رەسەيدە ءوتىپ جاتقان فۋتبولدان الەم چەمپيوناتىنىڭ ماۋسىمنىڭ 22-سىندەگى كەشتەن 25-سىندەگى تۇنگە دەيىنگى ەسەپتى كەزەڭىندە 9 ماتچ وينالدى. ولاردا 34 دوپ قاقپاعا ءتۇسىپ, ءار ماتچتا ورتا ەسەپپەن 3,77 گولدان سوعىلدى. بۇل – وسى مۋنديالداعى ەڭ جوعارى كورسەتكىش! بۇل ارالىقتا 1 حەت-تريك, 4 دۋبل جاسالدى. سونداي-اق ءبىر ويىنشى (جەروم بواتەنگ) الاڭنان قۋىلىپ, 28 فۋتبولشى ەسكەرتۋ الدى. تاعى 5 پەنالتي بەلگىلەنىپ, ولاردىڭ 4-ءى جۇزەگە اسىرىلدى. وسىمەن بىرگە 2-تۋردىڭ ويىندارى وينالىپ ءبىتتى. كوماندالار كەشە كەشكە شەشۋشى, ءۇشىنشى تۋردىڭ ويىندارىن باستاپ كەتتى. چەمپيوناتتىڭ توپتىق ءتۋرنيرى ءدۇربى جولعا ءتۇستى…
بۇل شىنىندا فانتاستيكالىق ويىن بولدى. گەرمانيانىڭ ەڭ بەرىلگەن فاناتتارىنىڭ ءوزى ماتچتىڭ سوڭعى ىسقىرىعى ەستىلگەنشە, ونىڭ 2:1 ەسەبىمەن الماندار پايداسىنا شەشىلەتىنىن ءدوپ باسىپ, ءدال تاۋىپ, ايتىپ بەرە العان جوق. كۇپشەكتى كۇشپەن, جىلىكتى جىگەرمەن وتكەن كەزدەسۋدىڭ ناتيجەسى اقىرىندا الەم چەمپيوندارىنىڭ مۋنديالمەن ەرتە قوشتاسۋىن توقتاتتى.
بالكىم, 1-تۋردا كۇتپەگەن جەردەن مەكسيكادان ۇتىلعان گەرمانيالىقتار بودىرەتىنە جۇكتەلەر مىندەتتىڭ وتە جاۋاپتىلىعىنان شىعار, بۇل ۇشىراسۋدىڭ الدىندا وعان قاتىستى ايتىلعان بولجامداردا دا ەسەپ بولعان جوق. سولاردىڭ ءبىرى – نەمىستىڭ تانىمال «Bild» گازەتى جاڭا ويىنعا شىعاتىن ويىنشىلاردىڭ كىمدەر بولاتىنىنا كورىپكەلدىك جاساپ باعىپتى. بىراق باسىلىم بايىبى تۇگەل تۋرا كەلمەدى.
كەزىندە ءسوچيدىڭ ءوزىمىز كورگەن «فيشت» ستاديونىندا جانكۇيەرلەرىنىڭ كەڭ قولداۋىنا كومىلگەن گەرمانيا سوسىن ويىننىڭ باسىنان سوڭعى سەكۋندىنا دەيىن قارسى قاقپا جاققا قاراي لەكىلدەتە شاپقىلادى دا تۇردى. نەمىستەر بۇرىن تاپ وسى كەزدەسۋدە ورىن العانداي قولايلى ءساتتى ءتيىمدى پايدالانا الماۋشىلىقتى باستان كەشپەگەن شىعار. سول جويقىن جورىقتار بارىسىندا سەباستيان رۋدي جاراقات الىپ قالدى دا, باپكەر ونىڭ ورنىنا يلكاي گيۋندوگاندى قويۋعا ءماجبۇر بولدى. سونىڭ ارتىنشا شۆەدتەر شابۋىلشىسى ولا تويۆونەن ەسەپ اشىپ ۇلگەردى. ءسويتىپ, نەمىستەر ويلاماعان جەردەن جاعدايدى ناشارلاتىپ الدى. ولار بۇل دوپتىڭ قارىمتاسىن كەلەسى تايم باستالعان بويدا قايتاردى. بۇعان ويىننىڭ ەكىنشى بولىگىندە يۋليان دراكسلەردىڭ ورنىنا شىققان ماريو گومەستىڭ قاتىسى بولدى. ول الدىمەن تيمو ۆەرنەردەن پاس قابىلداپ, ماركو رويسقا اسىردى. قاپتالدان كەلگەن دوپتى شابۋىلشى سوسىن قاقپاعا باعىتتاي سالدى. ەسەپ وسىلاي تەڭەستى.
