ءتارتىپ بار جەردە تىنىشتىق تا بولادى
اكىمدىكتەگى اپتا سايىنعى اپپاراتتىق كەڭەستە قالا تىرشىلىگىنە قاتىستى بىرقاتار ماڭىزدى ماسەلەلەر قارالدى.
بيىل ەلوردادا جالپى اۋدانى 8,7 گەكتاردى قۇرايتىن 9 گۇل باعى مەن جەلەك جول سالىندى. بۇدان بولەك, جىل سوڭىنا دەيىن اۋدانى 14,2 گەكتار بولاتىن وزەن جاعاسىنداعى ساياباق پەن اۋدانى 92 گەكتاردى قۇرايتىن بوتانيكا باعىنىڭ قۇرىلىسى اياقتالادى. «وسىلايشا, 2018 جىلى قالاداعى كوگالداندىرىلعان اۋماقتىڭ اۋدانى 115 گەكتارعا ۇلعايىپ, 15537 گەكتاردى قۇرايتىن بولادى. مۇنىمەن قوسا, ەلوردانىڭ بارلىق اۋداندارىنداعى اۋلالاردى اباتتاندىرۋ جۇمىستارى جۇرگىزىلىپ جاتىر. بۇگىنگى تاڭدا استانادا 1,4 مىڭنان استام اۋلا بار. ولاردىڭ 300-گە تارتا اۋلاسى قالپىنا كەلتىرىلەتىن بولادى. اتالمىش جۇمىستاردىڭ ءبىراز بولىگى اياقتالدى» دەپ مالىمدەدى كەڭەس بارىسىندا ءا.يسەكەشەۆ.
ىڭعايلى ءارى قولايلى ينفراقۇرىلىمدى قالىپتاستىرۋ ءۇشىن ەلوردا اكىمدىگى ۆەلوسيپەدتىك كولىك جانە ينفراقۇرىلىمدى دامىتۋ جوسپارى ازىرلەنىپ, بەكىتىلدى. استانا اكىمى اسەت يسەكەشەۆتىڭ تاپسىرماسى بويىنشا الداعى بىرنەشە جىلدا ەلوردادا قالانىڭ بار اۋماعىن قامتيتىن 1717 شاقىرىمدىق ۆەلوجولدار سالىنادى. «جىل سوڭىنا دەيىن ۇزىندىعى 34 شاقىرىمدى قۇرايتىن ۆەلوجول پايدالانۋعا بەرىلەدى دەپ جوسپارلانۋدا. ول ەسىل وزەنىنىڭ اۋماعىن قامتيدى. استانانىڭ ورتالىق ساياباعىنان باستالاتىن جول جاسىل بەلدەۋ اۋماعىنداعى ۆەلوجولمەن توعىسادى. بۇل الاڭنىڭ ءبىر بولىگى بۇگىنگى تاڭدا قولدانىستا. قالا تۇرعىندارى ءوز يگىلىگىنە جاراتىپ جاتىر» دەپ اتاپ ءوتتى ءا.يسەكەشەۆ.
جاڭا ينفراقۇرىلىمنىڭ سۇرانىسقا يە ەكەندىگىن ەسكەرە وتىرىپ, استانا اكىمى قىزىل تۇسكە بويالعان ۆەلوجولدارى بار بارلىق الاڭداردا ارنايى بەلگىلەردى ورناتۋدى جۇكتەدى. قاۋىپتى جانە وقىس وقيعالاردىڭ الدىن الۋ ماقساتىندا استانا اكىمدىگى ەلوردا تۇرعىندارى مەن قوناقتارىن بارلىق دەمالىس ورىندارىندا ءتارتىپتى ساقتاۋعا, جاڭا جولداردى ورىندى پايدالانۋعا شاقىرادى.