ەلورداعا ارنايى كەلگەلى وتىرعان دەلەگاتسيانى تاتارستان پرەزيدەنتى رۋستام ميننيحانوۆ باستاپ كەلەدى دەپ كۇتىلۋدە. سونداي-اق, رەسمي تۇلعالاردان باسقا, قوعام قايراتكەرلەرى, ىسكەرلىك جانە ءبىلىم بەرۋ سالالارىنىڭ وكىلدەرى كەلمەكشى. ولار قالانىڭ ءوندىرىس ورىندارىن ارالاپ, الدىن الا بەلگىلەنىپ وتىرعان بيزنەس-فورۋمعا قاتىساتىن بولادى.
تاتارستاننىڭ استاناداعى كۇندەرى اياسىندا وتكىزىلەتىن مەرەكەلىك شارالار ەل كوڭىلىنەن شىعاتىنىنا سەنىمدىمىز. بۇل كۇنى ۇلتتىق مەيرامىمىز – «سابانتوي» اتالىپ وتەدى. بۇعان دەيىن استانا جانە وزگە وڭىرلەردە تۇراتىن تاتارلار بۇل مەرەكەنى ءوز دەڭگەيىندە اتاپ وتكەن بولاتىن. ال, ەندىگى سابانتوي سولاردىڭ قورىتىندىسى ىسپەتتەس.
مەرەكە 19 قىركۇيەك بەيبىتشىلىك جانە كەلىسىم سارايىندا باستالادى. وسى كۇنى بەلگىلى عالىم گريف ءحايرۋلليننىڭ «قازاقستاننىڭ تاتارلارى» اتتى ەنتسيكلوپەدياسىنىڭ تۇساۋكەسەرى بولادى. جۇرتشىلىق تاتار حالقىنىڭ سالت-داستۇرىنەن, اۋىز ادەبيەتىنەن سىر شەرتەتىن كورمەلەردى تاماشالاپ قانا قويماي, جاس تا بولسا تالانتتى سۋرەتشى دانيار كاسيانوۆتىڭ قىلقالام تۋىندىلارىمەن تانىسا الادى. ال كەشكىسىن تاتارستان ونەر شەبەرلەرىنىڭ قاتىسۋىمەن گالا-كونتسەرت وتەدى.
20 قىركۇيەكتە تاتارستاننىڭ استاناداعى كۇندەرىنە بايلانىستى مەرەكەلىك شارالار «حانشاتىر» ويىن-ساۋىق-ساۋدا ورتالىعى جانىنداعى الاڭدا جالعاسىن تابادى. وسىعان وراي «دۋسلىك» تاتار ءبىلىم بەرۋ-مادەنيەت ورتالىعى «مەن تاتارشا سويلەيمىن» اتتى اكتسيا ۇيىمداستىرماقشى. بۇل اكتسياعا كەز كەلگەن ادام قاتىسا الادى. جۇرتشىلىق تاتاردىڭ قاناتتى سوزدەرىن, سالت-ءداستۇرى, ۇلتتىق مەرەكەلەرى تۋرالى بىلەتىندەرىن ايتىپ, تاتار-ورىس سوزدىگىن سىيعا الا الادى. بۇعان قوسا, تاتارستاننىڭ وندىرىستىك جانە اۋىلشارۋاشىلىق كورمەسى ءوتىپ, حالىق تاتار ۇلتتىق تاعامدارىنان ءدام تاتا الادى. تاتارلاردىڭ ۇلتتىق مەرەكەسى «سابانتوي» ەلوردادا العاش وتكىزىلىپ وتىرعان جوق. «تاڭ» تاتار-باشقۇرت مادەني قوعامى وعان بيىل تىڭعىلىقتى دايىندىقپەن كەلىپ وتىر. الاڭدا تاتار حالىق مۋزىكاسى ورىندالىپ, اندەر شىرقالادى. وعان «قازان» بي ءانسامبلى, «زۋلياليا», «كازان ەگەتليارە» توپتارى, حامدۋنا تيمەرگاليەۆا, رەگينا ۆاليەۆا, تاعى دا باسقا ونەر ۇجىمدارى قاتىسپاق.
مەرەكە اياسىندا رەسپۋبليكانىڭ تۇكپىر-تۇكپىرىندەگى تاتار مادەنيەت ورتالىقتارىنان كەلگەن جاستاردىڭ باسىن قوسىپ, رەسپۋبليكالىق سەزد ۇيىمداستىرىلماقشى. وندا جاستار ءبىر-بىرىمەن تانىسىپ, وي-پىكىرلەرىمەن بولىسە الادى.
مەرەكە كەزىندە كۇرەستەن اۋىر سالماقتاعى رەسپۋبليكا چەمپيوناتى مەن قازاقستان, تاتارستان كوماندالارى اراسىنداعى ماتچتىق كەزدەسۋ وتەدى. كۇرەستە جاۋىرىنى جەرگە تيمەگەن جەڭىمپاز پالۋان تەمىر تۇلپار مىنەتىن بولادى.
سونداي-اق, سول كۇنى ساعات 16.00-دە ۇلتتىق كىتاپحانادا اقىن فاريدا باتىربەكوۆامەن ادەبي كەزدەسۋ وتەدى. بۇل دا جىر سۇيەر قاۋىمعا رۋحاني سىي بولادى دەپ ويلايمىز.
ياننات نيزامۋتدينوۆا,
«دۋسلىك» تاتار ءبىلىم بەرۋ-مادەنيەت ورتالىعىنىڭ ءتورايىمى
