جاستار تەاترىنىڭ تورىندە حالىقارالىق تەاتر كۇنىنە ارنالعان سالتاناتتى شارا ءوتتى. استانا اكىمدىگىنە قاراستى تەاترلار ۇجىمدارىنىڭ باسىن قوسقان مەرەكەلىك كونتسەرت الدىندا سالا ۇزدىكتەرىنە قالا اكىمىنىڭ العىس حاتىن شاھار باسشىسىنىڭ ورىنباسارى ەرمەك امانشاەۆ تاپسىردى.
– تەاتر – ەرەكشە قۇبىلىس. ءوزىمنىڭ «ۇزىلگەن بەسىك جىرى» اتتى العاشقى پەسام 28 جاسىمدا م.اۋەزوۆ اتىنداعى مەملەكەتتىك اكادەميالىق قازاق دراما تەاترىندا قويىلدى. سول كەزدە تەاتردىڭ كوركەمدىك جەتەكشىسى ءازىربايجان مامبەتوۆ بولاتىن. ساحنا ساڭلاعىنىڭ كوزىنە ءتۇسىپ, ماسكەۋدەگى تەاتر فەستيۆالىنە قاتىسقانىم دا بار. سودان بەرى ارادا قانشاما جىل ءوتتى… تەاتر ودان ءسال عانا الىستاپ كەتسەڭ ساعىندىراتىن قاسيەتكە يە. پەسا جازباي, سپەكتاكلدەرگە بارماي كەتسەڭ, جانىڭا بىردەڭە جەتىسپەي تۇرادى.
قازاق تەاترىندا ۇرپاقتار ساباقتاستىعى ۇزىلگەن جوق. ماعان بۇل ونەر ءتۇرى سونىسىمەن دە قىمبات. ءوز كوزىمىزبەن اسقار توقپانوۆ پەن ءازىربايجان مامبەتوۆتىڭ ميزانستسەنانى قالاي قوياتىنىن, جالپى شىعارماشىلىق ادىستەردى قالاي قولداناتىنىن كوردىك. سول ۇلى ءداستۇردى بۇگىندەرى نۇرقانات جاقىپباي مەن تالعات تەمەنوۆ جالعاستىرىپ كەلە جاتىر. رەپەرتۋارى جاعىنان, كوركەمدىك دەڭگەيى, اكتەرلىك شەبەرلىك جونىنەن ەلوردانىڭ تەاترلارى وزىق ونەر وشاقتارىنان كەم ەمەس, – دەدى ەرمەك امانشاەۆ.
قالا باسشىسىنىڭ ورىنباسارى ايتقانداي, استانا تەاترلارى قازىر الەمدەگى ماڭدايالدى تەاترلارمەن ونەر جارىستىراتىن دەڭگەيگە جەتتى. وسىدان ەكى جىلداي بۇرىن كورشى رەسەيدەگى «زولوتوي ۆيتياز» حالىقارالىق تەاتر فورۋمىنا «تىراۋلاپ ۇشقان تىرنالار» ليريكالىق دراماسىمەن قاتىسقان ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ايدى اسپانعا شىعارىپ, باس جۇلدەنى يەلەندى. ال باستى رولدەردى سومداعان ارتىستەر ديپلومانت اتاندى. تاياۋدا عانا سول رەسەيدە وتكەن «CHELوBEK تەاترا» V حالىقارالىق تەاتر فەستيۆالىنە بارعان قاللەكيلىكتەردىڭ ونەرى جوعارى باعالاندى.
م.گوركي اتىنداعى مەملەكەتتىك اكادەميالىق ورىس دراما تەاترىنا جاقىندا عانا رەسەي پرەزيدەنتى ۆلاديمير ءپۋتيننىڭ العىس حاتى تاپسىرىلدى. بيىل قۇرىلعانىنا 10 جىل تولاتىن جاستار تەاترىنىڭ دا تابىستارى از ەمەس. قۋىرشاقتار تەاترى مەن «ناز» مەملەكەتتىك بي تەاترىنىڭ دا كورەرمەندەرى قالىپتاستى. مىنە, وسى ونەر وشاقتارىنىڭ بىرقاتار ارتىستەرى استانا اكىمىنىڭ العىس حاتىنا يە بولدى.
مەتسەنات بەكزات التىنبەكوۆ بىرنەشە جىلدان بەرى قاللەكي تەاترىنىڭ ءارتىسى, قازاقستاننىڭ ەڭبەك سىڭىرگەن قايراتكەرى كەڭەسباي نۇرلانوۆ اتىنداعى سىياقىنى تاپسىرىپ كەلەدى. بۇل جولى سىياقى تالانتتى اكتريسا اقمارال تاناباەۆا مەن داستان الىموۆكە تابىستالدى.
بيىل استانادا الەمدىك دەڭگەيدەگى ايتۋلى شارا – «ەكسپو-2017» حالىقارالىق مامانداندىرىلعان كورمەسى وتەتىنى بەلگىلى. مەرەكەلىك كونتسەرت وسى ماڭىزدى وقيعانىڭ اينالاسىندا ءوربىدى. جاستار تەاترىنىڭ ءارتىسى ءادىل احمەتوۆ تۋريستەرگە قالانى ارالاتقان گيدتىڭ كەيپىنە ەنىپ, ءار تەاتردىڭ قويىلىمدارىن تاماشالاتقانداي بولدى.
وسى جولى حالىقارالىق تەاتر كۇنىنە ارنالعان سالتاناتتى شارانى قىزىقتى ەتىپ ۇيىمداستىرۋ جاستار تەاترىنا جۇكتەلدى. اتالمىش تەاتر ديرەكتورى ەرنار جۇماتاەۆ كەزەكتى م.گوركي اتىنداعى مەملەكەتتىك اكادەميالىق ورىس دراما تەاترى باسشىسى ەركىن قاسەنوۆكە تاپسىردى. شارا سوڭىندا بارشا جينالعان قاۋىم دۇنيەدەن وزىپ كەتكەن ساحنا ساڭلاقتارىنىڭ رۋحىنا تاعزىم ەتتى.
كەشە «قازاقستان» ورتالىق كونتسەرت زالىندا «ساحناگەر-2017» ۇلتتىق تەاتر سىيلىعىنىڭ لاۋرەاتتارى ماراپاتتالدى.
اتالمىش سىيلىقتى «سامۇرىق-قازىنا» ۇلتتىق ءال-اۋقات قورى» اق قولداۋىمەن قازاقستان تەاترلارى قاۋىمداستىعى بيىل تۇڭعىش مارتە تاعايىنداپ وتىر. تەاتر ءداستۇرىن ساقتاۋ مەن نىعايتۋعا باعىتتالعان سىيلىق سالاداعى شىعارماشىلىق جەتىستىكتەر ءۇشىن بەرىلەدى.
ۇيىمداستىرۋشىلاردىڭ ايتۋىنشا, سىيلىق قازاقستاندىق پاتريوتيزم مەن ۇلتتىق مادەنيەتكە سۇيىسپەنشىلىكتى ارتتىرۋعا, كاسىبي شەبەرلىكتى شىڭداۋعا ىقپال ەتۋى ءتيىس.
امانعالي قالجانوۆ, «استانا اقشامى»
