وڭايگۇل تۇرجان
قيىلىستار مەن قۇيىلىستاردىڭ كەزەڭى,
تسيفرلار ءبىزدى –
كورمەي تۇرىپ-اق سەزەدى.
جاپىراعىمەن جەلپىگەن بولىپ جانىمدى,
ورماندار مەنىڭ وي-قيالىمدى كەزەدى.
زامانىم – وسى, مىسى باسادى جاھانداي,
سىرتىندا ءجۇرمىن, كىرۋگە ءالى باتا الماي.
سەزىمدەر – ول دا جات بولىپ, سۋىپ بارادى,
كوپىرگەن ءسوزدىڭ كەپتەلىستەرىنەن وتە الماي.
قۋرايلار ءوزىن قۇدىرەتتەردەي قايتا اشىپ,
ينستاگرامنىڭ كوشەلەرىندە بايقاسىپ,
ازاتتىق ءۇشىن قىرعىندار بولعان دالامدا,
بۇگىنگى كۇنى برەندتەر جاتىر شايقاسىپ.
قالاعا كەلسەم, ءاربىر قادامىڭ سىناق-ءدۇر,
قۇلتەمىر تۇرار سىم-سوزدەرىمەن سىناپ ءبىر.
دالاعا كەلسەم, قوبىزى سىنعان كۇيلەردىڭ,
ىرعاعى ءالى جىلاپ تۇر.
سولارعا قاراپ سان تاراۋ جولدى كەسە وتەم,
ەلۋ جىل ءوتتى, ەل جاڭا دەگەن – وسى ەكەن.
بۇگىنگى كۇنىم جايناپ تۇرسا دا,
ادامنىڭ,
باياعى كۇنىن ساعىناتىنى نەسى ەكەن؟
قارا تۇندەردى قاق جارىپ وتكەن وتتارشا,
كوڭىلدە مىنا سەزىمدەر گۇلدەپ, باق قونسا.
ايتار ەم مەن دە ساعىنىشىمدى جەتكىزەر,
ءبىر جۇتىم سويلەم تاپ بولسا!
جانات اسكەربەكقىزى
سورقۇدىققا كوشىڭدى قوندىرماعىن,
قونار بولساڭ تاتاسىڭ سوردىڭ ءدامىن.
سول ەرتەگى ىشىندە مەن دە بولعام,
سوندا ءجۇرىپ كوزىممەن كوردىم ءبارىن.
كەنجەكەيدىڭ جەلەگىن جەل ۇشىرعان,
كوزى ءتۇسىپ پەرىنىڭ, ەر ۇشىنعان.
بوز تۇماندا بوز ۇيدەن شىعا كەلىپ,
بال-ساۋمالدى وزىڭە مەن ۇسىنعام.
كوشىڭدى الىپ ىلگەرى جونەل ەندى,
جۇرتتا قالام, جاڭعىرتىپ كونە ولەڭدى.
بوز تۇماندى بۇركەنگەن سورقۇدىققا
سور ايداعان ەر توستىك نەگە كەلدى؟!
كەلدى, كەتتى… جازمىشى وسىلاي-دى,
تاعدىرىنان قاس باتىر شوشىمايدى.
ايتىپ ءجۇرمىن ءالى كۇن جولاۋشىعا
ەرنازاردىڭ ەرەكشە كوشى جايلى.
پەندەلىگىڭ شىعار-دى پەرىگە ەرسەڭ,
سۇيەنەتىن ەمەندەي سەنىم ەڭ سەن.
قايىرىلماي-اق كەتە بەر, كوشىڭ باستاپ,
سورقۇدىقتىڭ باسىنان مەنى كورسەڭ…
مىستان جاتىر مەكەن قىپ جەرتولەنى,
كەنجەكەي ءجۇر اينالىپ كەرتوبەنى.
جۇرەك-جۇرتىم كوشىرىپ الدى وزىنە
قيماسىنا اينالىپ ەرتەك ەلى…
جادىرا بايبۇلانوۆا
بيىل قىس – باسقا قىستان سالقىنىراق,
جۇرگەم جوق تۇتاس الەم شالقىپ, ۇناپ.
بىرەۋ كەپ, ءبىر-اق ساتتىك سەزىم سىيلاپ,
وزىمەن كەتكەن سىندى ارتىعىن اپ…
جاۋابىن ىزدەۋمەنەن «بۇل قالايدىڭ»,
تاڭ اتسا بىرگە اعارىپ, ءتۇن قارايدىم.
قار-قىراۋ قاتىپ قالعان جۇرەكتى كەپ,
جالاڭاش قولدارىممەن تىرنالايمىن…
تابىلسا, ىزدەگەنىم – تاپتاتقىزبان!