نەمىستەر بۇدان كەيىن قاقپا الدىنداعى قاۋىپتى ساتتەردى قاپتاتتى. بىراق ءبىر جاعدايدا شابۋىلشىنىڭ شەبەرلىگى جەتىسپەي جاتسا, تاعى ءبىر كەزدەردە ساتتىلىك اينالىپ كەتىپ, دوپ توردىڭ اۋماعىنا بارماي قويدى. وسى ماۋرىتتەردە گەرمانيا ءوزىنىڭ شىن مانىندە ءۇيىرىپ سوعاتىن تولاسسىز شابۋىلمەن ادىپتەلگەن الەۋەتىن تانىتسا, سول قولايلى مۇمكىندىكتەردى گولعا اينالدىرا بىلمەۋىمەن ءالى بابىنا جەتە قويماعانىن كورسەتىپ الدى. بۇل مەزەتتە شۆەدتەر شابۋىل دەگەننىڭ نە ەكەنىن ۇمىتتى. ولاردىڭ وقتا-تەكتە ءبىر قارسى جاققا ۇمتىلعان قادامدارى الاڭنىڭ ورتاسىنان ءارى اسا المادى. سونىڭ ارتىنشا بۋندەستيم داۋىلدى دۇربەلەڭگە كوشىپ, سكانديناۆتار قورعاعان قاقپانىڭ اپشىسىن قۋىرىپ تاستاپ تۇردى.
گەرمانيالىقتار وسى تۇستا قارسىلاستارىنىڭ وسال تۇستارىن دا تاۋىپ الدى. ول قورعانىستىڭ وڭ قاپتالى ەكەن. سوندىقتان وسى قاناتپەن جوڭكىلىپ العا شىققان نەمىس جاساعى قاقپا الدىنداعى كەزەكتى قاۋىپتى ساتتەرگە ەرىك بەرۋگە كىرىستى. بۇل قاناتتا ۆەرنەر شۆەدتەردىڭ قورعانىس شەبىن قايتا-قايتا تۋ-تالاقاي ەتە بەردى. ۇزاققا سوزىلعان ۇزدىكسىز شابۋىلدار اراسىندا تىنىس العان مەزگىلدەر بولماسا, ويىن ءبىر قاقپاعا باعىتتالعان قالپىنان اجىراعان جوق. بىراق 74-مينۋتتا شۆەتسيا قۇراماسى قۇرامىندا الاڭعا دجيممي دۋرماز شىققاننان كەيىن جاعداي ءبىرشاما وزگەردى. قاپتالمەن قۇيعىتىپ وتكەندى جاقسى كورەتىن جۇيرىك ويىنشى كەلەسى قاناتتاعى ەميل فورسبەرگپەن سەپتەسىپ, ەكەۋى ۇزاماي نەمىستەر داربازاسىن الىستان كەزەكتەسىپ اتقىلاۋعا كوشتى. نەمىستەر سوسىن وزدەرى ءۇشىن قولايسىز بۇل كورىنىستى شەكتەۋگە كۇش سالدى. سول دۇربەلەڭ بارىسىندا قورعاۋشى جەروم بواتەنگ شۆەد ماركۋس بەرگتى ارت جاعىنان تەبەمىن دەپ, ەكىنشى مارتە «سارى قاعاز» الىپ قالىپ, الاڭنان قۋىلىپ كەتتى. بۇل «ماننشافت» ءۇشىن وڭاي تيگەن جوق. سونىڭ ىزىنشە كيپەر مانۋەل نويەر ايىپ دوبى ۇرىلعان كەزدە ءسۇرىنىپ قۇلاپ, تۋرا كەلگەن دوپتى سوڭىندا عانا قايىرىپ ۇلگەردى.
دەگەنمەن, نەمىستەر ۇجىمدىق ويىندى ءبىر قورعاۋشىنىڭ كەمدىگىنە قاراماستان, تەز قالپىنا كەلتىرە ءبىلدى. الاڭعا 87-مينۋتتا شىققان يۋليان بارندت بىردەن ەكى كەرەمەت سوققى جاساپ, قاتارعا تەز قوسىلدى. بۇدان ءارى بۋندەستيم تاعى «اتكەنشەك تەبۋدى» قايتا جالعاستىردى. قاپتالدا تيمو ۆەرنەردىڭ قايتپاس قايسارلىعى ارقاسىندا تاعى بۇرىشتاما بەلگىلەندى. ونى بەرۋگە كەلگەن ماركو رويس پەن توني كرووس قۋلىقتارىن اسىرىپ كەتتى. الدىمەن ماركو دوپتى اقىرىن جىلجىتىپ, ءدال قاسىنداعى تونيگە بەرە قويدى. ءوز كەزەگىندە كرووس ونى پاراشيۋت تارىزدەس ەتىپ ۇشىرىپ, شۆەدتەر قاقپاسىنىڭ سول جاق بۇرىشىنا سولق ەتكىزىپ تاستاي سالدى. گول! ەسەپ وسىلاي 2:1-گە جەتتى.
