تاجىريبەلى ديكتورلار قايتا ورالماق
گازەتىمىزدە «تەلەتەرەزە» ايدارى اشىلعالى قازاق تەلەارنالارى, تەلەباعدارلامالار توڭىرەگىندە مازمۇندى ماتەريالدار جارىق كورىپ كەلە جاتقانى جالپى وقىرمانعا بەلگىلى. سولاردىڭ قاتارىندا «ديكتورلار نەگە تىستەنىپ سويلەيدى؟» (5 ماۋسىم, 2018 ج.), «ديكتورلار دۇرىس سويلەسىن دەسەك…» (19 شىلدە, 2018 ج.) دەگەن اتپەن تەلەجۇرگىزۋشىلەر تۋرالى دا ماقالالار جاريالانعان ەدى.
تەلەارنالار – ەل ايناسى. ءار ۇيدەگى كوك جاشىك جاي اقپارات نەمەسە كورىپ, تاماشالاپ, ۋاقىت وتكىزەتىن قۇرال عانا ەمەس, ۇلتتىق يدەولوگيا جارشىسى, تاربيە مەن مادەنيەت وشاعى ەكەنى دە بارشاعا ايان. سول سەبەپتى ءار كورەرمەننىڭ تەلەارنالار تۋرالى ايتۋعا, جازۋعا, ءوز ۇسىنىس-تالابىن ورتاعا سالۋعا تولىق حاقىسى بار.
بۇل ورايدا «استانا اقشامى» گازەتىنىڭ رەداكتسياسىنا كەلىپ جاتقان حاتتار دا از ەمەس. اتالعان ماقالالاردى دا ءبىز, نەگىزىنەن, وسىنداي تالعامپاز, تالاپشىل, سانالى كورەرمەندەردىڭ وي-پىكىرى نەگىزىندە دايىنداعان بولاتىنبىز. اتى ايتىپ تۇرعانداي, ەكى ماقالادا دا قازىرگى كوپشىلىك تەلەجۇرگىزۋشىلەردىڭ سويلەۋ مانەرى, ديكتسياسى, اقپارات جەتكىزۋدەگى كوزگە وعاش كورىنىپ تۇراتىن قاتەلىكتەرى سىنالعان ەدى.
ارادا اي وتكەندە زەيىن الىپبەك, ايگۇل مۇكەي, گاۋحار كەرىموۆا سىندى 90-جىلداردىڭ سوڭىندا تەلەارنالار ارقىلى ەلگە ەسىمى كەڭىنەن تانىلعان تاجىريبەلى ديكتورلاردىڭ ەفيرگە قايتا ورالاتىنى جونىندە اقپارات تارادى. تەلەارنا ماماندارى بۇل جاڭالىقتى فەيسبۋك پاراقشالارىندا سۇيىنشىلەپ جازىپتى.
قىركۇيەك ايىنان باستاپ, ياعني جاڭا ماۋسىمدا «حاباردىڭ» نەگىزگى جاڭالىقتارىن ەندى زەيىن الىپبەك پەن گاۋحار كەرىموۆا جۇرگىزەتىنگە ۇقسايدى. ال بەلگىلى تەلەجۋرناليست ايگۇل مۇكەي «داۆايتە, گوۆوريت» اتتى توك-شوۋدى جۇرگىزبەكشى.
«قازاقستان» ۇلتتىق ارناسىنىڭ ديكتورى, بەلگىلى تۇلعا قىمبات دوسجان بۇل جاڭالىققا وراي «مەن قۋانىشتىمىن. مايتالماندار ورالۋدا» دەپ پىكىر قالدىرعان ەكەن.