ەلورداداعى «قازاقستان» سپورت سارايىن ينتەللەكتۋالدى تەحنولوگيالاردى قولدانا وتىرىپ, تولىعىمەن جاڭعىرتۋ جوسپارلانىپ وتىر. بۇل جۇمىسپەن مەملەكەتتىك-جەكەمەنشىك ارىپتەستىك ارقىلى سلوۆاكيانىڭ Colosseo EAS activ system كومپانياسى اينالىسپاق. نۇر-سۇلتان قالاسى ءماسليحاتىنىڭ كەزەكتى سەسسياسىندا مۇنى قالالىق اكتيۆتەر جانە مەملەكەتتىك ساتىپ الۋ باسقارماسىنىڭ باسشىسى ەرسىن وتەباەۆ حابارلادى. 
– اتالعان كومپانيانىڭ «الماتى ارەنا», «حالىق ارەنا» سپورت سارايلارىن, سانكت-پەتەربۋرگ قالاسىنىڭ مۇز ايدىنى سارايىن تەحنولوگيالىق جابدىقتاۋدا تاجىريبەسى بار. «قازاقستان» سپورت سارايى جوباسىن جۇزەگە اسىرۋ مەرزىمى – 16,5 جىل. سونىڭ ىشىندە جاڭعىرتۋ مەرزىمى – 5,5 جىل. جالپى قارجىلاندىرۋ كولەمى شامامەن العاندا 25 ميلليارد 560 ميلليون تەڭگە. كومپانيا ينتەللەكتۋالدى تەحنولوگيانى ەنگىزۋدى جوسپارلادى. كۇردەلى جوندەۋ جۇمىستارىنان كەيىن سپورت سارايى زامانۋي وزىق تەحنولوگيالارمەن جابدىقتالىپ, كحل مەن فيفا سەكىلدى سپورت ۇيىمدارىنىڭ تالاپتارىنا سايكەستەندىرىلەدى. بۇل جاعداي ءتيىستى سايكەستەندىرۋ سەرتيفيكاتتارىن الۋعا, رەسپۋبليكالىق جانە حالىقارالىق دارەجەدەگى سپورتتىق, مادەني ءىس-شارالاردى وتكىزۋگە مۇمكىندىك بەرەدى. نىساندى جاڭعىرتۋدان كەيىن مۇندا حوككەي, شاعىن فۋتبول, باسكەتبول, ۆولەيبول, بوكس, سۋ سپورتى سياقتى سپورت تۇرلەرىنەن جارىستار وتكىزۋگە بولادى, – دەدى باسقارما باسشىسى.
ونىڭ ايتۋىنشا, ءتيىستى جۇمىستاردان سوڭ, سپورت سارايىنداعى جانكۇيەرلەرگە ارنالعان ورىندىقتاردى 7500-گە دەيىن كوبەيتۋ جوسپارلانىپ وتىر. جاڭعىرتۋ جۇمىستارىنا مادەنيەت جانە سپورت مينيسترلىگى مەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنەن سالالىق وڭ قورىتىندى الىندى. بيزنەس جوسپار بەكىتىلىپ, ەكونوميكالىق ساراپتاما دايىندالدى. مەملەكەتتىك-جەكەمەنشىك ارىپتەستىك بويىنشا ەكى جاقتى كەلىسىمشارت جاسالدى. كەلىسىمشارتقا سايكەس قالالىق قۇرىلىس باسقارماسى قۇرىلىس جۇمىستارىنا مونيتورينگ جاسايتىن بولادى. جوبالاۋ-سمەتالىق قۇجاتتاماعا ساراپتاما اياقتالعاننان كەيىن قۇرىلىستىڭ قۇنى ازايۋى مۇمكىن دەگەن بولجام بار. قارجىلاندىرۋ بانكتىك كەپىلدىك نەگىزىندە بەرىلەدى. مەملەكەتتىك مىندەتتەمەنى وتەۋ تەك قۇرىلىس اياقتالعاننان كەيىن جانە نىساندى پايدالانۋعا بەرگەننەن كەيىن عانا جۇزەگە اسىرىلادى.
– سوندىقتان اكىمدىكتە قارجىلىق قاۋىپتەر جوق. قالا اكىمدىگى 15 جىل بويى «قازاقستان» سپورت سارايىن كۇتىپ-ۇستاۋ بويىنشا شىعىنداردى كوتەرمەيتىن بولادى, – دەدى ە.وتەباەۆ.
قالالىق ءماسليحات دەپۋتاتى امان ايۋپوۆ قۇرىلىس جۇمىستارىندا تاۋارلار بويىنشا قازاقستاندىق مازمۇن 35 پايىزدى عانا قۇرايتىنىن ايتا كەلە, ونىڭ وتە از ەكەنىن اتاپ ءوتتى. ينۆەستوردىڭ جەتەگىندە كەتپەۋ كەرەكتىگىن ەسكەرتتى. مەملەكەت باسشىسى ءوزىنىڭ بيىلعى جولداۋىندا وتاندىق تاۋار وندىرۋشىلەردى قولداۋ كەرەكتىگى جايلى ايتقانىن ەسكە سالدى. وسىعان بايلانىستى دەپۋتات بايانداماشىعا ساۋال تاستادى.
