ەلىمىزدە سوڭعى جىلدارى قىزدار اراسىنداعى بوكس سپورتى قارقىندى دامىپ كەلەدى. قولىنا بىلعارى قولعاپ كيىپ الەمدىك دودالاردا توپ جارعان بۇرىمدىلارىمىز از ەمەس. بالا كۇنىنەن ۆولەيبولدى سەرىك ەتكەن, ايتكەنمەن بەرتىن كەلە رينگتى جاعالاپ, تالاي جارىستا توپ جارعان استانالىق ريمما ۆولوسەنكو بۇگىندە قازاقستان ۇلتتىق قۇراماسىنىڭ بەلدى بوكسشىسىنا اينالىپ وتىر.
ريمما بالا كۇنىنەن كاسىپقوي بوكستى كوبىرەك كورىپ, بىلعارى قولعاپقا دەگەن قىزىعۋشىلىعى سول شاقتان باستالىپتى. مەكتەپتى ءبىتىرىپ, كوللەدجگە تۇسكەننەن كەيىن بالا كۇنگى ارمانىن جۇزەگە اسىرۋ ءۇشىن بوكسقا جازىلىپتى.
بالا كۇنگى ارمان كىمدى بولماسىن بيىككە جەتەلەيتىنى بەلگىلى. باستاپقىدا جەڭىلىستەرىنىڭ بولعانى راس. ەل بىرىنشىلىگىندە مىقتى بولعانىمەن, الەم, ازيا چەمپيوناتتارىندا لايىقتى جۇدىرىقتاسسا دا, تورەشىلەردىڭ شەشىمى بىرىنەن كەيىن ءبىرى توسقاۋىل بولا بەردى. بىراق ول جەڭىلىستىڭ اششى ءدامىن سەزىنبەي, جەڭىستىڭ وڭايلىقپەن كەلمەيتىنىن جەتە ءتۇيسىندى.
– نەگىزى, بوكستا مىناداي تۇسىنىك قالىپتاسقان. كەزدەسۋ سوڭىندا تورەشى قولىڭدى كوتەرمەسە, جەڭىلگەنىڭدى مويىنداۋىڭ كەرەك. سوندىقتان تورەشىلەر جايلى كەرەعار پىكىر ايتقاندى ءجون كورمەيمىن. ءومىر بويى جەڭىپ ءوتۋ دە مۇمكىن ەمەس. سپورت, مىنە, وسىندايىمەن قىزىق, جەڭىلىس تە بار, جەڭىس تە بولادى. ال مەن جىبەرگەن قاتەلىكتەرىممەن جۇمىس ىستەپ, الداعى جارىستاردا جەڭىسكە جەتۋ ءۇشىن دايىندىعىمدى كۇشەيتە تۇسەمىن, – دەگەن ەدى ازيا چەمپيوناتىنان كەلگەن بەتتە سۇحبات قۇرعانىمىزدا.
ءيا, ايتىلعان ءسوز – اتىلعان وق. جۇيەلى جاتتىعۋدىڭ ناتيجەسىندە باستاپقىدا جۇلدەگەرلەردىڭ قاتارىنان كورىنسە, ارتىنشا چەمپيوندىق اتاقتىڭ دا ءدامىن تاتا باستادى. تاجىريبەسى تولىسقان شاقتا قازاقستان چەمپيونى اتاندى. ارتىنشا حالىقارالىق تۋرنيرلەردە دە بىرنەشە مارتە توپ جاردى. بىرەر جىل بۇرىن مۇنايلى ەلدەر اراسىندا ۇيىمداستىرىلعان الەم كۋبوگىندا قارسىلاس شاق كەلتىرمەسە, بيىل قاڭتار ايىندا عانا سەربيادا وتكەن «ۇلتتار كۋبوگى» دوداسىندا التىننان القا تاعىپ قانا قويماي, ءتۋرنيردىڭ ۇزدىك بوكسشىسى اتاعىنا يە بولدى. ريمما بۇگىندە ۇلتتىق قۇرامانىڭ ساپىندا ەل نامىسىن قورعاپ ءجۇر.
– ءيا, بۇگىنگى تاڭدا قىزدار اراسىنداعى كاسىپقوي بوكس قارقىندى دامىپ كەلەدى. بۇل رەتتە قازاقستان بوكس فەدەراتسياسى, سونىمەن قاتار ءوزىمىزدىڭ استانا قالالىق بوكس فەدەراتسياسى تاراپىنان جۇيەلى جۇمىستار جۇرگىزىلىپ وتىر. وزدەرىڭىز بىلەسىزدەر, ءبىزدىڭ ەلىمىزدە بوكس ۇلتتىق سپورت رەتىندە قارالادى عوي. الەمدىك جارىستاردا بوكسشىلارىمىز عانا بيىك جەتىستىكتەردى باعىندىرىپ ءجۇر. ەلوردامىز استانادا 2016 جىلى وتكەن ايەلدەر اراسىنداعى الەم چەمپيوناتى تۋرالى شەتەلدىك ارىپتەستەرىمىز ءالى كۇنگە دەيىن قىزىعىپ ايتادى. سول جارىستىڭ ۇيىمداستىرىلۋ دەڭگەيى وتە جوعارى بولعانىن, ءتورت بىردەي قازاقستاندىق قۇربىمىزدىڭ الەم چەمپيونى اتانعانىن مەن دە ماقتانىپ ايتىپ جۇرەمىن.
ال ەندى وزىمە كەلسەم, باقىتىمدى وسى رينگتەن تاپقىم كەلەدى. ۇلكەن ارمانىمنىڭ ءبىرى 2020 جىلى وتەتىن توكيو وليمپياداسىندا توپ جارىپ, كۇللى الەمنىڭ الدىندا قازاقستاننىڭ مەرەيىن وسىرسەم دەيمىن. بۇل رەتتە مەن باپكەرىم بەرىك مارجىقپاەۆقا ۇلكەن ريزاشىلىعىمدى ءبىلدىرىپ, بايراقتى جارىسقا تىڭعىلىقتى دايىنداپ اپارادى دەپ سەنەمىن, – دەيدى شارشى الاڭنان باقىتىن ىزدەپ جۇرگەن ريمما ۆولوسەنكو.
تالانتتى قىزدىڭ تالابىنا ءسۇيسىنىپ قالدىم.
