استانا قالاسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ قالدىقتاردى باسقارۋ جانە «جاسىل ەكونوميكا» ءبولىمىنىڭ باسشىسى ميراس عايسيننىڭ مالىمەتىنە سۇيەنسەك, كۇن سايىن قالا اۋماعىنان مىڭعا جۋىق توننا قاتتى قالدىق شىعارىلادى. قالدىقتاردى شىعارۋعا 70-تەن استام تەحنيكا بىرلىگى قاراستىرىلعان. جالپى, قالدىقتاردى جيناۋ جانە تاسىمالداۋ جۇمىستارى بويىنشا قالانىڭ اۋماعى 24 ايماققا بولىنگەن. ونداعى 1 842 الاڭدا 10 477 قوقىس جاشىگى ورناتىلعان.
قالالىق اكىمدىك وتكىزگەن تەندەر بويىنشا قالدىقتاردى شىعارۋ جۇمىسى «Clean City NC» جشس-نە جۇكتەلگەن. اتالمىش كاسىپورىن قازىرگى ۋاقىتتا قالدىق تاسىمالدايتىن 30 تەحنيكا بىرلىگى مەن 1000 كونتەينەردى ءوز قارجىسىنا جاڭالاعان كورىنەدى. مامانداردىڭ ايتۋىنشا, استانا قالاسى اكىمدىگىنىڭ باستاماسىمەن سوڭعى كەزدە قالدىقتاردى جەكەلەي جيناۋ جۇمىستارى دا جۇرگىزىلەدى ەكەن. ماسەلەن, پلاستيك قالدىقتارىن جەكەلەي جيناۋعا 686 كونتەينەر, پايدالانىلعان لامپالاردى جيناۋعا 670 كونتەينەر, ال جەكەمەنشىك سەكتورلارداعى كۇل-قوقىستى جيناۋعا 300 قوقىس جاشىگى ورناتىلعان. سونىمەن قاتار ەلەكتروندى تۇرمىستىق ونىمدەر ساتىلاتىن ساۋدا ورتالىقتارىنىڭ الدىندا دا قالدىقتاردى جەكەلەي جيناۋ قاراستىرىلىپتى.
ال استانا اۋماعىنان شىعارىلاتىن بارلىق قالدىقتار «يمابە يبەريكا» دەپ اتالاتىن يسپان تەحنولوگياسى بويىنشا 2012 جىلى سالىنعان قوقىس وڭدەۋشى كەشەنگە تاسىمالدانادى ەكەن. كەشەندەگى قالدىقتاردىڭ
8 پايىزى سۇرىپتالىپ, قالعان 92 پايىزى بريكەتتەلىپ, پوليگونعا كومۋگە جونەلتىلەتىنىن ايتادى ماماندار.
– كەشەننىڭ اۋماعىندا پلاستيك پەن ماكۋلاتۋرا قالدىقتارىن وڭدەۋ بويىنشا 2 تسەح بار. ال پوليگون ەكى توردان تۇرادى. ءبىرىنشى تور 2006 جىلدان بەرى پايدالانىلۋدا, وعان 3,5 ملن توننا قالدىق سىيادى. جوباعا سايكەس, بۇل توردىڭ پايدالانۋ مەرزىمى بيىل اياقتالادى. پوليگوننىڭ ەكىنشى تورى اعىمداعى جىلدىڭ ءۇشىنشى توقسانىندا پايدالانۋعا بەرىلدى, – دەيدى م.عايسين.
ەلورداداعى قالدىقتاردى وڭدەۋدىڭ تەرەڭدىگىن ۇلعايتۋ جونىندەگى مەملەكەت باسشىسىنىڭ تاپسىرماسى بويىنشا وتكەن جىلى «پرايسۋوتەرحاۋسكۋپەرس» حالىقارالىق كونسالتينگتىك كومپانيامەن ءبىرلەسە وتىرىپ, استانا قالاسىنداعى قالدىقتاردى باسقارۋ باعدارلاماسى قۇراستىرىلعان. باعدارلامانى دايىنداۋ بارىسىندا الەمدەگى قالدىقتاردى وڭدەيتىن تەحنولوگيالارعا تالداۋ جۇرگىزىلىپ, ولاردىڭ مورفولوگيالىق قۇرامى انىقتالىپ, استاناداعى قالدىقتاردى باسقارۋ جۇيەسىن جاڭارتۋ بويىنشا ۇسىنىستار قارالعان.
نۇرداۋلەت كاكىشەۆ
