كەشەندى جوسپارعا سايكەس سۋ تاسقىنىن بولدىرماۋ جونىندە ەلوردا اۋماعىندا بيىلعى كوكتەمدە سۋ باسۋى ىقتيمال 27 ۋچاسكە بەلگىلەنىپ, ولاردىڭ ارقايسىسىنا قاجەتتى ماتەريالدار مەن قارجى كولەمى انىقتالعان. سۋ تاسقىنىن الدىن الۋ ماقساتىندا قالا اكىمى اسەت يسەكەشەۆ استانالىق سۋ رەتتەگىشتە بولىپ, جۇمىس بارىسىن باقىلادى.
قالا اكىمى الدىمەن گيدروتەحنيكالىق قۇرىلىستاردىڭ دايىندىعىن قاداعالاپ, «استانا» سۋ قويماسىنىڭ جاعدايىن ءوز كوزىمەن كوردى. قار قورىنىڭ كولەمىن ءبىلۋ ماقساتىندا مونيتورينگ جۇرگىزۋ جانە الىنعان دەرەكتەردى تالداۋ تۋرالى جۇمىس رەجيمىنىڭ جوسپارلى كەستەسى بەكىتىلگەن بولاتىن. اكىم ورىنباسارى قوسمان ايتمۇحامەتوۆ سۋ قويماسىنىڭ 14 ناۋرىزداعى جاعدايى تۋرالى باياندادى. ونىڭ مالىمەتىنشە, اتالمىش سۋ قويماسىنىڭ كولەمى 283 ملن شارشى مەتردى قۇرايدى. ال «قازگيدرومەت» رمك مەن استانا قالاسى تجد قىزمەتكەرلەرىنىڭ بولجاۋىنشا, تاسقىن سۋدىڭ كولەمى 280 ملن شارشى مەتردەن اسپايدى دەپ كۇتىلۋدە.
استانا قالاسىن ەسىل وزەنىنە قۇيىلاتىن قار سۋىنان قورعاۋ نىسانىندا بوگەندەردى نىعايتۋ جۇمىستارى جۇرگىزىلگەن ەكەن. ناتيجەسىندە كەشەن سۋ قابىلداۋعا جانە اعىزۋعا تولىق دايىن كورىنەدى. سونداي-اق, نۇرسۇلتان نازارباەۆ اتىنداعى حالىقارالىق اۋەجاي اۋدانى مەن مايبالىق كولىنەن سۋ اعىزاتىن ارنانىڭ زەرتتەلگەنىن ايتادى ماماندار.
قازىرگى ۋاقىتتا مايبالىق كولىندەگى سۋ كولەمى شامامەن 62 ملن شارشى مەتردى, ال تولىق كولەمى 80 ملن شارشى مەتردى قۇرايدى.
جەرگىلىكتى بيلىكتىڭ تاپسىرماسى بويىنشا مايبالىق كولىنەن «نۇرا–ەسىل» ارناسىنا باعىتتالعان ۇزىندىعى 5,4 شاقىرىمدى قۇرايتىن ارنانى تازالاۋ جۇمىستارى اياقتالىپتى. بۇل ۋچاسكە مول سۋ وتكىزۋگە دايىن كورىنەدى.
گاز اپپاراتۋراسى اۋدانىنداعى ەسىل وزەنىنىڭ ارناسىن كەڭەيتۋ تۋرالى ماسەلە دە نازاردان تىس قالمادى. ەستەرىڭىزگە سالساق, وتكەن جىلى تالاپكەر اۋىلىنا اعاتىن وزەن بويىنداعى سۋ باسۋ قاۋپى جوعارى ۋچاسكەلەر انىقتالعان بولاتىن.
اكىمنىڭ تاپسىرماسىمەن «كجبي-56» جانە «يۋبيلەينوە» باعباندى قوعامداستىق اۋدانىنداعى وزەننىڭ ەسكى ارناسىنا قۇم ارالاس تاس توسەلگەن. ول 50 تاياۋ ساياجاي ۋچاسكەلەرىن سۋ باسۋ قاۋپىنەن ساقتاماق. سونىمەن قاتار, وزەننىڭ ارناسىن كەڭەيتۋ جۇمىستارى دا جۇرگىزىلۋدە. «كىشى تالدىكول» اۋدانىنا دا ەرەكشە نازار اۋدارىلدى. قالا اكىمى اسەت يسەكەشەۆ باستاعان جۇمىس توبى ۇركەر تۇرعىن الابىنا دا ات باسىن تىرەدى. كەيبىر بوگەتتەردى قالىپقا كەلتىرىپ, كوكتەمگى سۋ تاسقىنىن الدىن الۋ شارالارىن قاداعالاعان قالا باسشىسى اۋدان اكىمدەرىنە تۇرعىن ءۇي الاپتارىنان قار شىعارۋدى تەز ارادا اياقتاۋدى جانە كارىز جۇيەلەرىن قار سۋىن قابىلداۋعا دايىنداۋدى تاپسىردى.
