مادەني وشاقتار – ۇدايى نازاردا
كەلەسى جىلى مەملەكەتتىك قىزمەتكەرلەر مەن قالا تۇرعىندارىنا, بارلىعى 2 مىڭنان استام ادامعا ءۇش ايلىق قازاق ءتىلى كۋرستارى وتكىزىلۋى كەرەك. بۇعان قوسا, مەملەكەتتىك قىزمەتكەرلەرگە ارنالعان اعىلشىن ءتىلىن وقىتۋ كۋرستارى ۇيىمداستىرىلماق. الەۋمەتتىك قىزمەتكەرلەر مەن استانالىقتار دا, جيىنى مىڭنان اسا ادام وسى ءتىلدى وقيدى. ول ءۇشىن 10 ملن تەڭگە ءبولىندى. كەشە وتكەن استانا قالالىق ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسيا وتىرىسىندا مۇنى استانانىڭ تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ حابارلادى.
ونىڭ ايتۋىنشا, اتالمىش باسقارما قازاق ءتىلى ءالىپبيىن لاتىن قارپىنە كوشىرۋ بويىنشا باعدارلاما دايىنداپ جاتىر. «الدىمەن استانا حالقىنا لاتىن گرافيكاسى نەگىزىندەگى ءالىپبيدى ۇيرەتۋىمىز قاجەت. ەلباسىنىڭ جارلىعى شىعا سالىسىمەن ماڭعىستاۋ وبلىسى سياقتى وڭىرلەر لاتىنعا كوشۋ بويىنشا ىستەردى دەرەۋ قولعا الىپ جاتىر. مەنىڭشە, بۇل ماسەلەدە باستىسى – اسىعىستىققا بوي الدىرماۋ. ءبارى كەزەڭ-كەزەڭمەن جۇزەگە اسادى. ءبىز دە جوسپارعا سايكەس قيمىلدايمىز. بالكىم ول ءۇشىن قوسىمشا قارجى دا قاجەت بولاتىن شىعار» دەدى باسقارما باسشىسى.
وتىرىستا, نەگىزىنەن, قالانىڭ 2018-2020 جىلدارعا ارنالعان بيۋدجەت جوباسى, سونىڭ ىشىندە جوعارىدا اتى اتالعان باسقارما مەن مادەنيەت, مۇراعاتتار جانە قۇجاتتاما باسقارماسىنا بولىنەتىن قارجى كولەمى تالقىلاندى. اسىرەسە, كوميسسيا مۇشەلەرىندە حالىققا اعىلشىن ءتىلىن وقىتۋ ماسەلەسى بويىنشا سۇراقتار تۋىندادى.
تىلەۋعالي قىشقاشباەۆتىڭ سوزىنشە, ءبىر ادامعا وسى ءتىلدى وقىتۋ ءۇشىن 1700 تەڭگە بولىنەدى. ءبىر جىلعا بۇل سوما 10 مىڭنان استام تەڭگەنى قۇرايدى. ياعني, ءبىر ادامعا ارنالعان جىلدىق كۋرس 6 ساعاتتان تۇرادى. كوميسسيا مۇشەلەرىنىڭ ءپىكىرىنشە, وسىنشاما ساعاتتا ادام اعىلشىن ءتىلىن مەڭگەرە المايدى. بۇل «بەكەر مال شاشپاق» بولىپ وتىر. وقىتۋ ناتيجەلى بولۋى ءۇشىن بولىنەتىن قارجى كولەمىن ۇلعايتىپ, ساعاتتار سانى دا كوبەيۋ كەرەك.
وقىرماننىڭ ەسىندە بولسا, بيىل قالا تەاترلارى باسشىلىعىنىڭ استانا اكىمىنىڭ ورىنباسارى ەرمەك امانشاەۆپەن كەزدەسۋىندە «جاستار» تەاترىنىڭ شاتىرىن جوندەۋ ماسەلەسى كوتەرىلدى. مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى ناريما مۇحامبەتالينا بۇل ماسەلەنى جاڭعىرتىپ, جوندەۋگە 83 ملن تەڭگە كەرەك ەكەنىن جەتكىزدى. بۇل قارجىنى «جۇمىسپەن قامتۋدىڭ جول كارتاسى» باعدارلاماسىنىڭ اياسىندا سۇراۋدى جوسپارلاپ وتىرعانىن ايتتى.
الدىندا استانادا قازاق تەاترى سالىناتىنى تۋرالى دا رەسمي تۇردە حابارلاندى. باسقارما باسشىسىنىڭ ورىنباسارى بۇل ماسەلەنى دە تۇسىندىرە كەتتى. ونىڭ ايتۋىنشا, قازىر قۇرىلىس باسقارماسىنا جۇمىستى باستاۋ ءۇشىن باستاپقى سوما رەتىندە 1 ملن تەڭگە ءبولىندى. تەاتر بويىنشا تەحنيكالىق-ەكونوميكالىق نەگىزدەمە دە دايىن.
بۇعان قوسا, دەپۋتاتتاردىڭ تاراپىنان م.گوركي اتىنداعى مەملەكەتتىك اكادەميالىق ورىس تەاترىن
جوندەۋ, مۋزەيلەر مەن
تەاترلارعا تەگىن كىرەتىن كۇندەردى ۇيىمداستىرۋ ماسەلەلەرى كوتەرىلدى.
ناريما مۇحامبەتالينا استانانىڭ 20 جىلدىق مەرەيتويى كەلە جاتقانىن, كەلەسى جىلى باسقارمانىڭ نەگىزگى جۇمىسى ونى لايىقتى اتاپ وتۋگە باعىتتالاتىنىن جەتكىزدى. باسقارماعا بيۋدجەتتەن ءبولىنىپ وتىرعان قارجىنىڭ قوماقتى بولىگى دە وسى مەرەيتوي شارالارىنا جۇمسالادى ەكەن.
امانعالي قالجانوۆ
تەاتر قويىلىمدار جاستارعا تەگىن بولۋى كەرەك جانە ءبىلىم وردالاردا ناسيحاتتالۋى قاجەت. جاستار مادەني اعارتۋ مەن تەرەڭ ءبىلىم مەن ساۋاتتىلىققا جول اشىلادى. قازاقي قۇندىلىقتاردى دارىپتەيدى