كونە ريم مەن گرەتسيانىڭ ساۋلەتشىلەرى اعىپ جاتقان سۋدى قالانى كورىكتەندىرۋگە پايدالانباققا اينالدىرا بەزەندىرىپ, جاعالاي ءمارمار تاس توسەپ, ساندەگەن ەكەن دەيدى بىلەتىندەر. سول كورىنىسكە كوز تويدىرعان وزگە ەلدەردىڭ ساۋلەتشىلەرى كەلە-كەلە قولدان سۋ كوزىن جاساپ قويىپ, سۋبۇرقاقتى ويلاپ تاۋىپتى دەگەن بولجام بار.
بەرتىندە, سۋبۇرقاقتار ارۋ قالالاردىڭ سىرعاسى, شولپىسى, القاسى سياقتى اشەكەي قۇرالىنا دا اينالىپ كەتتى. سوندىقتان دا, ۋاقىت وتكەن سايىن ونىڭ ءوزىنىڭ ءتۇر-ءتۇرى ويلاپ تابىلدى. كوشە سۋبۇرقاعى, ينتەرەر سۋبۇرقاعى, سۋدىڭ اعۋ ديناميكاسى مەن جارىقتاندىرىلعانىنا, بەزەندىرىلگەنىنە قاراي – «ءان سالاتىن», «بيلەيتىن», كلاسسيكالىق جانە مۇسىندىك سۋبۇرقاقتار پايدا بولدى.
بۇگىندە 122 سۋبۇرقاعى بار ەلوردامىز دا ونىڭ زامانعا ساي جەتىلدىرىلگەن, جاڭا تۇرلەرىنەن كەندە ەمەس. مامىر ايىنىڭ باسىندا اشىلىپ, كۇزدىڭ قوڭىر سالقىن كۇندەرىنە دەيىن قوسىلىپ تۇراتىن سۋبۇرقاقتار قالا تۇرعىندارى مەن قوناقتارىنىڭ كوزقۋانىشىنا اينالعان.
قالاداعى سۋبۇرقاقتاردى ىسكە قوسىپ, ولاردىڭ ترۋبالارىن تازارتىپ, تەحنيكالىق جاعىن قاداعالاۋ «استانا-زەلەنستروي» اق قىزمەتكەرلەرىنىڭ موينىندا.
سۋبۇرقاقتار قالانىڭ ءسان مەن ساۋلەتىنە ۇلەس قوسقان ونەر تۋىندىسى عانا ەمەس, ول كوپ جاعدايدا قالادا باعىت-باعداردى ايقىنداپ بەرەتىن كومپاس تا سياقتى. سۋبۇرقاق كوپتىڭ اداسپاي جولىعىساتىن كەزدەسۋ ورنىنا اينالعالى قاشان!..