ارشىپ ءسال الايىنشى قاتقاق, مۇزدان.
نەگە ىزعار سوقتى مۇنشا اپپاق قاردان,
نەگە مۇڭ قالدى مۇنشا اپپاق قىزدان؟
باستاعى بولىپ بارلىق ىندەتكە ەمشى,
سول مۇڭعا سەبەپشى جان, جىر بوپ كەلشى!
جۇرەكتەن مۇز قۇرساۋلى توڭىپ قالعان,
جىلىتىپ, الاقانىمدى ۇرلەپ بەرشى.
اجار ەربولعان
بۇل كوكتەم سەن جازعان ءان سىندى,
جالعىزدىق ىشىنەن كۇلىپ تۇر.
…قايعىمدى بىتپەيتىن جول سىندى,
جاي عانا ۇمىتتىر.
قالا دا ءان سىندى كەي شاقتا,
ءمولت ەتە قالاتىن كوڭىلدەن.
جان مۇڭىن ەلەمەي قويساق تا,
جانارىن قايتەمىز ەگىلگەن؟!
سەن جازعان ءان نەگە تىم ىستىق؟
اداسقان كوڭىلىم سەكىلدى.
جولداردا جوعالعان تىنىشتىق
ءۇنسىز كەپ, مۇڭايىپ وتىردى…
P.S.
اشپاسا دا
كۇيبەڭ كۇننەن قاباعىن,
مىناۋ قالا
ادەمى عوي انىڭمەن.
تىرلىك توناپ
وزگەرسە دە جانارىڭ,
وزگەرمەشى جانىڭمەن.
تاناكوز تولقىنقىزى
مەنىڭ جۇپار يىسىمدە جالبىز بار.
جىلىتادى ول توڭدىرعاندا جاندى ىزعار.
كوپ ءنوپىردىڭ كەلە جاتسام ىشىندە
مەنى تانىپ قويادى ىلعي جالعىزدار.
مەنىڭ جۇپار يىسىمدە جالبىز ءجۇر.
سىرىن تاپپاي باقتالاسىپ سان قىز ءجۇر…
الدەكىمدى ىزدەرى حاق جان كۇزگى
الدەكىمىن تاپپاعان سوڭ جالعىز ءجۇر…
سول جالبىزدىڭ ءوزىسىڭ عوي, جۇپارىم,
ۇزىلەتىن شاعى جەتتى جۇقانىڭ…
ەڭ سوڭعى دەم سەن بوپ شىعار كەۋدەمنەن
سىنعان كەزدە سايالاعان بۇتاعىم.
مەنىڭ جۇپار بولمىسىمدا سەن ءجۇرسىڭ.
العاش سەنى كورگەنىمدەي ءمولدىرسىڭ…
سەنسىز ءومىر مۇمكىن بولسا, و, ءتاڭىرىم,
وسى كۇزدەن قالماي مەنى سەندىرسىن.
ايجان تاباراكقىزى
جۇرەتۇعىن قادىرىن بۇرىن بىلمەي,
ساعىناسىڭ كىرشىكسىز ساتتەرىڭدى.
بۇل دۇنيە ءبىر رەت سۇرىندىرمەي,
باقىتتى قىلدى دەيسىڭ, اتتەڭ, كىمدى…
گۇل جيناپ قايتاتىنداي قىر استىنان,
ءوزىڭدى-ءوزىڭ الدايسىڭ ءالى كۇنگە.
كوكتەم سايىن بۇرلەيتىن كىناسىزدەۋ,
ءبىر ءۇمىتى بار شىعار ءبارىنىڭ دە…
تاعدىر دا تاۋىسقانداي دارمەنىڭدى,
بۇل كۇندەر مۇڭعا قۇشاق جايادى ۇداي.
ەسىڭ كەتە سۇيمەيسىڭ الدەكىمدى,
كوكتەمدى دە كۇتپەيسىڭ باياعىداي…
وتكەن كۇندەر جۇرەككە نالا بولىپ,
تەرەزەدەن تۇنگە ءۇنسىز تەلمىرەمىن…
قانشا ءۇمىتىم اقپانمەن بارادى ءولىپ,
قانشا ءۇمىتىم الدايدى ەندى مەنىڭ؟!
كوز ىلەرمىن سۇراۋمەن حاقتان باقىت,
جۇرگەن سول ءبىر جان ءۇشىن جات قالادا…
…جالعىزدىقتىڭ جانارىن جاۋتاڭداتىپ,
تاعى دا كوكتەم كەلدى استاناعا…
