نۇر-سۇلتان قالاسىندا بىرنەشە جىل كولەمىندە «Red bus» اتتى ەكسكۋرسيالىق اۆتوبۋستار قالا قوناقتارىنا قىزمەت كورسەتىپ كەلە جاتىر. كوپشىلىك قوس قاباتتى قىزىل اۆتوبۋستار دەپ اتايتىن بۇل كولىكتەرگە ءمىنىپ, ەكى ساعات ىشىندە شاھاردىڭ كورىكتى جەرلەرىن ارالاپ شىعۋعا بولادى. باس قالاداعى تۋريزم سالاسىنداعى قىزمەت كورسەتۋدىڭ ساپاسىن انىقتاۋ ماقساتىندا اتالمىش اۆتوبۋستارعا قالالىق ءماسليحات دەپۋتاتتارى وتىرىپ, بەلگىلەنگەن مارشرۋتپەن ءجۇرىپ ءوتتى.
التى جەردە ايالدايدى
ەكسكۋرسيالىق اۆتوبۋستار قالا تۇرعىندارىنا «دۋمان» اتاۋىمەن تانىس «Ailand» وتباسىلىق ويىن-ساۋىق ورتالىعى مەن «استانا-بايتەرەك» مونۋمەنتىنەن تاڭەرتەڭ ساعات 10.00-10.30-دا قوزعالىپ, 20.00-گە دەيىن كۇنىنە بىرنەشە رەت سول جاعالاۋدى اينالىپ شىعادى. ءبىر اينالىم 30 شاقىرىمدى قۇرايدى. اۋديوگيد ارقىلى قالا تۋرالى قازاق, ورىس, اعىلشىن, قىتاي, نەمىس, تۇرىك, فرانتسۋز جانە يسپان, جالپى العاندا سەگىز تىلدە اقپارات بەرىلەدى.
بيلەتتىڭ باعاسى ەرەسەكتەرگە – 3 مىڭ تەڭگە, زەينەتكەرلەر مەن ستۋدەنتتەرگە, بالالار مەن جاسوسپىرىمدەرگە – 2 مىڭ تەڭگە. بەس جاستان تومەن بالالار تەگىن جۇرەدى. بيلەتتەر 24 ساعاتقا جارامدى. ولاردى اۆتوبۋستىڭ وزىندە جانە «استانا-بايتەرەك» پەن «Ailand» جانىنداعى كيوسكىلەردەن ساتىپ الۋعا بولادى. ءبىر اۆتوبۋسقا 60 ادام سىيادى. جالپى, قالا قوناقتارىنا وسىنداي ءۇش اۆتوبۋس قىزمەت كورسەتەدى.
اۆتوبۋستار التى جەردە – «Ailand», «حان شاتىر» ورتالىقتارى, «ماڭگىلىك ەل» سالتانات قاقپاسى, «نۇر الەم» سفەراسى, ۇلتتىق مۋزەي جانە «استانا-بايتەرەك» مونۋمەنتى ماڭايىندا ايالدايدى. ۋاقىتىڭىزعا قاراي ولارعا وسى ايالدامالاردان ءمىنىپ, تۇسۋگە بولادى. قالادا قاتىنايتىن قوعامدىق كولىكتەر سياقتى بۇل اۆتوبۋستار «Astrabus», «Infobus» موبيلدىك قوسىمشالارىنا قوسىلعان. وندا ولار «701 ەكسكۋرسيالىق باعدار» دەپ كورسەتىلگەن. سونداي-اق, اۆتوبۋستىڭ ورنالاسقان جەرىن ءبىلۋ ءۇشىن ءتيىستى call-ورتالىققا قوڭىراۋ شالۋعا بولادى.
شاھاردىڭ جانى – ەسكى قالادا
دەپۋتاتتار ەكسكۋرسيالىق اۆتوبۋستار باعدارىنان ءبىر ولقىلىقتى بايقادى. «تۋريستەر وسى اۆتوبۋستارعا ءمىنىپ, سول جاعالاۋدى ارالاپ شىعادى ەكەن. بىراق قالا سول جاعالاۋدان عانا تۇرمايدى عوي. كەز كەلگەن قالانىڭ ءوز تاريحى بار. قالامىزدىڭ تاريحى 200 جىلعا جۋىقتايدى. وڭ جاعالاۋدا «اربات», ساكەن سەيفۋللين مۇراجايى, بۇرىنعى تىڭ يگەرۋشىلەر سارايى – قازىرگى «استانا» كونتسەرت زالى, كوپەس كۋبريننىڭ ءۇيى سىندى تاريحي عيماراتتار ورنالاسقان. بولاشاقتا سوڭعى اتالعان نىساندا ولكەتانۋ مۋزەيى اشىلماق. رەسپۋبليكا داڭعىلىنىڭ ءوزى – ءبىر تاريح. سول داڭعىلدا تاعى اسكەري-تاريحي مۋزەي ورىن تەپكەن. سوندىقتان اۆتوبۋس باعدارىن وڭ جاعالاۋدان وتەتىندەي ەتىپ تە قۇرۋ كەرەك. وسىدان ءۇش جىل بۇرىن قالاداعى تۋريستىك قىزمەتكە جاۋاپتى «استانا كونۆەنشن بيۋرو» باسشىلىعىمەن بۇل تۋرالى سويلەسكەنبىز» دەدى دەپۋتات ميراس شەكەنوۆ.
