1 قازان – حالىقارالىق مۋزىكا كۇنى. وسىعان وراي استانا قالاسى مەملەكەتتىك اكادەميالىق فيلارمونياسى سەنبى كۇنىنىڭ كەشىندە, ساعات 18.00-دە كونگرەسس-حولل ساحناسىندا باستالاتىن «تاقيالى پەرىشتە» كينوكونتسەرتىنە شاقىرادى.
قازاق كينو ونەرىنىڭ ساڭلاعى, كسرو-نىڭ حالىق ءارتىسى شاكەن ايمانوۆ تۇسىرگەن «تاقيالى پەرىشتە» مۋزىكالىق كومەدياسى جارىق كورگەنىنە جارتى عاسىرعا جۋىقتاسا دا, كورەرمەندەردى ءالى كۇنگە دەيىن جالىقتىرماعان فيلمگە اينالدى.
ەلوردالىق فيلارمونيا كومەدياداعى ءبارىمىزدىڭ ەزۋىمىزگە كۇلكى ۇيىرەتىن وقيعالاردى جاڭعىرتىپ, سۇيىكتى كەيىپكەرلەرمەن قايتادان قاۋىشتىرماق. اتاپ ايتساق, فيلمدە ءامينا ومىرزاقوۆا سومداعان تانا شەشەيدىڭ رولىندە قر ەڭبەك سىڭىرگەن ءارتىسى ايجان سالاەۆا كورىنەدى.
نياز اقساقالدىڭ ءرولى قازاقستان جاستار وداعى سىيلىعىنىڭ يەگەرى نۇراي تاناباەۆقا تاپسىرىلسا, باسىنان تاقياسىن تاستامايتىن تايلاقتىڭ بەينەسىن كامەرالىق حوردىڭ جەكە ورىنداۋشىسى راسۋل نوگەربەكوۆ الىپ شىقپاق.
تايلاقتىڭ جۇرەگىن جاۋلاعان ايشانىڭ ءرولىن ەسترادالىق ءانشى مارجان مىرزابەكوۆا سومدايدى. ايشاعا كەرەعار كەيىپكەر – التىنشاشتى تاعى ءبىر ەسترادالىق ءانشى گۇلميرا جۇمابەكوۆا وينايدى. قىزدار جاتاقحاناسىنىڭ كومەندانتى جامال اپانىڭ بەينەسىن اكتريسا ماقپال سۇلەيمەنوۆا سومداماق.
كينوكونتسەرتتى قويۋ يدەياسىنىڭ اۆتورى – استانا قالاسى مەملەكەتتىك اكادەميالىق فيلارمونياسىنىڭ باس ديرەكتورى-كوركەمدىك جەتەكشىسى ساكەن ءابدىراحمانوۆ.
كومەديا ونداعى وقيعالارمەن عانا ەمەس, تاماشا مۋزىكامەن دە كورەرمەننىڭ ەسىندە ساقتالادى. فيلمدە ايتىلاتىن اندەردىڭ سوزدەرى قازاقتىڭ كورنەكتى اقىنى جۇبان مولداعاليەۆ پەن تالاي تاماشا ءان ماتىندەرىن جازعان لەونيد دەربەنەۆتىڭ قالامىنان تۋعان. ال «تاقيالى پەرىشتەنىڭ» مۋزىكاسى – شاكەن ايمانوۆ پەن لەونيد گايدايدىڭ فيلمدەرىن مۋزىكامەن كوركەمدەگەن كومپوزيتور الەكساندر زاتسەپيننىڭ تۋىندىسى.
سونداي-اق, كينوكونتسەرتتە كامەرالىق حور ارتىستەرى, «شالقىما» حالىق بي ءانسامبلى جانە جەكە ورىنداۋشىلار كورىنەدى. انا تۋرالى ءاندى بيبىگۇل جانۇزاق ورىنداسا, «گۇل الماتى» سىندى الاتاۋ باۋرايىنداعى اسەم قالانى اسقاقتاتاتىن اندەردى نۇربول بالاپانوۆ ايتادى.
امانعالي قالجانوۆ
