ءتارتىپ ساقشىلارى تەمىر تۇلپار ءمىندى
كەشە استانا قالالىق ىشكى ىستەر دەپارتامەنتىندە ورگان باسشىلارىنىڭ جەكە قۇرامى جانە ارداگەرلەرىنىڭ قاتىسۋىمەن پوليتسيا كۇنىنە ارنالعان مەرەكەلىك شارا ءوتتى.
شارا شىمىلدىعىن استانا قالالىق ءىىد باسشىسى, پوليتسيا گەنەرال-مايورى امانتاي اۋباكىروۆ قۇتتىقتاۋ سوزىمەن اشىپ, بارشا ارىپتەستەرىن ءتول مەرەكەلەرىمەن قۇتتىقتادى. ول پوليتسيا قىزمەتىنىڭ جاۋاپكەرشىلىگى مەن ماڭىزىنا ەرەكشە توقتالىپ ءوتتى. سونىمەن قاتار, ارداگەرلەر كەڭەسىنىڭ توراعاسى ەسىم كارىبايۇلى تانابەرگەنوۆ: «سىزدەر ءوز قىزمەتتەرىڭىزدى ۇلكەن ابىرويمەن اتقارىپ, ازاماتتاردىڭ زاڭدى قۇقىعىن قورعاۋ مەن ەلوردامىزدىڭ تىنىشتىعىن ساقتاۋعا ارقاشان ساقاداي سايسىزدار» دەپ, كەيىنگى ءىزباسارلارىنا جىلى لەبىزىن ءبىلدىردى.
بۇل مەرەكە ءداستۇرلى تۇردە ەڭ ۇزدىكتەردى ماراپاتتاۋ راسىمىمەن جالعاستى. ولار مەدالدارمەن, قر ىشكى ىستەر ءمينيسترىنىڭ ماقتاۋ قاعازدارىمەن جانە العىس حاتتارمەن ماراپاتتالدى.
سونداي-اق, «قازاق ەلى» مونۋمەنتى الاڭىندا ىشكى ىستەر قىزمەتكەرلەرىنە سۋ جاڭا اۆتوكولىكتەردىڭ كىلتى تابىستالدى. وسىنداي جاقسىلىقتارعا جەتەلەۋشى بولىپ تابىلاتىن استانا قالاسى اكىمدىگىنىڭ ارقاسىندا دەپارتامەنت ماتەريالدىق-تەحنيكالىق جاعدايىن جاقسارتىپ, يگىلىگىن كورىپ كەلەدى. قازىرگى ۋاقىتتا استانا قالالىق ءىىد جول-پاترۋلدىك پوليتسيا پولكىنىڭ اۆتوپاركى وتاندىق اۆتوكولىكتەرمەن تولىعا تۇسۋدە.
پوليتسيا گەنەرال-مايورى امانتاي اۋباكىروۆ: «بۇل جاڭارتۋلاردىڭ بارلىعى باس قالا – استانامىزدىڭ كوركەيە ءتۇسۋى مەن ونداعى قوعام قاۋىپسىزدىگى
مەن تىنىشتىعىن نىعايتۋعا نەگىز بولارىنا كامىل سەنەمىن» دەپ, ەرىنە قامقور بولعان ەل مەن ەلوردانىڭ بولاشاعىنان ۇلكەن ءۇمىت كۇتەتىنىن ايتتى.
نۇريسلام قۇسپانعالي