مەن سونداعى 2 كوللەدجدىڭ وقۋشىلارى مەن وقىتۋشىلارىنا قىزمەت كورسەتەدى.
– ءبىز بۇعان دەيىن باسىمىز اۋىرىپ, بالتىرىمىز سىزداسا, №5 ەمحاناعا سابىلاتىنبىز. اۋدان اۋماعى ۇلكەن بولعاندىقتان ەمحانا بىزدەن ءبىراز قاشىقتا ورنالاسقان, ءارى كىسىنىڭ كوپتىگىنەن كەزەك كۇتۋگە تۋرا كەلەتىن. وسى ورتالىق اشىلعالى جاقسى بولدى, ءۇيىمىزدىڭ ىرگەسىندە, ءارى كەرەك مامانداردىڭ ءبارى بار. ەندى الىستاعى ەمحاناعا بارىپ ءجۇرۋدىڭ, كەزەك كۇتۋدىڭ ماشاقاتىنان قۇتىلدىق, – دەيدى گۇلدەراي ەسىمدى كوپبالالى انا.
باس دارىگەردىڭ ايتۋىنشا, الداعى جىلى ورتالىققا ستوماتولوگيالىق قوندىرعى ورناتىلادى ەكەن. ياعني كەلەر جىلدان باستاپ كوكتال-2 الابىنىڭ تۇرعىندارى وسى جەردەن تىستەرىن دە ەمدەتە الاتىن بولدى.
تۇرعىن ءۇي الاپتارىن دامىتۋ:
پروبلەمالار:
جول جانە ينجەنەرلىك
ينفراقۇرىلىمنىڭ جوقتىعى
الەۋمەتتىك جانە اكىمشىلىك
نىسانداردىڭ تاپشىلىعى
ايماقتاردى اباتتاندىرۋ
ماسەلەسى
شەشىمى:
ايماقتاردا 39 كوشە سالىندى جانە جوندەلدى
پريگورودنىي ت/ا 800 ورىندىق مەكتەپ جانە «اسپان» سپورت كەشەنى سالىندى
ءوندىرىس, يلينكا جانە كوكتال-2 ت/ا سپورتتىق ويىن الاڭدارى, امبۋلاتوريالىق ورتالىق اشىلدى
