اقوردادا ەلباسى نۇرسۇلتان نازارباەۆ ەلىمىزگە مەملەكەتتىك ساپارمەن كەلگەن رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى.
– ءسىزدىڭ قازاقستانعا سوڭعى مەملەكەتتىك ساپارىڭىز وسىدان ءتورت جىل بۇرىن بولدى. وسىناۋ ۋاقىت ارالىعىندا ءبىز قانداي ماسەلەدە دە كوزقاراسىمىزدى سالىستىرىپ, ەكى جاقتى قارىم-قاتىناستىڭ وزەكتى ماسەلەلەرىن ءتۇرلى ورىنداردا شەشىپ وتىردىق. قازاقستان مەن رەسەي – ءاردايىم سەنىمدى كورشى بولدى. مۇنداي يگى بايلانىس جالعاسا بەرەتىنىنە سەنىم مول, – دەدى ەلباسى.
ەكى ەلدىڭ ءوزارا بايلانىسىن دامىتۋدىڭ كەلەشەگىنە توقتالعان نۇرسۇلتان ءابىشۇلى سوچيدە بۇل ماسەلەلەر كەڭىنەن تالقىلانىپ, ءتيىستى قۇجاتتار ازىرلەنگەنىن, ەكى ەلدىڭ قارىم-قاتىناسى «ءححى عاسىرداعى تاتۋ كورشىلىك جانە وداقتاستىق تۋرالى» ىرگەلى كەلىسىم نەگىزىندە دامىپ جاتقانىن اتاپ ءوتتى.
ال, رەسەي باسشىسى ۆلاديمير پۋتين ەكى ەلدىڭ بايلانىسى سەرىكتەستىك قانا ەمەس, تولىق ماعىناسىنداعى وداقتاستىق قارىم-قاتىناس دەگەن بايلامىن جەتكىزدى.
بۇگىندە رەسەيلىك 6 مىڭعا جۋىق كومپانيا قازاقستاندا جۇمىس ىستەپ جاتىر. بۇل – دوللارلىق ەكۆيۆالەنتپەن ەسەپتەگەندە, مول كولەمدەگى ينۆەستيتسيا جيناقتاۋ دەگەن ءسوز. ۆ.ءپۋتيننىڭ ايتۋىنشا, ەكى جاقتى قارىم-قاتىناستىڭ بارلىق جاعى ءتيىمدى دامۋ ۇستىندە. بۇعان قوسا, يننوۆاتسيالىق تەحنولوگيالار, ونەركاسىپ, اۋىل شارۋاشىلىعى سالالارى بويىنشا بىرلەسكەن ءىرى جوبالار دا بار.
اقورداداعى كەلىسسوزدەر اياقتالعاننان كەيىن مەملەكەت باسشىلار بريفينگ وتكىزىپ, بىرلەسكەن مالىمدەمە جاسادى. ەلباسى نۇرسۇلتان نازارباەۆتىڭ ايتۋىنشا, بۇل – دوستىق پەن ىنتىماقتاستىققا قۇرىلعان, بىرلەسكەن جوبالاردى ناقتى جۇزەگە اسىرۋ ماسەلەلەرىن تالقىلاۋعا, ىنتىماقتاستىقتىڭ جاڭا باعىتتارىن ايقىنداۋعا ارنالعان كەزدەسۋ بولعان.
البەتتە, قازاقستان مەن رەسەي پرەزيدەنتتەرىنىڭ بۇل جولعى جۇزدەسۋى بۇرىننان قالىپتاسقان ستراتەگيالىق سەرىكتەستىككە سونى سەرپىن بەرىپ, تاتۋ كورشىلىكتىڭ تامىرىن ودان ءارى تەرەڭدەتە تۇسكەنى انىق.