– راس, جاعداي تۋرا وسىلاي بولىپ تۇر. سەبەبى ساتىپ الىناتىن تەحنولوگيالىق جابدىقتار قازاقستاندا وندىرىلمەيدى. بىراق كورسەتىلەتىن قىزمەتتەر قازاقستان تاراپىنان بولادى, جۇمىسقا جەرگىلىكتى ازاماتتار قابىلدانادى, – دەپ جاۋاپ بەردى باسقارما باسشىسى.
ونىڭ ءسوزىن قالا اكىمىنىڭ ورىنباسارى باقتيار ماكەن تولىقتىرا كەتتى.
– بىلتىر مەملەكەت باسشىسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا «قازاقستان» سپورت سارايىن جاڭعىرتۋ تۋرالى تاپسىرما بەرىلىپ, «تولقىن» سپورت كەشەنىنىڭ جاعدايى سىن كوتەرمەيتىندىگى ايتىلدى. ءتيىستى جۇمىستار مەملەكەت جانە جەرگىلىكتى بيۋدجەتكە ايتارلىقتاي سالماق تۇسىرەتىندىكتەن, ءبىز ينۆەستورلاردى ىزدەدىك. تابىلعان ينۆەستوردىڭ الدىنا «قازاقستاندى» جاڭعىرتۋدى بەس جىلدا ەمەس, ءۇش جىل ىشىندە ءبىتىرۋ تالابىن قويىپ وتىرمىز. ارينە, ينۆەستور ەۋروپادان بولعاننان كەيىن ينفلياتسيا, الەمدىك ەكونوميكانىڭ جاعدايى, باسقا ماسەلەلەر بۇل جۇمىسقا اسەرىن تيگىزۋى مۇمكىن. بىراق بارلىق مىندەتتەمەلەر بويىنشا كەلىسسوزدەر جاسالدى. قۇرىلىس ماتەريالدارى, تاۋارلار مەن كورسەتىلەتىن قىزمەتتەر وتاندىق بولادى. بىراق ينتەللەكتۋالدى تەحنولوگيالار ەۋروپادان الىنادى. سەبەبى بىزدە ونداي وندىرىستەر جوق. وزدەرىڭىز كورىپ وتىرسىزدار, «بارىس ارەنانى» Mabetex كومپانياسى سالدى. باسقا دا سپورت نىساندارى قۇرىلىسىن باسقا شەتەلدىك كومپانيالار جۇرگىزدى. قازىر سپورت سارايلارىن تولىعىمەن جاڭعىرتاتىن كومپانيالار بولماي تۇر. مۇنى ەكى-ءۇش جىل نەمەسە بەس جىل كۇتەتىن شىعارمىز, – دەدى قالا اكىمىنىڭ ورىنباسارى.
قالالىق ءماسليحات دەپۋتاتى قايىرلى تاۋكەننىڭ پىكىرىنشە, نىسانعا ءبولىنىپ وتىرعان مول قارجىعا جاڭعىرتۋ جۇرگىزبەي, سپورت سارايىن ءسۇرىپ, جاڭادان سالۋ كەرەك.
باقتيار ماكەن باستاپقىدا وسىنداي وي بولعانىن جاسىرمادى. الايدا عيمارات سونشالىقتى توزباعان. نەگىزگى ماسەلە ونىڭ شاتىرى مەن باسسەينىندە بولىپ وتىر. ينۆەستور دا عيماراتتىڭ وسى كۇيىندە جاڭعىرتۋدى ۇسىندى. اكىمدىك وسىنى قابىلداپ, ينۆەستورعا ءوزىنىڭ تالاپتارىن دا قويدى.
ءبىر اتاپ وتەرلىگى, «قازاقستان» سپورت سارايى 2001 جىلى پايدالانۋعا بەرىلدى. جالپى اۋماعى 22900 شارشى مەتردى قۇرايتىن نىسان سودان بەرى بىردە-ءبىر مارتە جوندەۋ كورمەگەن. كەشەن مۇز ارەناسىنان, باسسەيننەن, جاتتىعۋ جانە سپورت زالدان, 80 ورىندىق قوناقۇيدەن, تاماقتانۋ نىساندارىنان تۇرادى. مۇز ارەناسىنداعى ورىندار سانى – 5532.
2018 جىلى سپورت سارايىن تەحنيكالىق تەكسەرۋ قورىتىندىسىندا باسسەيننىڭ اپاتتىق جاعدايدا ەكەنى, عيماراتتىڭ مەتاللوكونسترۋكتسياسىنىڭ توزعانى انىقتالدى. بىلتىر مەملەكەت باسشىسىنىڭ تاپسىرماسىمەن جانە قالا اكىمدىگىنىڭ شەشىمىمەن نىسانعا كۇردەلى جوندەۋ جۇرگىزۋ تۋرالى شەشىم قابىلداندى.
