استانا تويىنىڭ دۋمانى تولاستاماق ەمەس. قالا جۇرتشىلىعى مەن قوناقتارى 7 شىلدەدە ساعات 20.00-دە «قازاقستان» ورتالىق كونتسەرت زالىندا استانانىڭ سيمفونيالىق وركەسترىنىڭ سۇيەمەلدەۋىمەن «ا’Studio» توبىنىڭ كونتسەرتىن تاماشالايدى. توپ مۇشەلەرى ەلوردانىڭ ءتول مەرەكەسىنىڭ قۇرمەتىنە ءوز تىڭدارماندارىنا اۋقىمدى شوۋ تارتۋ ەتپەك.
ساحناعا قۇرىلعان تاڭعاجايىپ دەكوراتسيا, جاندى داۋىس ءارى بەلگىلى توپتىڭ سيمفونيالىق جاڭا ناقىشتاعى ۇمىتىلماس حيت اندەرى استانالىقتاردى ەرەكشە اسەرگە بولەمەك. توپتىڭ جەتەكشىسى,بەلگىلى مۋزىكانت بايعالي سەركەباەۆتىڭ ءىنىسى تانىمال كومپوزيتور الماس سەركەباەۆ بۇل كەشتىڭ بۇرىنعى كونتسەرتتەردەن وزگەشە ەكەنىن ايتادى. ايتالىق, ول وسى ۇجىمنىڭ «دجۋليا», «ستان موەي موليتۆوي», «نەليۋبيمايا», «سولدات ليۋبۆي» حيتتەرى جەلىسىمەن «فانتازيا» اسپاپتى تۋىندىسىن دۇنيەگە اكەلدى.
«ا’Studio» توبى شيرەك عاسىردان بەرى كورەرمەنىن ساپالى ونەرىمەن سۋسىنداتىپ كەلەدى. توپتىڭ ەسترادا ساحناسىندا ايتارلىقتاي ورنى بار جانە ءوز ءستيلىن قالىپتاستىرىپ ۇلگەرگەن. «A’Studio» – رەسەي مەن قازاقستان شوۋ-بيزنەسىندەگى ۇزاق جوبالاردىڭ ءبىرى. ەڭ العاشقى «دجۋليا» ءان جيناعى ءساتتى شىققاننان بەرى تىڭدارماندارىنىڭ تالعامىن تابۋدا.
