استانا قالاسىندا «ءۇزدىك باستاۋىش پارتيا ۇيىمى» بايقاۋىنىڭ جەڭىمپازدارى انىقتالدى. «نۇر وتان» پارتياسىنىڭ ۇيىمداستىرۋىمەن وتكىزىلىپ وتىرعان بۇل بايقاۋ «100 ناقتى قادام» ۇلت جوسپارى باعدارلاماسى اياسىندا جۇزەگە اسىپ وتىر.
كونكۋرسقا سوعىس ارداگەرلەرى مەن تىل ەڭبەككەرلەرىنە, از قامتىلعان جانە كوپبالالى وتباسىلار, سونداي-اق جەتىمدەرگە كومەك بەرۋ سەكىلدى كوپتەگەن يگى ىستەر جاساپ وتىرعان باستاۋىش پارتيا ۇيىمدارى قاتىستى. «بۇل بايقاۋدىڭ نەگىزگى ماقساتى ەلىمىزدەگى الەۋمەتتىك پروبلەمالاردى شەشۋ جانە ازاماتتاردىڭ كۇندەلىكتى ءومىرىن جاقسارتۋ جولىندا پارتيامىزبەن يىق تىرەستىرە جۇمىس ىستەپ جاتقان قوعامدىق ۇيىمداردى انىقتاۋ بولاتىن. ناتيجەسىندە پارتيامىزدىڭ استانا قالالىق فيليالى قاتارىنداعى 350-گە جۋىق باستاۋىش پارتيا ۇيىمى اراسىنان ىرىكتەلىپ العا شىققان 17 مەكەمە رەسپۋبليكالىق بايقاۋعا جولداما الىپ وتىر» دەيدى نۇر وتان پارتياسى استانا قالالىق فيليالى توراعاسىنىڭ ءبىرىنشى ورىنباسارى ەدىل مامىتبەكوۆ.
جەڭىمپازدارعا جەڭىس كۋبوكتارى تابىس ەتىلىپ, بەلسەنە قاتىسقان وزگە دە باستاۋىش پارتيا ۇيىمدارىنا العىس حاتتار بەرىلدى.