ءسويتىپ, F توبىنداعى گەرمانيا 2 ماتچتا 3 ۇپاي جيناپ, شۆەتسيامەن ۇپاي تەڭەستىردى. ال ءبىرىنشى ورىندا 6 ۇپايى بار مەكسيكا كەلەدى. ەندى ءبارىن ءۇشىنشى تۋردا كورەيا – گەرمانيا, مەكسيكا – شۆەتسيا اراسىندا وتەتىن ويىندار شەشەدى.
قىسقا-نۇسقا
* ماۋسىمنىڭ 25-نە دەيىن چەمپيوناتتا 32 ماتچ وينالدى.
* بۇل ويىنداردا ەڭ كوپ كەزدەسكەن ەسەپ – 1:0. ول 10 رەت تىركەلدى.
* 32 ماتچتا 85 گول سوعىلدى. ءار ماتچقا ورتا ەسەپپەن – 2,65 دوپتان.
* وسى ارالىقتا 2 فۋتبولشى الاڭنان قۋىلىپ, 97 رەت ەسكەرتۋ بەرىلدى.
* 32 ماتچتى 1 407 671 ادام كوردى. بۇل – ءار كەزدەسۋدە ورتا ەسەپپەن 43 987 كورەرمەن بولدى دەگەن ءسوز.
* جانكۇيەرلەر «لۋجنيكيدە» وينالعان رەسەي – ساۋد ارابياسى, گەرمانيا – مەكسيكا, پورتۋگاليا – ماروككو اراسىنداعى ويىنداردى 78 011 ادام تاماشالادى. بۇل – ەڭ جوعارعى كورسەتكىش.
* ەڭ از كورەرمەن ەكاتەرينبۋرگتە وتكەن ەگيپەت – ۋرۋگۆاي اراسىنداعى كەزدەسۋدە تىركەلدى. وعان
27 015 ادام جينالدى.
* وسى كەزگە دەيىن قاقپاعا 16 پەنالتي بەلگىلەنىپ, ولاردىڭ 13-ءى گولعا اينالدى. ءبىر دوپتى قاقپاشى قاعىپ الدى, ەكى فۋتبولشى قاقپادان بيىك جىبەردى.
* چەمپيوناتتا 2 حەت-تريك, 8 دۋبل جاسالدى, 5 اۆتوگول سوعىلدى.
تۋرنير تابلوسى
2-تۋر
22 ماۋسىم
سانكت-پەتەربۋرگ. برازيليا – كوستا-ريكا 2:0 گولدار: فيليپپە كوۋتينو (90+1), نەيمار (90+7)
ۆولگوگراد. نيگەريا –يسلانديا 2:0گولدار: احمەد مۋسا (49, 75)سالىنباعان پەنالتي: گيلفي تور سيگۋردسسون (83, قاقپادان جوعارى)
23 ماۋسىم
كالينينگراد.
سەربيا – شۆەيتساريا 1:2گولدار: الەكساندار ميتروۆيچ (5) – گرانيت دجاكا (52), شەردان شاكيري (90)
ماسكەۋ, «سپارتاك». بەلگيا – تۋنيس 5:2 گولدار: ەدەن ازەر (6, پەنالتي, 51), رومەلۋ لۋكاكۋ (16, 45+3), ميشي باتشۋاي (90) – ديلان برونن (18), ۆاحبي حازري (90+3)
دونداعى روستوۆ.
كورەيا – مەكسيكا 1:2 گولدار: سون حىن مين (90+3) – كارلوس ۆەلا (26, پەنالتي), حاۆەر ەرناندەس (66)
24 ماۋسىم
سوچي. گەرمانيا –شۆەتسيا 2:1 گول: ماركو رويس (48), توني كرووس (90+5) – ولا تويۆونەن (32)
نيجني نوۆگورود.انگليا – پاناما 6:1 گولدار: دجون ستوۋنس (8, 40), گارري كەين (22, پەنالتي, 51+2, پەنالتي, 62), دجەسسي لينگارد (36) – فەليپە بالوي (78)
ەكاتەرينبۋرگ.
جاپونيا – سەنەگال 2:2 گولدار: تاكاسي ينۋي (34), كەيسۋكە حوندا (78) – ساديو مانە (11), مۋسسا ۆاگە (71)
25 ماۋسىم
قازان. پولشا –كولۋمبيا 0:3گولدار: ەرري مينا (40), رادامال فالكاو (70), حۋان كۋادرادو (75)
مەرگەندەر كوشى
گارري كەين (انگليا)
كريشتيانۋ رونالدۋ (پورتۋگاليا)
رومەلۋ لۋكاكۋ (بەلگيا)
دينيس چەرىشەۆ (رەسەي)
ديەگو كوستا (يسپانيا)
ارتيوم دزيۋبا (رەسەي)
ميلە ەديناك (اۆستراليا)
لۋكا مودريچ (حورۆاتيا)
فيليپپە كوۋتينو (برازيليا)
احمەد مۋسا (نيگەريا)
ەدەن ازار (بەلگيا)
دجون ستوۋنس (انگليا)
بۇدان بولەك, 51 ويىنشى ءبىر-ءبىر گولدان سوقتى
