ەلى ءۇشىن ەرلىگى ەرەن, ەڭبەگى ەلەۋلى, توقسان جاس عۇمىرىندا تاعدىر ساحناسىندا تالايدى كورگەن شىعىستىڭ شۇعىلاسى, قازاقتىڭ قايسار قىزى ۇوس ارداگەرى, ۇلاعاتتى ۇستاز شاعيلا قۇسانوۆانى بيىلعى قاڭتاردا قالىڭ قازاق قيماستىقپەن اقتىق ساپارعا شىعارىپ سالىپ ەدى. ەرتىس بويى ەركەلەتىپ, ەسىل ءومىر ەرتە ەسەيتكەن, ورتاسىنان وسال بولماي, وتان ءۇشىن وتقا ءتۇسىپ باتىر اتانعان ەرجۇرەك قىزىن ەلوردا جۇرتى ەسكە الىپ, قازاق ۇلتتىق ونەر ۋنيۆەرسيتەتى «قازاقستان تاريحى جانە گۋمانيتارلىق پاندەر» كافەدراسىنىڭ ۇيىمداستىرۋىمەن شاعيلا اكىمبايقىزىنىڭ رۋحىنا ارنالعان «XXI عاسىردىڭ ۇلگى بولار تۇلعاسى» اتتى ەسكە الۋ كەشى ءوتتى.
ەرلىگىمەن تاريحتان ورىن الىپ, ال ەڭبەگىمەن تاريح عىلىمىنا وراسان ۇلەس قوسقان, ۇستازدىق جولىندا تەرەڭ ءبىلىمى تالاپتى شاكىرتتەرىنە تاپتىرماس ءنار بولعان شاعيلا اپامىزدىڭ ەسىمى ۇلىقتالعان كەش كەيىپكەردىڭ سوعىس جىلدارىنداعى ءومىرىن بەينەلەيتىن كومپوزيتسيادان باستالدى. اتالمىش وقۋ ورنىنىڭ «دراما تەاتر اكتەرى» وقيتىن ءى-ءىى كۋرس ستۋدەنتتەرى قاتىسقان قويىلىمدا جاس شاعيلانىڭ اسكەر قاتارىنا ءوتىپ, سوعىسقا اتتانۋى, مايدان الاڭىندا قۇربىسى زيادان ايىرىلۋى, باتىر قىزدىڭ ەر-جىگىتتەرمەن قاتار ەرلىك كورسەتۋى, جەڭىسكە جەتۋ ءبارى دە سۋرەتتەلەدى. شاعيلا قۇسانوۆانىڭ رولىندە اسىلزات كۋلوۆا ويناسا, زيا دوسبەرگەنوۆانىڭ ءرولىن رابيعا ايتكەنوۆا سومدادى.
ەسكە الۋ كەشىندە جينالعان قاۋىمعا شاعيلا اكىمبايقىزىنىڭ ءومىر جولى جايلى ماعلۇمات بەرىلىپ, ۇستاز قۇرمەتىنە مازمۇندى ءان, ماعىنالى سوزدەر ايتىلدى. سوعىس ارداگەرى, عالىم, ارداقتى ۇستاز, اياۋلى انا بولعان وسىناۋ عاجاپ تۇلعانىڭ كوزىن كورگەن ءبىر توپ زيالى قاۋىم وكىلدەرى, وقىتۋشىلار مەن ستۋدەنتتەر قاتىسقان شارادا قازاق ۇلتتىق ونەر ۋنيۆەرسيتەتىنىڭ رەكتورى, قر حالىق ءارتىسى ايمان مۇساقوجاەۆا, فيلولوگيا عىلىمدارىنىڭ دوكتورى ديحان قامزابەكۇلى, تاريح ءپانىنىڭ وقىتۋشىسى قۇرالاي بايمۇحانوۆا ەستەلىكتەر ايتتى. ال شاكىرتتەرى اتىنان قر مەملەكەتتىك جاستار سىيلىعىنىڭ يەگەرى, اقىن قالقامان سارين ۇستاز رۋحىنا ارناپ جىر جولدارىن ارنادى.
كەش سوڭىندا بەيبىت ءومىردەگى باتىر اپامىزدىڭ ۇلاعاتتى ءومىر جولى جايلى تەاترلاندىرىلعان ساحنالىق كومپوزيتسيا ۇسىنىلدى. بۇل كومپوزيتسيادا جاس اكتەرلەر شاعيلا اكىمبايقىزىنا ارنالعان مايدانگەر اقىن ابدىكارىم احمەتوۆ پەن ساقىپجامال وتەعاليەۆانىڭ ولەڭدەرىنەن ءۇزىندى وقىدى.
گۇلميرا سارينا,
قر ەڭبەك سىڭىرگەن قايراتكەرى
