جاقىندا «الجير» مەموريالدى-مۇراجاي كەشەنىندە مەملەكەت جانە قوعام قايراتكەرى, ساياسي قۋعىن-سۇرگىن قۇربانى جانايدار سادۋاقاسوۆتىڭ 125 جىلدىعىنا ارنالعان «عيبراتتى عۇمىر» اتتى كورمە اشىلىپ, دوڭگەلەك ۇستەل ءماجىلىسى ءوتتى.
شاراعا الاش ارداقتىسىنىڭ تۋىستارى, تاريح عىلىمدارىنىڭ دوكتورى, پروفەسسور بۇركىتباي اياعان, تاريحشى عالىمدار امانگەلدى قاشقىمباەۆ, جاباي قاليەۆ, قۇندىزاي ەرىمبەتوۆا, مەملەكەت تاريحى ينستيتۋتى عىلىمي اقپارات ءبولىمىنىڭ باسشىسى, اقىن سەرىك سەيىتمان, ى.التىنسارين اتىنداعى «BINOM» مەكتەبىنىڭ ۇستازدارى مەن وقۋشىلارى قاتىستى.
كورمەگە ج.سادۋاقاسوۆتىڭ وتباسىلىق فوتوسۋرەتتەرى, ءتۇرلى مەملەكەتتىك لاۋازىمداردى اتقارۋ بارىسىندا قول قويعان قۇجاتتارى, ماقالالارى مەن جەكە زاتتارى قويىلعان.
عالىمدار قازاق زيالىسىنىڭ ونەگەلى ءومىرى مەن قاجىرلى قىزمەتى تۋرالى تاريحي فاكتىلەرمەن, ال تۋىستارى ەستەلىكتەر مەن ءومىربايانىنا قاتىستى تىڭ دەرەكتەرمەن ءبولىستى. سونداي-اق, ەلدىڭ الەۋمەتتىك-ەكونوميكالىق جانە رۋحاني-مادەني دامۋىنا قوسقان ۇلەسى جايلى ناقتى دەرەكتەر مەن مالىمەتتەر ايتىلدى.
سول كۇنى «الجير» مۇراجايى قۇندى جادىگەرمەن تولىقتى. جانايدار سادۋاقاسوۆتىڭ تۋعان باۋىرىنىڭ ۇرپاعى پەريزات قۇرمانقىزى مۇراجاي قورىنا جانايدار كيگەن جيلەتكانى سىيعا تارتتى. كورنەكتى تۇلعانىڭ كيىمىن جانايدار سادۋاقاسوۆتىڭ كەنجە ءىنىسى قۇرمان سادۋاقاسۇلىنىڭ وتباسى بۇگىنگە دەيىن كوزىنىڭ قاراشىعىنداي ساقتاپ كەلگەن.
