س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ 1-كۋرس ستۋدەنتتەرىن «ستۋدەنتتەر قاتارىنا قابىلداۋ» سالتاناتى ءوتتى
ۋنيۆەرسيتەت رەكتورى, پروفەسسور اقىلبەك كۇرىشباەۆ: «ءبىلىم – باسىڭىزعا بەدەل, بوساعاڭىزعا باق اكەلەتىن قۇندىلىق» دەپ جاس ورەندەرگە ستۋدەنتتىك ومىرلەرى قىزىقتى دا ءماندى وتۋىنە تىلەك ءبىلدىرىپ, ستۋدەنتتىك بيلەتتەرىن ءوز قولىمەن تابىستادى. سونداي-اق, وتكەن وقۋ جىلىنىڭ قورىتىندىسى بويىنشا «ەڭ ۇزدىك كۋراتور» اتانعان تەحنيكالىق فاكۋلتەت وقىتۋشىسى ورازباي ساپاروۆتى ماراپاتتادى.
ال, «ەڭ ۇزدىك فاكۋلتەت» اتاعىن ەكونوميكا فاكۋلتەتى (دەكانى ا.يسمايلوۆا) يەلەندى. قازاتۋ ستۋدەنتتەرىنىڭ اراسىندا وتكىزىلگەن «جاڭا ۇرپاق» كونكۋرسىنىڭ جەڭىمپازى اتانعان سۇلەيمەن راحماتۋللاعا دا ەستەلىك سىيلىق بەرىلدى.
كونتسەرتتىك باعدارلامامەن جالعاسقان كەشتە «عاسىردان عاسىرعا» پرولوگى ورىندالىپ, قازاق ەلىنىڭ وتكەن تاريحىنان سىر شەرتكەن «التىن ادام ءداۋىرى», «ساق قىزدارى مەن قازاق جاۋىنگەرلەرى», «ارماندا كەتكەن ارىستار», «ساكەن سەيفۋلليننىڭ ۇرپاققا اماناتى» سىندى ساحنالىق كورىنىستەر قويىلدى. الماتىدان ارنايى شاقىرىلعان قازاق ەستراداسىنىڭ جۇلدىزى الماس كىشكەنباەۆ اسەم انىنە بولەسە, «اگراركا ساربازدارى» كتك كومانداسى ءازىل ايتىپ, كوڭىل كوتەردى.
وسى ورايدا ايتا كەتەرلىك جايت, س.سەيفۋللين اتىنداعى قازاق ۇلتتىق اگروتەحنيكالىق ۋنيۆەرسيتەتى بيىل العاشقى ۇشتىككە ەنىپ, 1 324 گرانتتىق ورىنعا يە بولدى. ونىڭ 1 313-ءى كونكۋرستىق نەگىزدە, 11 گرانت حالىقارالىق كەلىسىمشارت نەگىزىندە الىنعان.
قۇندىز قۋانىشباەۆا
