تاۋەلسىزدىك – تىنىسىم

بيىل حالقىمىز قازاقستان رەسپۋبليكاسى تاۋەلسىزدىك كۇنىن 22 رەت مەرەكەلەيدى. 1991 جىلى ءدال وسى كۇنى رەسپۋبليكانىڭ جوعارعى كەڭەسى «قازاقستاننىڭ مەملەكەتتىك تاۋەلسىزدىگى تۋرالى» زاڭ قابىلدادى. وسى زاڭ تاۋەلسىز قازاقستاننىڭ كونستيتۋتسيالىق جانە قۇقىقتىق نەگىزىنىڭ ىرگەتاسى بولدى. ءبىزدىڭ ەل ازاماتتاردىڭ قۇقىقتارى مەن بوستاندىقتارىن نەگىزگى ماقسات رەتىندە قويىپ, ازاماتتىق قوعام قالىپتاستىرۋ جولىندا نىق قاداممەن ءجۇرىپ كەلەدى.

تاۋەلسىز قازاقستاندا ادىلەت ورگاندارى بۇل – حالىققا كەڭ اۋقىمدى مەملەكەتتىك قىزمەتتى جەتكىزۋ بويىنشا ماڭىزدى تاپسىرمالار جۇكتەلگەن كوپفۋنكتسيونالدى مەحانيزم.

ايماقتىق ادىلەت ورگاندارى نەگىزگى فۋنتسيالارى رەتىندە قۇقىقتىق ءتۇسىندىرۋ جۇمىستارىن جۇرگىزەدى, حالىققا زاڭگەرلىك كومەك كورسەتىپ, زاڭدى تۇلعالاردى, ازاماتتاردىڭ حال اكتىلەرىن, جىلجىمايتىن مۇلىككە قۇقىقتارىن, جەرگىلىكتى وكىلدىڭ جانە اتقارۋشى ورگانداردىڭ ءنورماتيۆتى قۇقىقتىق اكتىلەرىن تىركەيدى, سونىمەن قاتار, قازاقستان رەسپۋبليكاسىنىڭ زاڭنامالارىندا كورسەتىلگەن باسقا دا تاپسىرمالاردى ورىندايدى.

قازاقستان رەسپۋبليكاسىندا مەملەكەتتىك باسقارۋ ساياساتىنداعى نەگىزگى باعىتتارىنىڭ ءبىرى – مەملەكەتتىك قىزمەتتەردى كورسەتۋ بارىسىندا اكىمشىلىك كەدەرگىلەردى بارىنشا قىسقارتۋ جانە جەمقورلىق پەن كەڭسەشىلدىكتى جويۋ. وسى باعىتتا ادىلەت ورگاندارى كوپتەگەن جۇمىستار اتقارىپ, قوعام مەملەكەتتىك قىزمەتتەردىڭ حالىققا كورسەتىلەتىن ءتارتىبى ەداۋىر جەڭىلدەتىلگەنىنىڭ كۋاگەرى بولىپ وتىر.

ايتا كەتۋ كەرەك, بۇگىندە استانا قالاسى ادىلەت دەپارتامەنتى ءوزىنىڭ الدىنا, قىزمەتىنىڭ نەگىزگى باعىتتارى بويىنشا ءارى قاراي تيىمدىلىگىن ارتتىرۋدى كوزدەي وتىرا, زاڭدى جانە جەكە تۇلعالارعا ادىلەت ورگاندارىنىڭ جۇمىسى تۋرالى اقپاراتتى اشىق جانە قولجەتىمدىلىگىنە باستى نازار قويادى.

