بالالار ءۇشىن ەڭ كەرەمەت كەزەڭ قىسقى دەمالىس ەكەنى ءسوزسىز. بىرەۋلەر بوس ۋاقىتىندا شاڭعى تەپسە, ەندى ءبىرى قالا سىرتىنداعى تۋريستىك بازالارعا بارىپ دەمالادى. سونداي-اق وقۋشىلار شاھارداعى مۇز ايدىندارىنا بارىپ, جاڭا جىلدان كەيىنگى قىسقى دەمالىسىن ءتيىمدى ءارى كوڭىلدى وتكىزىپ ءجۇر.
قىسقى دەمالىس كۇندەرى بالالاردىڭ بوس ۋاقىتىن قىزىقتى وتكىزگەن ءىس-شارالاردىڭ ءبىرى – ءال-فارابي جانە ماحامبەت وتەمىسۇلى اتىنداعى وقۋشىلار سارايىندا وتكىزىلگەن تەاترلاندىرىلعان قويىلىم تۇرىندەگى جاڭا جىلدىق مەرەكە. وسى قوسىمشا ءبىلىم بەرۋ ۇيىمدارىندا وقۋشىلار اراسىندا ۆولەيبول, باسكەتبول, جۇزۋدەن سپورت تۋرنيرلەرى وتكىزىلۋدە.
بالالاردىڭ دەمالىسى كەزىندە ەلوردادا شىعارماشىلىق بىرلەستىكتەر, تەحنيكالىق ۇيىرمەلەر مەن وقۋشىلار سارايىنداعى سپورت سەكتسيالارى, تەحنيكالىق شىعارماشىلىق ورتالىق, «وركەن» بالالار مەن جاسوسپىرىمدەر دەنە تاربيەسى ورتالىعى, استانا قالاسى اكىمدىگىنىڭ بالالار مەن جاسوسپىرىمدەردىڭ تۋريزم جانە ولكەتانۋ ورتالىعى, سونداي-اق كومميۋنيتي-ورتالىقتار مەن فيليالدارى جوسپار بويىنشا جۇمىس ىستەيدى. وعان 24000-نان استام بالا قاتىسۋدا.
ءال-فارابي اتىنداعى وقۋشىلار سارايىندا ەلوردالىق پىكىرسايىسشىلارعا ارنالعان «Astana Debate Weekend» قىسقى اكادەمياسى ۇيىمداستىرىلدى. وعان 50 جوعارى سىنىپ وقۋشىلارى قاتىسىپ, بەلسەندىلىك تانىتتى.
6 قاڭتاردا ماحامبەت وتەمىسۇلى اتىنداعى وقۋشىلار سارايىندا استانا قالاسى مەكتەپىشىلىك جانە ستۋدەنتتىك پارلامەنت پرەزيدەنتتەرىنە ارنالعان «باعامى بيىك بەلەس» اتتى تيمبيلدينگ ءوتتى.
تشو بازاسىندا «پروداكشن 24» ۇيىرمەلەرى اراسىندا اۆتومودەلدەۋ جانە سۋدومودەلدەۋ بويىنشا جارىس وتەدى.
«وركەن» بالالار مەن ءجاسوسپىرىمدەر دەنە تاربيەسى ورتالىعى قىسقى دەمالىس كۇندەرى تازا اۋادا جانە قالا مەكتەپتەرىنىڭ سپورت زالدارىندا وتەتىن سپورت-ساۋىقتىرۋ ءىس-شارالارىنا ەرەكشە كوڭىل بولەدى. شاڭعى سەرۋەندەرى مەن جاپپاي سىرعاناۋ, 6-10-سىنىپتار اراسىندا ۆولەيبولدان جارىس جانە 1-5-سىنىپتار اراسىندا شاحمات-دويبى ءتۋرنيرى, دەنساۋلىق سپارتاكياداسى ۇيىمداستىرىلدى. تسەلينوگراد اۋدانىنىڭ «جاس شابىت» ورتالىعىنىڭ تاربيەلەنۋشىلەرى ءۇشىن ۇيىرمەلەر مەن سەكتسيالارعا بارۋ, سونداي-اق ماحامبەت وتەمىسۇلى اتىنداعى وقۋشىلار سارايىنىڭ تاريحىمەن تانىسۋ قىزىقتى ءارى ەستە قالارلىق وقيعا بولدى.
قىسقى كانيكۋل كەزىندە ورتا ءبىلىم بەرۋ ۇيىمدارىندا مادەني-بۇقارالىق ءىس-شارالارعا: ادەبي, مۋزىكالىق جانە تاريحي ۆيكتورينالارعا, مۇراجايلارعا ەكسكۋرسيالارعا, كينوتەاترلارعا بارۋعا ەرەكشە كوڭىل بولىنەدى. «وقۋعا قۇشتار مەكتەپ» جوباسى اياسىندا باستاۋىش سىنىپ وقۋشىلارىنا ارنالعان ءبىلىم بەرۋ ۇيىمدارىنىڭ كىتاپحانالارىندا «ون كىتاپ – ون قىزىقتى وقيعا» اتتى وقۋلار وتكىزىلەدى.
ەسىل اۋدانىنىڭ مەكتەپتەرىندە «قىسقى قىزىقتار» اتتى بالالار سۋرەتتەرىنىڭ كورمەسى ۇيىمداستىرىلدى. الماتى اۋدانى مەكتەپتەرىنىڭ ورتا بۋىن وقۋشىلارى اراسىندا «جاڭا جىلدىق اككوردتار» اتتى مۋزىكا چەللەندجى ءوتتى.
بارلىق ءبىلىم بەرۋ ۇيىمدارىندا باستاۋىش سىنىپ وقۋشىلارى ءۇشىن حوببي-كلۋبتار جۇمىس ىستەيدى. جانە بالالار قاردان قالاشىق جاسايدى.
قالا مەكتەپتەرى تۇڭعىش پرەزيدەنت مۇراجايىمەن بىرلەسىپ, مەكتەپ وقۋشىلارىنا ارنالعان «مەنىڭ قالامنىڭ ەسكەرتكىشتەرى» اتتى ولكەتانۋ ۆيكتوريناسىن ۇيىمداستىردى.
بارلىق وتكىزىلەتىن ءىس-شارالار ەلوردالىق وقۋشىلاردىڭ بوس ۋاقىتىن ۇيىمداستىرۋعا, ولاردىڭ وي-ءورىسىن كەڭەيتۋگە جانە تولىققاندى ءارى قىزىقتى ۋاقىت وتكىزۋگە باعىتتالعان.
ەلوردالىق وقۋشىلار وسىلايشا تازا اۋامەن تىنىستاپ, قىسقى سپورت تۇرلەرىمەن اينالىسىپ, قالاداعى ءتۇرلى زياتكەرلىك, مادەني ءىس-شارالارعا قاتىسىپ, قىسقى دەمالىسىن كوڭىلدى وتكىزۋدە.
