بيىل – ەلىمىز ءۇشىن مەرەيلى جىل. ازاتتىقتىڭ شيرەك عاسىر تويى. وسى ايتۋلى مەرەكەگە بايلانىستى مەملەكەتتىك جەتەكشى ارنالاردىڭ ءبىرى – «حابار» اگەنتتىگى بىرقاتار جوبالاردى قولعا الىپ, تاۋەلسىزدىككە تارتۋ جاساپ وتىر.
تاياۋدا عانا «حابار» تەلەارناسىنان كورەرمەنگە «پاي-پاي, 25» دەپ اتالاتىن الەۋمەتتىك توك-شوۋى جول تارتقانىن جاقسى بىلەمىز. اتىنىڭ ءوزى الىستان شاقىرىپ تۇراتىن باعدارلامانىڭ مازمۇنى ادەتتەگى قاساڭ قاعيدادان وزگەشەلەۋ. ويناقى, اۋەزدى, ايشىقتى. وندا ەلىمىزدىڭ شيرەك عاسىر ارالىعىنداعى تولايىم تابىستارى سارالانادى. جۇرتشىلىق ءجىتى بىلە بەرمەيتىن مالىمەتتەر, قىزىقتى وقيعالار مەن تاعىلىمدى اڭگىمەلەر ايتىلادى.
«حابار» اگەنتتىگى» اق باسقارما توراعاسىنىڭ ورىنباسارى رينات كەرتاەۆتىڭ ايتۋىنشا, باعدارلامانىڭ «پاي-پاي, 25» دەپ اتالۋى دا تەگىن ەمەس ەكەن. بۇل – تاۋەلسىزدىك جىلدارىندا جەتكەن تابىستارعا تاڭعالدىرىپ, تامساندىراتىن جوبا. ازاتتىقتىڭ تارلان تاريحىنا شولۋ جاسايدى. باعدارلامادا بىرنەشە جانر بىرىگىپ, ادەمى ۇيلەسىم تاپقان. جۇرگىزۋشىلەر استارلى ازىلمەن اسەرلى اڭگىمە وربىتەدى. سونداي-اق, ساراپشىلار دا پىكىر ءبىلدىرىپ, ءوز ويلارىمەن ءبولىسىپ وتىرادى. توك-شوۋدىڭ تىزگىنىن قىمبات دوسجان, سەرىكزات دۇيسەنعازين, ايگۇل يمانباەۆا, نۇرسۇلتان قۇرمان جانە دارحان ءابدۋاحيت سەكىلدى تانىمال ادامدار ءجۇرگىزەدى.
سونىمەن بىرگە, «حابار» اگەنتتىگىنىڭ تىكەلەي ۇيىتقى بولۋىمەن تاۋەلسىزدىكتىڭ 25 جىلدىعىنا ارنالعان «ەكسپەديتسيا-25» جوباسى قولعا الىندى. جوبا اياسىندا ءتۇرلى سالادا قىزمەت ەتەتىن 12 ازامات ەلىمىزدىڭ ءار ايماعىنداعى جيىرما بەس مادەني-تاريحي ورىندار مەن ءىرى كاسىپورىنداردى ارالاپ, ەلگە ەڭبەگى سىڭگەن تۇلعالاردى ناسيحاتتاۋعا ساپارعا شىققان.
ولار رەسپۋبليكا اۋماعى كولەمىندە 25 000 كيلومەتر قاشىقتىقتا جول جۇرەدى. جوبا ءالى جالعاسۋدا. «ەكسپەديتسيا-25» باعدارلاماسى 10 قىركۇيەكتەن باستاپ تەلەارنادان كورسەتىلىپ كەلەدى.
بىلتىردان بەرى «حابار» تەلەارناسىنان «اقىلدىڭ كىلتى. ءومىرداستان» تەلەەپوپەياسىن قىزىعا قاراپ ءجۇرمىز. ول تۋرالى جۇرتشىلىقتىڭ دا پىكىرى جوعارى. وتە ءبىر كوپشىلىكتىڭ كوڭىلىنەن شىققان ءساتتى جوبا دەپ ايتۋعا بولادى. قويىلىمدا حالقىمىزدىڭ باسىنان وتكەن اۋمالى-توكپەلى كەزەڭدەر ءدال سۋرەتتەگىدەي بەينەلەنگەن. وسى قازان ايىنان باستاپ ازاتتىقتىڭ شيرەك عاسىر تويىنا ارنالعان جوبانىڭ ەكىنشى ماۋسىمى جارىققا شىقتى. تەلەەپوپەيانىڭ العاشقى ماۋسىمىندا XIX عاسىردا عۇمىر كەشكەن ءۇش بۋىننىڭ ءومىرى بەينەلەنسە, ەكىنشى ماۋسىم پاراللەل سيۋجەتتىك جەلىگە قۇرىلعان. ونداعى وقيعالار وتكەن عاسىردىڭ جەتپىسىنشى جىلدارىنان باستالىپ, ەلىمىز تاۋەلسىزدىك العان كەزبەن استاسادى. اتالعان تۋىندىنىڭ رەجيسسەرى مۇرات بيدوسوۆتىڭ ايتۋىنشا, فيلمدەگى كەيبىر وقيعالار ەرىك ءبايجۇنىسوۆ دەگەن ازاماتتىڭ «اكە مۇراتى» دەگەن شىعارماسىنىڭ جەلىسى بويىنشا الىنعان. ونىڭ قاسىنداعى ارمان, باربوس دەگەن دوستارىنىڭ دا ءپروتوتيپى بار. تاريحي ەپوپەيا جامبىل وبلىسىنداعى مەركە اۋدانىندا, شۋ وزەنى مەن الاتاۋ بوكتەرىندە, قالالىق سيۋجەتتەر الماتىدا تۇسىرىلگەن. ەپوپەياداعى كوستيۋم مەن دەكوراتسيانىڭ ەرەكشەلىگى دە تارتىمدى. ەكىنشى ماۋسىمداعى 20 ءبولىمنىڭ بارلىعى دا ابايدىڭ قارا سوزدەرىمەن تۇيىندەلىپ وتىرادى. ءفيلمنىڭ ستسەناريىن ارمان سقابىلۇلى, سەرجان زاكەرۇلى جانە مۇرات بيدوسوۆ جازعان. ال مۋزىكاسىن ءانشى-سازگەر سەيفۋللين جولبارىس ارلەگەن.
جالپى, جىل سوڭىنا دەيىن تەلەارنا ۇجىمى «تاۋەلسىزدىك تولعاۋى», «كود ناتسي» اتتى دەرەكتى فيلمدەر مەن ازاتتىق تويىنا ارنالعان مەرەكەلىك بەينەباياندار مەن روليكتەر دايىنداپ, جۇرتشىلىققا ۇسىنباق.
ازامات ەسەنجول
