ەلوردادا بەس كۇن بويى دۇرىلدەگەن «ازيا جاڭعىرىعى» تسيرك ونەرىنىڭ ءحىى حالىقارالىق فەستيۆالىنىڭ قورىتىندىسى شىعارىلدى. ايتۋلى شاراعا ۇلىبريتانيا, ۆەتنام, مىسىر, يزرايل, يسپانيا, قىتاي, قىرعىزستان, موڭعوليا, رەسەي, تاجىكستان, وزبەكستان, ۋكراينا جانە قازاقستان سىندى الەمنىڭ 13 مەملەكەتىنەن 60-قا جۋىق ءارتىس قاتىستى.
قازىلار القاسىنىڭ ءبىراۋىزدان قابىلداعان شەشىمىمەن قىتايدىڭ «Zhang Fan» (بوس سىم) نومەرى گران-پري مەن «تسيرك ونەرىنىڭ دامۋىنا قوسقان ۇلەسى ءۇشىن» ماراپاتىنا يە بولدى.
«اسا جوعارى ورىنداۋشىلىق شەبەرلىگى مەن كاسىبيلىگى ءۇشىن» اتالىمىندا باس جۇلدەنى شىمكەنتتىك تسيرك ءارتىسى ولەگ كاساتكين جەتەكشىلىك ەتكەن «بايقوڭىر» نومەرى, الماتىلىق ادىلەت تيكانوۆتىڭ جەتەكشىلىگىمەن قويىلعان «وتپەلى باسپالداق» نومەرى جانە رەسەيلىك ەكۆيليبر ولەسيا فەدوتوۆانىڭ «اي ارمانى» اتتى دوپپەن كورسەتكەن نومەرى ءوزارا ءبولىستى. الماتى ارتىستەرىن اتالعان نومەرمەن بەلارۋس مەملەكەتتىك تسيركىنىڭ ديرەكتورى ۆلاديمير شابان مينسك قالاسىنا ونەر كورسەتۋگە شاقىردى. وسى اتالىمدا ەكىنشى جانە ءۇشىنشى ورىن جۇلدەرى يەلەرىن تاپتى. 
بۇعان قوسا, بىرنەشە ارنايى سىيلىق تاپسىرىلدى. «پىلدەرمەن جەر ءجۇزىن اينالىپ شىعۋ» اتتراكتسيونىنىڭ جەتەكشىسى رەسەيلىك اندرەي دەمەنتەۆ-كورنيلوۆ نۇر-سۇلتان قالاسى اكىمىنىڭ سىيلىعىن, وزبەكستاندىق ومۋربەك مولدوكماتوۆ «كوگەرشىندەرمەن يلليۋزيالىق شوۋ» كورسەتكەنى ءۇشىن جانە ۋكرايندىق سايقىمازاق پەتر گوروديتسكي «Petrucho Nero» نومەرى ءۇشىن استانالىق تسيركتىڭ سىيلىعىن يەلەندى.
سول سياقتى قازاق مەملەكەتتىك تسيركىنىڭ, ەرەۆان مەملەكەتتىك تسيركىنىڭ, ءماياميدىڭ فاەربيورد پروداكشن كومپانياسىنىڭ, «تسيرك ارتىستەرى قاۋىمداستىعى» قوعامدىق ۇيىمىنىڭ, «شىمكەنت-تسيرك» مەكەمەسىنىڭ, ۋكراينا مەملەكەتتىك تسيركىنىڭ, ۇلكەن ۆارشاۆا تسيركىنىڭ, وزبەك مەملەكەتتىك تسيركىنىڭ جۇلدەلەرى بەرىلدى.
Alisa Shehter (يزرايل) «Torn» نومەرىمەن «لاتينا» حالىقارالىق تسيرك فەستيۆالىنە, بريدج ليچنەر (يسپانيا) «سولو-تراپەتسيا» نومەرىمەن يۋ. نيكۋلين تسيركىنىڭ ماسكەۋ حالىقارالىق جاستار فەستيۆالى-بايقاۋىنا شاقىرتۋ الدى.
