استانا قالاسى ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن ورتالىق بالالار جانە جاسوسپىرىمدەر كىتاپحاناسىندا بەلگىلى تەلەجۇرگىزۋشى, پروديۋسەر, تاريحي تۇلعالار تۋرالى دەرەكتى فيلمدەردىڭ اۆتورى مايا بەكباەۆامەن كەزدەسۋ ءوتتى.
حالىقارالىق ايەلدەر كۇنىنە ورايلاستىرىلعان شارانى اشقان ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان مادىباەۆا اتالمىش كەزدەسۋ كىتاپحاناشىلار مەن وقىرمانداردىڭ تىلەگىمەن ءوتىپ وتىرعانىن اتاپ ءوتتى. تەلەجۇرگىزۋشى ءوز تاراپىنان جۇمىسى جايلى ايتا كەلە, بيىل تۇلعالاردىڭ مەرەيتويىنا وراي بىرنەشە دەرەكتى فيلم تۇسىرگەنىن, اتاپ ايتقاندا, مانشۇك مامەتوۆا, ماعجان جۇماباەۆ, مۇحتار اۋەزوۆ جايلى تۋىندىلار كورەرمەنگە جول تارتقانىن جەتكىزدى. ولاردى اۆتوردىڭ YouTube ارناسىنان تاماشالاۋعا بولادى. قازىر بيىلعى 135 جىلدىعىنا وراي امىرە قاشاۋباەۆ جايىندا دەرەكتى ءفيلمنىڭ ءتۇسىرىلىمى ءجۇرىپ جاتىر.
مايا بەكباەۆا بالالىق شاعى تۋرالى ايتقاندا, كىتاپقا قۇمارلىعىن اناسى وياتقانىن, تاباندىلىق اكە قانىمەن كەلگەنىن, تاريحقا قىزىعۋىنا جۇبايىنىڭ اسەرى بولعانىن ايتتى. ال اتاسى, ۇلى وتان سوعىسىنا قاتىسۋشى اسىلحان بەكباەۆ حالىقتى اعارتۋ ىسىمەن اينالىسىپ, كوپ جىل سەمەيدەگى پەداگوگيكالىق ينستيتۋتتى باسقارعان. تاريحي تۇلعالار جايىندا دەرەكتى فيلمدەردى تۇسىرۋىنە اتاسىنىڭ اڭگىمەلەرى دە ىقپالىن تيگىزدى.
دەرەكتى فيلم جوباسىمەن اينالىسا باستاعانىنا ون جىلعا جۋىقتاپ قالعانىن ايتقان تەلەجۇرگىزۋشى وسى ۋاقىتقا دەيىن 100-دەن استام فيلم تۇسىرگەنىن, باستاپقىدا ساياسي قۋعىن-سۇرگىنگە ۇشىراعان ساكەن سەيفۋللين, ءاليحان بوكەيحان, احمەت بايتۇرسىنۇلى تۇلعالارىن العانىن, ارحيۆتىك قۇجاتتاردى قايدان الاتىنىن ايتتى.
– بۇرىن كوپتەگەن قۇجات, ناقتى قىلمىستىق ىستەر رەسەيدىڭ فەدەرالدى قاۋىپسىزدىك قىزمەتىنىڭ ارحيۆىندە ەدى. سول ۋاقىتتا ولارعا قول جەتكىزۋگە بولاتىن. قازىر بىلمەيمىن, بىراق بۇل ءىس قيىنداپ كەتتى دەپ ەستيمىن. ال ەلىمىزدە باستاپقىدا ۇلتتىق ارحيۆتەن كوپ دەرەك الدىم. بۇل ىستە ءارحيۆتىڭ سول كەزدەگى ديرەكتورى, تاريحشى مارات ابسەمەتوۆتىڭ كومەگى كوپ ءتيدى. العاشقى سپيكەرىم دە سول كىسى ەدى. الماتىدان دا قۇجاتتار الدىردىم. سونىڭ ءبىرى – جۇمات ءشانيننىڭ ءىسى. بىراق ماعان قۇجاتتاردى الىپ كەلگەن ادامدار ونىڭ ۇستىنەن «دومالاق ارىز» جازعانداردىڭ اتى-ءجونىن كورسەتپەي, كولەگەيلەپ تۇردى. زاڭ بويىنشا بولۋى كەرەك, ولاردىڭ ەسىمىن اشۋعا بولمايدى ەكەن. سەبەبى ولاردىڭ ۇرپاعى ارامىزدا ءجۇر. سوسىن ماعان تاريحشىلار كومەكتەسەدى. دەرەكتى فيلمدەردەگى سول دەرەكتەردى «حابار» تەلەارناسى تسەنزۋراسىز ەفيرگە وتكىزە مە؟ مەن ءۇشىن ماڭىزدىسى سول ەدى. ويتكەنى وسى ارنا سول جوبانىڭ تاپسىرۋشىسى بولدى. سوندا فيلمدەر كەسىلمەي شىققانىنا تاڭعالدىم, – دەدى مايا بەكباەۆا.
كەزدەسۋ بارىسىندا قوناققا ەلىمىزدە كىتاپحانا ءىسىن وركەندەتۋگە مول ۇلەس قوسقان روزا بەردىعاليەۆا تۋرالى دەرەكتى فيلم ءتۇسىرۋ ۇسىنىلدى. مايا بەكباەۆانىڭ «مانشۇك مامەتوۆا: «حالىق جاۋىنىڭ» قىزى» دەرەكتى ءفيلمى كورسەتىلىپ, وقىرماندار «ايەل كەلبەتى…» كىتاپ كورمەسىمەن تانىستى.
