پرەزيدەنت نۇرسۇلتان نازارباەۆتىڭ «نۇر وتان» پارتياسىنىڭ 18-سەزىندە كوپبالالى جانە تۇرمىسى تومەن وتباسىلارعا بارىنشا الەۋمەتتىك كومەك كورسەتۋ جونىندەگى تاپسىرماسىنا وراي استانا قالاسى ءماسليحاتىنىڭ كەزەكتەن تىس 45-سەسسياسى ءوتىپ, كۇن تارتىبىندە تۇرعىن ءۇي, الەۋمەتتىك سالالارىنا قاتىستى 12 ماسەلە قارالىپ, بىرقاتار قۇجاتقا وزگەرتۋ مەن تولىقتىرۋلار ەنگىزىلدى.
ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆ استانا قالاسىنىڭ 2019-2021 جىلدارعا ارنالعان بيۋدجەتى تۋرالى جانە مەملەكەتتىك-جەكەمەنشىك ارىپتەستىك جوبالارىنىڭ تىزبەسى جايلى باياندادى. ونىڭ مالىمەتىنشە, بايقوڭىر اۋدانىنداعى اباتتاندىرۋ جۇمىستارىنا قالا قازىناسىنان قوسىمشا 134 ملن تەڭگە بولىنسە, سونىمەن قاتار الدىڭعى قارجىدان بولەك الماتى اۋدانىنا 94, سارىارقا اۋدانىنا 50 ملن تەڭگە قاراستىرىلعان.
مەملەكەت باسشىسىنىڭ پارتيا سەزىندە سويلەگەن ءسوزىن العا تارتىپ, وتكەن جىلى ەلوردا بويىنشا مەملەكەتتىك ساتىپ الۋعا بولىنگەن قارجىنىڭ 30 پايىزى عانا ءارتۇرلى كاسىپورىنعا اۋدارىلعانىن, قالعان 70 پايىز قاراجاتتىڭ تەك ءبىر كومپانيانىڭ ەسەپ-شوتىنا جولدانعانىن ايتقان دەپۋتات اقىلبەك كۇرىشباەۆ بايانداماشىدان وسىنىڭ سەبەبىن ءتۇسىندىرۋىن سۇرادى. بۇل سۇراققا قالا اكىمىنىڭ ورىنباسارى اسقار امرين بىلاي دەپ جاۋاپ بەردى:
– بىلتىرعا دەيىن مەملەكەتتىك ساتىپ الۋ جونىندەگى زاڭدا مەملەكەتتىك مەكەمەلەردىڭ ءبىر عانا كاسىپورىنمەن جۇمىس جۇرگىزۋىنە مۇمكىندىك بەرىلىپ كەلگەن. بىراق قازىر وعان وزگەرىس پەن تولىقتىرۋلار ەنگىزىلدى. ەندى وعان جول بەرىلمەيدى. بۇل ماسەلە ءبىزدىڭ ءجىتى باقىلاۋىمىزدا بولادى.
كەزەگى كەلگەندە مۇمكىندىگى شەكتەۋلى بالالاردى ۇيدە وقىتۋعا جۇمساعان شىعىندارىن ءوندىرىپ الۋ ءتارتىبى مەن مولشەرى تۋرالى شەشىمگە وزگەرىس پەن تولىقتىرۋلار ەنگىزۋ جايلى بايانداعان جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ كەڭەس وداعى اسكەرىنىڭ اۋعانستاننان شىعارىلۋىنا 30 جىل تولۋىنا وراي, ەلوردالىق مۇقتاج ازاماتتاردىڭ جەكەلەگەن ساناتتارىنا الەۋمەتتىك كومەك كورسەتىلەتىنىن مالىمدەدى.
– مۇمكىندىگى شەكتەۋلى بالالاردى ۇيدە وقىتۋعا ءوتىنىش بەرۋ تارتىبىنە وزگەرىس ەنگىزىلدى. قازىرگى ۋاقىتتا ەلەكتروندى ۇكىمەت ارقىلى ءوتىنىش بەرۋگە بولادى. سونداي-اق الەۋمەتتىك كومەك كورسەتۋ ماقساتىندا توقسان سايىن تولەنەتىن اتاۋلى كومەكتىڭ كولەمى 6,5 اەك-تەن 10 اەك-كە ۇلعايتۋ ۇسىنىلدى. سوعان وراي ۇيدە وقىتىلاتىن 228 مۇگەدەك بالانى تولىق قامتۋ ءۇشىن بيۋدجەت ەسەبىن 80 ميلليون تەڭگەگە ۇلعايتۋدى سۇرايمىز, – دەدى ا.ءابىلدينوۆ.
سونداي-اق قۇرىلىس جانە تۇرعىن ءۇي ساياساتى باسقارماسىنىڭ باسشىسى رۋسلان احمەتوۆ مەملەكەتتىك قاجەتتىلىكتەر ءۇشىن 388,6 ميلليون تەڭگەنىڭ سوماسىنداعى اۋدانى 5,7 گەكتاردى قۇرايتىن 88 جەر ۋچاسكەسىن ساتىپ الۋ جونىندەگى شارتتى جوباسىن ۇسىندى. ال الەۋمەتتىك كومەك كورسەتۋ, ونىڭ مولشەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋ ەرەجەسىنە قاتىستى ول:
– ەرەجەگە سايكەس, الەۋمەتتىك تۇرعىن ءۇي كومەگىن الۋشىلاردىڭ ساناتىنا ارناۋلى الەۋمەتتىك قىزمەت كورسەتۋگە قاتىساتىن ۇيىمدارىنىڭ قىزمەتكەرلەرىن قوسۋدى ۇسىنامىز. سەبەبى بۇل ساناتتاعىلاردىڭ ەڭبەكاقىلارى تومەن. ولاردىڭ ورتاشا جالاقىسى 70 مىڭ تەڭگەنى قۇرايدى. بۇگىندە مۇنداي قىزمەتتەگىلەر سانى 1260 بولسا, ولاردىڭ 482-ءسى – الەۋمەتتىك كومەككە مۇقتاجدار. سوندىقتان وسى ەرەجەسىنە وزگەرتۋ مەن تولىقتىرۋلار ەنگىزۋلەرىڭىزدى سۇرايمىز, – دەدى.
ءوز كەزەگىندە قوعامدىق دامۋ ىستەرى باسقارماسىنىڭ باسشىسى دانيار ەسين جاستار سارايىنىڭ 2010 جىلى ورتەنىپ, كۇنى بۇگىنگە دەيىن بوس تۇرعان وڭ قاناتىنداعى بولىگىنە جوندەۋ جۇمىستارى جۇرگىزىلىپ, بۇل جەر جاستار حابىنا اينالاتىنىن, ياعني وندا ءتۇرلى ورتالىقتاردىڭ قۇرىلىمدارى ورنالاساتىنىن اتاپ ءوتتى.
