كەشە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «استانا جاستارى» رەسۋرستىق ورتالىعىنىڭ ۇيىمداستىرۋىمەن جۇمىس جارمەڭكەسى ءوتتى.
شاراعا قىرىقتان استام مەكەمە قاتىسىپ, وزدەرىندە بار جۇمىس ورىندارى تۋرالى اقپاراتتارمەن ءبولىستى. ايتالىق, «Small» سۋپەرماركەتتەر جەلىسىنە ساتۋشى, كاسسير سەكىلدى ورتاڭقول ماماندار كەرەك. ال «استانا تازالىق» سياقتى كوممۋنالدىق مەكەمەلەر ينجەنەر-مەحانيككە ءزارۋ. «Business Consulting Group» حولدينگتىك كومپانيالار تەندەر جانە كونسالتينگ قىزمەتىنە ۋنيۆەرسيتەتتى ەندى تامامداعان جاستاردى باۋلىعىسى كەلەدى.
«استانا جاستارى» رەسۋرستىق ورتالىعىنىڭ باسشىسى مۇحامەدجان بولىسبەك:
– جۇمىس بەرۋشى مەن جاس ماماندار اراسىندا دانەكەر بولۋ – ءبىزدىڭ ورتالىق جۇمىسىنىڭ باسىم باعىتتارىنىڭ ءبىرى. قالاداعى 120-دان استام مەكەمەمەن كەلىسىمشارت جاساسقانبىز. ولار وزدەرىنە قاجەت مامانداردىڭ ءتىزىمىن ۇدايى جىبەرىپ وتىرادى. ءبىز ول مالىمەتتەردى جۇيەلەپ, الەۋمەتتىك جەلىگە جاريالايمىز نەمەسە وسىنداي جارمەڭكەلەردى ۇيىمداستىرامىز, – دەيدى.
جالپىلاي العاندا, استانادا IT سالاسى ماماندارى جانە ونەركاسىپ ورىندارىنداعى قاتارداعى قاراپايىم جۇمىسشىلارعا سۇرانىس جوعارى. الايدا جاستاردى قولداپ ىستەيتىن جۇمىستى قوراشسىنىپ, كەڭسە قىزمەتىنە ۇمتىلۋى ەڭبەك نارىعىنداعى تەڭسىزدىككە سەبەپ بولىپ وتىر. وسى ورايدا ستۋدەنتتەردىڭ وزىمەن دە تىلدەسىپ كوردىك. كولىك-ەنەرگەتيكا فاكۋلتەتىنىڭ ەكىنشى كۋرس ستۋدەنتى ارماننىڭ ايتۋىنشا, جۇمىس بەرۋشىلەردىڭ كوبى تولىق كۇنگە العىسى كەلەدى. ستۋدەنتتەرگە كۇن ارا نەمەسە جارتى كۇن ىستەيتىن جۇمىستار كوبىرەك قاراستىرىلسا دەگەن تىلەگىن ايتىپ قالدى.
ستۋدەنتتەر سانى جاعىنان ەلوردادا ەڭ ءىرى وقۋ ورنى سانالاتىن ەۋرازيا ۇلتتىق ۋنيۆەرسيتەتى بوس ورىندار ءجارمەڭكەسىنە ادەيى تاڭدالىپ الىنىپ وتىر. ودان كەيىنگىلەرى س.سەيفۋللين اتىنداعى قازاق اگروتەحنيكالىق ۋنيۆەرسيتەتى, قازاق تەحنولوگيا جانە بيزنەس ۋنيۆەرسيتەتىندە, جاستار سارايىندا ۇيىمداستىرىلاتىن بولادى.
ادىلبەك جاپاق