ونىڭ ارىپتەسى رامزيا ومىرباەۆا اتاقتى №306 جانە 310-اتقىشتار ديۆيزيالارى ەسكى قالادا, قازىرگى «قازاقتەلەكوم» مەكەمەسى ماڭايىندا قۇرىلعانىن, وڭ جاعالاۋدا ءاليا مولداعۇلوۆانىڭ ەسكەرتكىشى دە بار ەكەنىن ەسكە سالدى. «ەكسكۋرسيالىق اۆتوبۋستاردا قالانىڭ ەسكى تاريحى تۋرالى وتە از ايتىلادى. ءار كوشەنىڭ ءوزى – ءبىر-ءبىر تاريح» دەدى ول. دەپۋتات قاراقات ابدەن قازىرگى م.گوركي اتىنداعى مەملەكەتتىك اكادەميالىق ورىس دراما تەاترى دا تاريحي عيمارات ەكەنىن ايتتى. اۋديوگيدتە مۋزىكا كوپتىگىنە, ءماتىننىڭ ازدىعىنا نازار اۋداردى.
دەپۋتاتتاردى ارالاتقان «استانا كونۆەنشن بيۋرو» جشس تۋريستىك ينفراقۇرىلىمدى دامىتۋ دەپارتامەنتىنىڭ باسشىسى سايات قۇسايىنوۆ ەكسكۋرسيالىق اۆتوبۋستار العاشقى جىلدارى وڭ جاعالاۋعا بارعانىن, بىراق كەيىننەن باعدار وزگەرتىلگەنىن جەتكىزدى.
«كەرەمەت» مونشاسى تۋرالى تۋريستەرگە ايتامىز. بىراق قالا تاريحى جايلى تام-تۇمداپ قانا ءسوز قوزعايمىز. مونشا كەز كەلگەن قالادا بار. تۋريستەرگە مىندەتتى تۇردە ەسكى قالانى كورسەتۋ كەرەك. شاھاردىڭ جانى – ەسكى قالادا. ال تۋريستەر سول جاعالاۋدان ونىڭ جانىن كورمەيدى» دەگەن م.شەكەنوۆ «قازاقتەلەكوم» مەكەمەسىنە 310-اتقىشتار ديۆيزياسى تۋرالى ءمۇيىس جاساۋدى ۇسىنعانىن دا ايتا كەتتى.
دەپۋتاتتار ەكسكۋرسيالىق اۆتوبۋس بيلەتىنىڭ باعاسى تۋرالى پىكىر الماستى. بىرەۋلەرىنە 3 مىڭ تەڭگە تىم ارزان بولىپ كورىندى. بىرەۋلەر ءبىر وتباسىدان ءۇش-ءتورت ادام مىنەتىن بولسا, وندا قالتاعا اجەپتاۋىر سالماق تۇسەتىنىن ايتتى. اقىرى قوناق رەتىندە ەل وڭىرلەرىنەن كەلەتىن ادامدار مەن شەتەلدىك تۋريستەر سالىستىرۋعا كەلمەيتىنىنە توقتادى. مىسال رەتىندە سانكت-
پەتەربۋرگ قالاسىنداعى «ەرميتاج» مۋزەيىن كەلتىردى. وندا رەسەيلىكتەر مەن شەتەلدىكتەرگە ءارتۇرلى باعا قويىلعان.
جەراستى وتكەلىن سۋ الۋ توقتاي ما؟
كوكتەمدە ءماسليحات دەپۋتاتتارى قالاداعى مادەني نىسانداردى ارالاعاندا «ماڭگىلىك ەل» سالتانات قاقپاسىنا اپاراتىن جەراستى وتكەلىنىڭ توبەسىنەن سۋ اعاتىنىن انىقتاعان ەدى. وسى جولى ولار سودان بەرى نە وزگەرگەنىن ءبىلۋ ءۇشىن بۇل نىسانعا قايتا ات باسىن بۇردى. «سىزدەر ماسەلەنى كوتەرگەننەن كەيىن نىساننىڭ كىرەبەرىسىن تەكسەرۋگە قارجى ءبولىندى. قازىر ءتيىستى كونكۋرس جاريالاندى. تەكسەرىس جۇمىستارى اياقتالعان سوڭ ءارى قاراي نە ىستەۋ كەرەكتىگى, جوندەۋگە قانشا قارجى كەتەتىنى بەلگىلى بولادى. سالتانات قاقپاسى مۋزەي رەتىندە جۇمىسىن توقتاتقان جوق. ەكسكۋرسيا جۇرگىزۋشىلەرىمىز بار» دەدى
تاريحي-مادەني مۇرا نىساندارىن جانە ەسكەرتكىشتەردى ساقتاۋدى قامتاماسىز ەتۋ جونىندەگى ديرەكتسيانىڭ ديرەكتورى مەيرامباي ورالوۆ.