قازاقستان رەسپۋبليكاسى تاۋەلسىزدىگى تاريحي ولشەممەن سالىستىرعاندا ۇزاق ۋاقىت بولماعانىمەن, ءبىرىنشى كۇنىنەن باستاپ تاڭدالعان دامۋ باعىتىمىز دۇرىستىعىن اتاپ وتكەن ءجون. تاۋەلسىزدىك جىلدارىندا ماقساتتى تۇردە بايسالدى ەكونوميكالىق جانە ساياسي رەفورمالار جۇرگىزىپ, ورتا ازيا ايماعىندا كوشباسشى ەل بولدىق. قازاقستان ءوزىنىڭ مەملەكەتتىگىن قۇرۋ, ۇلتتىق قاۋىپسىزدىگىنىڭ نەگىزىن قالاۋ جانە نىعايتۋ, ەلدىڭ تەرريتوريالىق بۇتىندىگى مەن شەكارانىڭ بەرىكتىگىن قامداپ, ەكونوميكامىز ەركىن نارىقتىق دامۋ جولىنا ءتۇستى.

ەلىمىزدىڭ تاۋەلسىزدىك جىلدارىنداعى جەتىستىكتەرىن ايتا وتىرا, حالىقارالىق جوعارى بەدەلىن ەرەكشە اتاۋ قاجەت. بۇل – ىشكى جەتىستىكتەرى ناتيجەسى­نىڭ, دايەكتەلگەن بەيبىتشىل ساياساتىنىڭ جانە حالىقارالىق ءىرى باستامالاردىڭ كورىنىسى. ولاردىڭ ىشىندە: يادرولىق قارۋدان باس تارتۋ, استانا قالاسىنداعى ازياداعى سەنىمدىلىك شاراسى مەن ارەكەتتەستىك كەڭەسىنىڭ ءوتۋى, الەم دىندەرى كوشباسشىلارىنىڭ قۇرىلتايىنىڭ ءوتۋى جانە لاڭكەستىككە قارسى كۇرەس پەن بىتىمگەرلىك ميسسيالارىنا قاتىسۋ دا بار. تاۋەلسىزدىك جىلدارىنداعى قازاق حالقى ءۇشىن ماڭىزدى جەتىستىكتەردىڭ ءبىرى – استانا. جاڭا استانا حالىقتىڭ كۇشى مەن قۋاتى تالاي اسۋدى ەڭسەرەتىنىن كورسەتۋمەن قاتار, زاماناۋي قازاقستاننىڭ ماقتانىشى مەن نىشانىنا اينالدى.

پرەزيدەنتىمىز ن.ءا.نازارباەۆ­تىڭ نىق جانە ساۋاتتى ساياساتىنىڭ ارقاسىندا ەلدىڭ ءساتتى دامۋىنىڭ باسىم باعىتى انىقتالدى. قازاقستان تۇراقتىلىقتى ساقتاپ ءارى قاراي جوعارى دامۋ ەكپىنىنە يە بولدى. تاۋەلسىز جىلداردا قازاقستاندا قولايلى ينۆەستيتسيالىق كليمات قالىپتاسىپ, كەڭ اۋقىمدى دەموكراتيالىق, قۇقىقتىق جانە الەۋمەتتىك-ەكونوميكالىق رەفورمالار ىسكە استى. ءبىزدىڭ ەگەمەن مەملەكەتىمىزدىڭ ازاماتتارىنىڭ كونستيتۋتسيالىق قۇقىقتارى مەن بوستاندىقتارىنا قاتىستى سايكەسىنشە زاڭنامالىق اكتىلەر قابىلداۋ ءساتتى جالعاسىن تابۋدا.

قۇقىقتىق مەملەكەت قۇرۋىنىڭ جاسامپازدىق ۇدەرىسىنە, جاس مەملەكەتتىڭ قالىپتاسۋى مەن نىعايۋىنا ادىلەت ورگاندارى بەلسەندى ۇلەس قوسۋدا.

مەملەكەتتىك مەرەكە بارشا قازاقستاندىقتار ءۇشىن, رەسپۋبليكامىزدىڭ گۇلدەنۋىنىڭ نىشانى, بىرلىك, بەيبىتشىلىك, كەلىسىم جانە اۋىزبىرشىلىكتىڭ كەپىلى بولسىن.

ق.مۋسين,

استانا قالاسى ادىلەت دەپارتامەنتى باسشىسى