شىرشاتوي شاتتىققا بولەدى

قازاق باتىرلارى, گارري پوتتەر, ەلف پەن اققالا, نيندزيا تاسباقا, ورمەكشى ادام مەن سۋپەرمەن… ءتىزىمى وسىلاي جالعاسا بەرەتىن ەرتەگى مەن كينو كەيىپكەرلەرى وقۋشىلار سارايىندا وتكەن جاڭاجىلدىق مەرەكەدە باس قوستى.ەكى كۇنگە سوزىلعان شىرشاتويعا جالپى سانى 500-دەن اسا ەلوردالىق وقۋشى قاتىس­تى. ولاردىڭ ءبىرازى – كوپبالالى, تۇرمىسى تومەن وتباسىلاردان شىققان, جەتىم نەمەسە اتا-انا قامقورلىعىنسىز قالعان بالالار, سونداي-اق وقۋ ۇزدىكتەرى.
ەرتەڭگىلىك بارىسىندا ءسوز العان قالا اكىمى التاي كولگىنوۆ شاكىرتتەردى جانە ولاردىڭ اتا-انالارى مەن ۇستازدارىن جاڭا جىل مەيرامىمەن قۇتتىقتاي كەلە:
– بيىل ەلوردالىق وقۋشىلار تاماشا تابىستارعا جەتتى. اتاپ ايتساق, بالالارىمىز رەسپۋبليكالىق وليمپيادادا 103 مەدالعا يە بولدى. ونىڭ 21-ءى – التىن, قالعانى – كۇمىس پەن قولا. ال حالىقارالىق وليمپيادادا 53 مەدالدى قورجىنعا توعىتتى. ونىڭ 9-ى – التىن. كەلەسى جىلى بۇدان دا ۇلكەن جەتىستىكتەردى باعىندىرا بەرىڭدەر. بۇل ءۇشىن بىزدەر, ۇلكەندەر, سەندەرگە بارلىق قولايلى جاعدايدى جاسايمىز, – دەدى.جالپى قالا بويىنشا قاراشا ايىنىڭ سوڭىنان باستاپ الەۋمەتتىك وسال توپتارعا جاتاتىن وتباسىلاردان شىققان 15 مىڭنان اسا استانالىق بالا ءۇشىن ءارتۇرلى دەڭگەيدەگى قايىرىمدىلىق ءىس-شارالارى ۇيىمداستىرىلعان.
ونىڭ ىشىندە جەتكىنشەكتەردى تەاتر مەن كينوتەاترعا, دەلفيندەر شوۋىنا, سىرعاناققا اپارۋ سەكىلدى بىرقاتار ويىن-ساۋىق ءتۇرى قاراستىرىلعان. سونداي-اق ەرەكشە قاجەتتىلىكتى تالاپ ەتەتىن بالالار مەن جاسوسپىرىمدەر ءۇشىن اربالار مەن 10 ينۆاتاكسي سىيعا تارتىلعان.