مۇنداي داتچيكتەر بايقوڭىر اۋدانىنداعى الەۋمەتتىك جاعىنان از قامتىلعان جانە كوپبالالى وتباسىلار مەن جالعىزباستى قاريالاردىڭ 70-كە جۋىق ءۇيىن قامتىماق. بۇدان بولەك, وسى اۋدانداعى تۇرمىسى تومەن وتباسىلارعا كومەك كورسەتۋ ماقساتىندا 30 ءۇيدىڭ پەش قۇبىرلارىن تازارتۋ جۇمىستارى ءجۇرگىزىلمەك.
ال سارىارقا اۋدانىنداعى وسىنداي ساناتتاعى وتباسىلاردىڭ ۇيىنە 500 ۋلى گاز داتچيگى مەن 500 ءتۇتىن داتچيگى ورناتىلادى دەپ جوسپارلانۋدا. سارىارقا اۋدانىنداعى جەكە سەكتور ۇيلەرىن ارالايتىن موبيلدىك توپ قۇرىلىپ, ونىڭ قۇرامىنا تج باسقارماسى مەن جەرگىلىكتى پوليتسيا قىزمەتكەرلەرى جانە ەرىكتىلەرمەن قاتار, كاسىپكەرلەردىڭ قولداۋىمەن پەش ماماندارى دا تارتىلعان. ولار الەۋمەتتىك-ءالسىز توپقا جاتاتىن تۇرعىندار ۇيلەرىنىڭ ورتكە قارسى قاۋىپسىزدىگىن تەكسەرىپ, مۇرجالاردى تازالاۋ جۇمىسىن دا جۇرگىزبەك.
– پروفيلاكتيكالىق جۇمىستار جىلىتۋ ماۋسىمى باستالعان ۋاقىتتان بەرى جۇرگىزىلىپ كەلەدى. سوڭعى توتەنشە جاعدايلارعا بايلانىستى بۇل جۇمىستار كۇشەيتىلگەن رەجيمگە كوشتى. سوعان وراي سەنبى-جەكسەنبى كۇندەرى دەپارتامەنت گارنيزونىنىڭ جەكە قۇرامى جەر ۇيلەرگە رەيد جاساپ, ورتكە قارسى قاۋىپسىزدىك شاراسىن ءتۇسىندىرۋ جۇمىستارى جۇرگىزىلدى. ال ۋلى گازعا ارنالعان داتچيكتەر دەمەۋشىلەر قارجىسىنا ورناتىلۋدا. سونىمەن قاتار كەيبىر ۇيلەردىڭ مۇرجالارىن تازالاۋدى دا قولعا الىپ جاتىرمىز. بىراق تۇرعىنداردى بىرەۋدىڭ كەلۋىن كۇتپەي, وزدەرى دە ۇيلەرىن بارىنشا كۇتىپ, قاۋىپسىزدىك شارالارىن قاتاڭ ۇستانۋعا شاقىرامىز, – دەيدى بايقوڭىر اۋدانى توتەنشە جاعدايلار باسقارماسىنىڭ باسشىسى ەركىن وتارعالىمۇلى.
ايتا كەتۋ كەرەك, بەس بالانىڭ ءومىرىن جالماعان ەلورداداعى ۋاقىتشا تۇرعىزىلعان ۇيلەردىڭ بىرىندە بولعان قىزىل جالىننىڭ سەبەبى انىقتالدى. قر ءىىم تجك ازاماتتىق قورعاۋ سالاسىنداعى اپاتتى جاعدايلاردىڭ قاۋىپ-قاتەرىن تومەندەتۋ مەن باقىلاۋ باسقارماسى باسشىسىنىڭ ورىنباسارى جاسۇلان اقتاەۆتىڭ مالىمەتىنشە, ءۇيدىڭ توبەسى مەن ىس سورعىشتىڭ اراسىندا قاجەتتى اراقاشىقتىق قاراستىرىلماي, مۇرجا دۇرىس بەكىتىلمەگەن.
