ەلوردادا قالدىقتاردى باسقارۋ جانە «جاسىل» ەنەرگيا سالاسىن دامىتۋ ماسەلەلەرىنە ارنالعان «Green Energy & Waste Recycling Forum – GEWR’19» IV ەۋرازيالىق بيزنەس-فورۋمى ءوز جۇمىسىن باستادى.
ەلوردادا «وڭىرلەردەگى جاستارعا ىنتالاندىرۋ جۇمىسىن جۇرگىزۋ ءۇشىن تالىمگەرلەر توبىن وقىتۋدى ۇيىمداستىرۋ» اتتى سەمينار ءوتىپ جاتىر.
بۇل شارانى وتكىزۋگە «جاستار جىلى» اياسىندا اقپارات جانە قوعامدىق دامۋ مينيسترلىگىنىڭ قولداۋىمەن ازاماتتىق باستامالاردى قولداۋ ورتالىعى مۇرىندىق بولدى. جوبانىڭ ماقساتى: جاستارعا ومىردە ءوز جولىن تابۋعا باعدار بەرۋ مەن ولاردىڭ تۇلعالىق قابىلەتىن دامىتۋ جانە كاسىبي شەبەرلىگىن جەتىلدىرۋگە باعىتتالعان.
ءتورت كۇنگە جوسپارلانعان سەمينارعا ەلىمىزدىڭ ءار وڭىرىنەن كەلگەن 80-گە جۋىق جاستارعا وسى سالانىڭ تاجىريبەلى ماماندارى ءدارىس وقىپ, ءتۇرلى شەبەرلىك ساعاتتارىن وتكىزەدى. سونداي-اق جيىنعا ماسكەۋدەن حالىقارالىق دارەجەدەگى جاتتىقتىرۋشى يليا شەمەلەۆ كەلىپ, ول ەۋروپا مەن رەسەيدەگى مەنتورينگتى دامىتۋ تاجىريبەسىمەن بولىسەدى.
– ءبىز بۇل جوبانى مەملەكەتتىڭ قولداۋىمەن ىسكە اسىرىپ وتىرمىز. ارينە, بۇل جەڭىل جۇمىس ەمەس. تالىمگەرلىك تاجىريبە دامىعان ەلدەردە ەرتەدەن قالىپتاسقان. بىزدە بۇل بۇرىن بولدى, بىراق كەيىن جوعالتىپ الدىق. ماسەلەن, جاستار تاراپىنان قانشاما جوبالار قولعا الىنعانىمەن, كەيدە ونىڭ ناتيجەسى كوزگە كورىنبەيدى. ءتىپتى, اياقسىز قالادى. سونداي كەزدە تالىمگەرلەردىڭ قولداۋى كوپ ماسەلەنى شەشەدى. مەنىڭ ويىمشا, مەنتورلىق جۇمىس تەك بيزنەستە عانا ەمەس, بارلىق سالاعا قاجەت. اسىرەسە, مەملەكەتتىك ورگانداردا دا مۇنىڭ وزەكتىلىگى جوعارى. قازىرگى جاستار وتە ءبىلىمدى. بىراق ومىرلىك تاجىريبەلەرى از. سوندىقتان ولارعا اقىل ايتىپ, باعىت-باعدار بەرىپ وتىراتىن تالىمگەر كەرەك» دەدى «KAZBRANDS» قوعامدىق قورىنىڭ جاۋاپتى وكىلى نۇرلان جازىلبەكوۆ.
جالپى, بۇل جوبا ەندى قاناتىن كەڭگە جايماق. ەندى «KAZBRANDS» قورى ايماقتارعا بارىپ, جاستار اراسىندا كەزدەسۋلەر, سەمينارلار, ءتۇرلى ترەنينگتەر وتكىزەدى.
اقتوبە وبلىستىق جاستار ساياساتى ماسەلەلەرى باسقارماسىنىڭ باسشىسى نۇرلان كۇنتۋوۆ مەنتورلىق جۇمىستىڭ جاستارعا بەرەرى مول ەكەندىگىن ايتتى.
« ءبىز وبلىسقا بارعاننان كەيىن بۇل جوبا تۋرالى ءباسپاسوز ءماسليحاتىن وتكىزىپ, جاستارعا ۇگىت-ناسيحات جۇمىستارىن جۇرگىزەمىز. وعان بەلسەندى جاستاردى تارتامىز. ولاردان وزگە زامانداستارى ۇلگى الىپ, جاڭا باستامانى قولدايدى دەپ سەنەمىز. مىسالى, ءار تالىمگەر جەتى جاس ازاماتتى قامقورلىعىنا الىپ, ولاردىڭ العا قويعان ماقساتتارىن جۇزەگە اسىرۋعا كومەكتەسەدى. ءبىز بۇل جەردە شالعايداعى اۋىل جاستارىنا باسا نازار اۋدارۋدى كوزدەپ وتىرمىز» دەدى ول.
سونداي-اق جوعارى دا اتالعان قوعامدىق قور وڭىرلىك جاستار ماسەلەلەرىن تالداۋ ماقساتىندا تىڭ زەرتتەۋلەردى ۇيىمداستىرۋ ءۇشىن ساراپشىلار توبىن جيناپ, سونىڭ قورىتىندىسىمەن ينتەراكتيۆتى كارتا ازىرلەۋدى جوسپارلاپ وتىر.
