ەلوردادا «ءدىن – تاربيەنىڭ رۋحاني تىرەگى» اتتى تاقىرىپتا قوعامدىق تاماقتاندىرۋ جانە سەرۆيس كوللەدجىنىڭ ستۋدەنتتەرىمەن كەزدەسۋ ءوتتى.
نۇر-سۇلتان قالاسىنىڭ جاستار ساياساتى ماسەلەلەرى باسقارماسى جانە نۇر-سۇلتان قالاسى اكىمدىگىنىڭ «استانا جاستارى» كمم ۇيىمداستىرۋىمەن وتكەن شارادا نۇر-سۇلتان قالاسى ءدىن ىستەرى باسقارماسىنىڭ باسشىسى نۇرداۋلەت ءيمانالىۇلى جاستاردىڭ كوكەيىندەگى كوپتەگەن ساۋالدارعا جاۋاپ بەردى. ءدىننىڭ قوعام مەن مەملەكەتتى ورتاق قۇندىلىقتار توڭىرەگىنە توپتاستىراتىن سەنىم بولۋىمەن قاتار, ءبىر مەزگىلدە الەۋمەتتىك الاۋىزدىقتار دا تۋعىزاتىن نازىك ورتا ەكەنى, قوعامداعى ءتۇرلى الاۋىزدىقتىڭ دەنى ءدىني ساۋاتسىزدىقتان پايدا بولىپ جاتاتىنى تىلگە تيەك ەتىلدى.
– سوندىقتان مەملەكەت پەن قوعامعا جۇكتەلگەن مىندەتتەردىڭ ءبىرى دىنگە قىزىعۋشىلىق تانىتقان توپتىڭ باسىم بولىگى بولىپ تابىلاتىن جاستاردىڭ بويىندا ۇلتتىق سانا مەن ءدىني تانىمدىق پوزيتسياسىن قالىپتاستىرۋ كەرەك, – دەدى باسقارما باسشىسى. سونىمەن قاتار ول كۇماندى ءدىني قوعامداستىقتارعا جازىلۋ, دەسترۋكتيۆتى ماتەريالداردى تاراتۋ, باسقا پلاتفورمالارعا جىبەرۋ, رەپوستتار اكىمشىلىك قۇقىق بۇزۋشىلىق تۋرالى كودەكستىڭ 453 جانە 490-باپتارىنىڭ بۇزىلۋىنا اكەلەتىنىن اتاپ ءوتتى.
باۋىرجان سەگىزباەۆ
