كەلەسى جىلدىڭ قاڭتارىندا باس قالادا «Smart استانا» تۇجىرىمداماسى اياسىندا «Smart مەديتسينا» جوباسى ەنگىزىلە باستايدى. قالالىق ءماسليحاتتا وتكەن «دەپۋتات كۇنى» بارىسىندا استانانىڭ دەنساۋلىق ساقتاۋ باسقارماسىنىڭ باسشىسى كامالجان نادىروۆ اتالمىش جوبانىڭ ارتىقشىلىقتارى تۋرالى بايانداپ, دەپۋتاتتاردىڭ سۇراقتارىنا جاۋاپ بەردى.
بايانداماشىنىڭ ايتۋىنشا, بۇل جوبانى ازىرلەگەندە وڭتۇستىك كورەيا, گەرمانيا, تۇركيا, سينگاپۋر مەملەكەتتەرىنىڭ تاجىريبەسى ەسكەرىلدى. جوبا شەڭبەرىندە حالىق دەنساۋلىعىنا قاتىستى بارلىق ۇدەرىستەردى اۆتوماتتاندىرۋ, ەمحانالاردا دياگنوزدى انىقتاۋ جانە ەمدەۋ كەزىندە قاتەلىكتەردى ازايتاتىن «اقىلدى» ەلەمەنتتەردى ەنگىزۋ, راديولوگيالىق جانە زەرتحانالىق زەرتتەۋلەردىڭ ورتالىقتاندىرىلعان بازاسىن قۇرۋ جوسپارلانۋدا.
«Smart مەديتسينا» ەلوردادا مەديتسينالىق قىزمەتتىڭ ساپاسى مەن قولجەتىمدىلىگىن ارتتىرۋ ماقساتىنا تەزىرەك جەتۋگە سەپتەسەدى. اتاپ ايتساق, رەنتگەن جازبالارىن وڭدەگەندە جوعارى دالدىككە جەتۋگە مۇمكىندىك بەرەدى. ماسەلەن, وعان ەنگىزىلگەن جاساندى ينتەللەكت تەحنولوگياسى قاتەرلى ىسىكتەردى اۋرۋ اسقىنباي تۇرعاندا انىقتايدى.
جالپى العاندا, بۇل جوبانىڭ الەۋمەتتىك جانە وندىرىستىك ارتىقشىلىقتارى بار. العاشقىسى دارىگەردىڭ قابىلداۋىنا جازىلۋدىڭ بالاما ادىستەرىن ۇسىنىپ, ەمحانالاردا كەزەكتەردى ازايتادى. پاتسيەنتتى قابىلداعاندا مالىمەتتەردى ەنگىزۋ ۋاقىتىن قىسقارتادى. پاتسيەنت باعىتى مەن مەديتسينا قىزمەتكەرلەرىنىڭ جۇمىسىن وڭتايلاندىرادى. اۋرۋدىڭ الدىن الۋعا كومەگىن تيگىزەدى.
ال ەكىنشى ارتىقشىلىق – مەديتسينا قىزمەتكەرلەرىنىڭ ەڭبەك ونىمدىلىگىن كوتەرىپ, ءدارى-دارمەك پەن مەديتسينالىق قوندىرعىلاردى ەسەپكە الۋدىڭ اشىقتىعىن قامتاماسىز ەتەدى. دياگنوز قويۋدىڭ ساپاسىن ارتتىرادى. بازاعا ەنگىزىلگەن مالىمەتتەر مەن دارىگەرلەردىڭ ناۋقاسقا جازىپ بەرگەن ەمىن قاداعالاۋعا مۇمكىندىك بەرەدى. بۇعان قوسا, رەنتگەن جازبالارى مەن زەرتحانالىق زەرتتەۋلەردىڭ دالدىگىن كوتەرەدى. نازار اۋدارىلۋى ءتيىس جايلاردى بولجاۋعا, مەديتسينا ۇيىمىنىڭ اكىمشىلىگىن ناتيجەلى باسقارۋعا ءتيىمدى جاعداي تۋدىرادى.
استانانىڭ كەيبىر مەديتسينالىق ۇيىمدارى جارتىلاي اۆتوماتتاندىرىلعانىن ايتا كەتۋ كەرەك. ياعني, بۇل ۇيىمداردا مەديتسينالىق اقپاراتتىق جۇيەلەر جۇمىس ىستەپ جاتىر. الايدا دارىگەرلەر ءبىر مالىمەتتى ەكى رەت ەنگىزىپ, ۋاقىتتارىن جوعالتۋدا. بۇل مالىمەتتەر قر دەنساۋلىق ساقتاۋ مينيسترلىگىنىڭ اقپاراتتىق جۇيەسىنە ەنگىزىلە تۇرىپ, بۇل مينيسترلىككە ەسەپتى تاپسىرعاندا قايتادان سۇرالادى. وسىعان بايلانىستى استانانىڭ دەنساۋلىق ساقتاۋ باسقارماسى بارلىق مودۋلدەردى كەشەندى تۇردە ەنگىزۋدى قاراستىرىپ جاتىر.
«Smart مەديتسينا» ەلوردادا مەديتسينالىق قىزمەتتىڭ ساپاسى مەن قولجەتىمدىلىگىن ارتتىرۋ ماقساتىنا تەزىرەك جەتۋگە سەپتەسەدى. رەنتگەن جازبالارىن وڭدەگەندە جوعارى دالدىككە جەتۋگە مۇمكىندىك بەرەدى. ماسەلەن, وعان ەنگىزىلگەن جاساندى ينتەللەكت تەحنولوگياسى قاتەرلى ىسىكتەردى اۋرۋ اسقىنباي تۇرعاندا انىقتايدى
«Smart مەديتسينا» جوباسىن مەملەكەتتىك جەكە ارىپتەستىك مەحانيزمى ارقىلى جۇزەگە اسىرۋ جوسپارلانۋدا. كەلەسى جىلدىڭ باسىنان ول اتالمىش باسقارماعا قاراستى مەديتسينالىق ۇيىمدارعا كەزەڭ-كەزەڭىمەن ەنگىزىلە باستايدى.
ارينە, جوبانى ىسكە اسىرۋ ءۇشىن ءبىراز شىعىندانۋعا تۋرا كەلەدى. بۇل شىعىندار مەديتسينالىق اقپاراتتىق جۇيەنىڭ ءوزى مەن سەرۆەرلىك قوندىرعىلاردى, ءتيىستى تەحنيكانى, عالامتور بايلانىسىن ساتىپ الۋعا جۇمسالماق. قازىرگى كۇنگە ولاردى جەتكىزۋشى بىرنەشە ينۆەستور قىزمەتىن ۇسىنىپ وتىر. باسقارما بولسا الدا كونكۋرس وتكىزۋ ءۇشىن جەتكىزۋشىگە قويىلاتىن تالاپتاردى ازىرلەۋدە. كامالجان نادىروۆتىڭ سوزىنشە, جوبانى جۇزەگە اسىرۋعا كەتەتىن قارجى كولەمى دە الدا انىقتالادى.
امانعالي قالجانوۆ
