«نۇرلى ەرتىس» تۇرعىن ءۇي باعدارلاماسى اياسىندا نۇر-سۇلتان قالاسىنان ەكىباستۇزعا كوپبالالى وتباسىلاردىڭ توعىزىنشى لەگى, بارلىعى 36 وتباسى قونىس اۋداردى.
ەكىباستۇز قالاسى جۇمىسپەن قامتۋ ورتالىعىنىڭ مامانى ايگۇل شابەكوۆانىڭ ايتۋىنشا, بۇل جولى 179 ادام (66-سى جۇمىسقا جارامدى ەرەسەكتەر, 113-ءى بالا) كوشتى. سونىمەن مامىر ايىنان باستاپ وسى كۇندەرگە دەيىن اتالمىش باعدارلاما شەڭبەرىندە ەلوردادان ەكىباستۇزعا كوشكەن وتباسىلار سانى 205-كە جەتىپ, 1175 ادامدى قۇرادى. ونىڭ باسىم كوپشىلىگى بالالار, ياعني 790 جەتكىنشەك.
«نۇر-سۇلتان قالاسىنان ەكىباستۇزعا كوشۋگە نيەتتى وتباسىلار كوپ. مەنىڭ تەلەفونىما سونداي وتباسىلاردان كۇندە-كۇندە قوڭىراۋلار ءتۇسىپ جاتادى. تەلەفونىما تىنىم جوق دەپ ايتسام دا بولادى. شامام كەلگەنشە تەلەفون ارقىلى كەڭەس بەرىپ جاتامىن. سەبەبى الىستا بولعاننان كەيىن ءبارىن ءتۇسىندىرۋ مۇمكىن ەمەس. جالپى, ءوزىم وسى جۇمىسپەن ەلورداعا ءجيى كەلىپ تۇرامىن. سوسىن ەكىباستۇزداعى مەملەكەتتىك ورگاندار ەلوردادان قونىس اۋدارۋشىلار ءۇشىن سالىنعان ۇيلەرگە جاقىن ورنالاسقان. ولار الىسقا بارماي-اق, سول مەكەمەلەرگە بارىپ, كەرەك كەڭەستەرىن الا الادى» دەيدى ا. شابەكوۆا.
نۇر-سۇلتان قالاسىنىڭ تۇرعىن ءۇي قورى مەكەمەسىنىڭ مالىمەتىنشە, جالپى العاندا ەكىباستۇز شاھارىندا ەلوردادان قونىس اۋداراتىندار ءۇشىن 122 – ءۇش بولمەلى جانە 100 – ەكى بولمەلى پاتەرلەر سالىنعان.
«ەكىباستۇزعا كوشكەن وتباسىلاردىڭ ءبارى نۇر-سۇلتان قالاسىندا تۇرعىن ءۇي كەزەگىندە تۇرعان ەدى. تالاپتاردىڭ ءبىرى – بۇل وتباسىلاردا كەم دەگەندە كامەلەتكە تولماعان ءۇش بالا بولۋى كەرەك. بىراق ەكىباستۇزدا مەديتسينا قىزمەتكەرلەرىنىڭ ۇلكەن تاپشىلىعى بولعاندىقتان, ولار ءبىر بالاسى بار دارىگەرلەردى دە قابىلداپ جاتىر. بارعان سوڭ ولار مىندەتتى سكرينيگتەن وتەدى. وسى ۋاقىتقا دەيىن ەكىباستۇزعا كوشكەن وتباسىلاردىڭ 70 پايىزى جۇمىسقا تۇرعىزىلىپ, بالالارى بالاباقشا مەن مەكتەپتەرگە ورنالاستىرىلدى. بەرىلگەن پاتەرلەردە ولار ءبىر جىل تەگىن تۇرىپ, پاتەردى جالعا الۋ اقىسىن تولەمەي, كوممۋنالدىق تولەمدى جاسامايدى. ەكىنشى جىلى پاتەر كولەمىنە ساي اي سايىن 6-9 مىڭ تەڭگە ارالاعىندا جالعا الۋ قۇنى مەن كوممۋنالدىق تولەمدەردى تولەي باستايدى. بەس جىلدان كەيىن پاتەردى جەكەمەنشىككە تۇسىرە الادى» دەيدى نۇر-سۇلتان قالاسىنىڭ تۇرعىن ءۇي قورى مەكەمەسىنىڭ ديرەكتورى نۇرسۇلۋ قوجاحمەتوۆا.
وسى جولى ەكىباستۇزعا كوشۋگە نيەت تانىتقان ادامداردىڭ ءبىرى – ءۇش بالانىڭ اناسى بايان جولامانوۆا. ەلوردادا پاتەر كەزەگىندە ول 10 جىلدان بەرى تۇرعان.
«ون ءبىر جاسىمدا اتا-اناممەن ەلورداعا قاراعاندى وبلىسىنان كوشىپ كەلدىم. بوي جەتكەن سوڭ قورعالجىننىڭ جىگىتىنە تۇرمىسقا شىقتىم. اتا-ەنەممەن اۋىلدا ءبىر جىل تۇرعان سوڭ قايتادان استاناعا قونىس اۋداردىق. سودان بەرى وسىندامىز. ۇلكەن بالام قازىر ون ءۇش جاستا. ماماندىعىم – جالپى تاماقتانۋ سالاسىنىڭ ينجەنەر-تەحنولوگى. جۇبايىم – ەلەكتر مامانى.
ەكىباستۇزدا ءوزىمدى, جولداسىمدى جۇمىسقا تۇرعىزىپ, بالالارىمىزدى مەكتەپ پەن بالاباقشاعا ورنالاستىرامىز, ەكى بولمەلى پاتەر بەرەمىز دەدى. سوعان قاتتى قۋانىشتىمىز» دەيدى ول.