«قىسقى اربات» اشۋدى ۇسىندى
سونداي-اق, ول نىساننىڭ جەراستى وتكەلىندەگى شارشى مەترلەردى قولونەرمەن اينالىساتىن كاسىپكەرلەرگە, سۋرەتشىلەر مەن مۋزىكانتتارعا جالعا بەرىپ, «قىسقى اربات» اشۋدى ۇسىندى. بىراق الدىمەن ونى جوندەۋ كەرەكتىگىن ەسكە سالدى. بۇل جەراستى وتكەلى ەسىل اۋدانى اكىمدىگىنىڭ بالانسىندا ەكەن. ءماسليحات حاتشىسى جانات نۇرپەيىسوۆ نىساندا ەكى ەمەس, ءبىر قوجايىن بولۋ كەرەكتىگىن ايتتى. «مەملەكەتتىك كوممۋنالدىق قازىنالىق كاسىپورىن رەتىندە بيزنەسمەندەرگە جەراستى وتكەلىن جالعا بەرۋگە دە قۇقىعىمىز جوق. مۇنى تەك قانا كوممۋنالدىق مۇلىك قورى اتقارا الادى» دەدى م.ورالوۆ. دەپۋتاتتارعا «قىسقى اربات» جاساۋ يدەياسى ۇنادى. ولار ءتيىستى شارشى مەترلەردى سەنىمدى باسقارۋعا بەرۋ كەرەكتىگى جايلى ويلارىن ايتتى.
نىسانعا كىرۋ بيلەتى ەرەسەكتەرگە – 500 تەڭگە, وقۋشىلارعا – 200 تەڭگە. الايدا ادامدار وعان كوپ بارا قويمايدى ەكەن. دەمالىس كۇندەرى تەك 20-30 بيلەت قانا ساتىلادى. ال جۇمىس كۇندەرى ودان دا از. مەيرامباي ورالوۆتىڭ پىكىرىنشە, ەكسكۋرسيالىق اۆتوبۋستار تۋريستەرگە قولايسىز جەردە توقتايتىندىقتان, قوناقتار اۋديوگيدتىڭ اقپاراتىمەن شەكتەلىپ, ىشكە كىرمەيدى. سوندىقتان كولىكتەر ايالدايتىن جەردى ىڭعايلاستىرۋ كەرەك.
ەكسكۋرسيالىق اۆتوبۋستار «الجير» مۇراجاي-مەموريالدىق كەشەنىنە بارمايدى. وعان باسقا تۋروپەراتورلار تۋريستەردى اپارادى ەكەن. دەپۋتاتتار قاراقات ابدەن مەن مۇحتار تولەۋتاەۆ اقمولا وبلىسىنىڭ باسشىلىعىمەن كەلىسسوزدەر جۇرگىزىپ, تاريحىمىزدى تانىتۋ ءۇشىن بۇل باعىتتى مىندەتتى تۇردە قوسۋ كەرەكتىگىن ايتتى. ميراس شەكەنوۆ پەن زەينوللا شىبكەنوۆ تۋريستەردى تارتا ءتۇسۋ ءۇشىن ۇلتتىق مۋزەيدىڭ جۇمىس ۋاقىتىن ءبىر-ەكى ساعاتقا سوزۋ قاجەتتىگى جايلى پىكىرلەرىمەن ءبولىستى.
جالپى, «Red bus» اۆتوبۋستارىن جىلىنا 8 مىڭنان استام ادام عانا پايدالانادى ەكەن. دەپۋتاتتار بۇل وتە از ەكەنىن ايتىپ, جارناما, مەنەدجمەنت ماسەلەسىن كۇشەيتۋ كەرەكتىگىنە نازار اۋداردى.
«استانا-بايتەرەك» مونۋمەنتىنەن دەپۋتاتتاردى نىسان ديرەكتورى قانات توكەسباي كۇتىپ الىپ, كىرەبەرىستە بيىل كەلۋشىلەر كەزەگىن كۇتەتىن ارنايى ىڭعايلى ورىن جاسالعانىن ايتىپ, مونۋمەنتتىڭ ءىشىن ارالاتتى.
جۋىردا قالالىق ءماسليحاتتىڭ كەزەكتى سەسسياسى ءتۋريزمدى تۇلەتۋگە ارنالادى. سوندا وسى ماسەلە جان-جاقتى تالقىلانادى.
